Read nande 1 Emyatsi yʼEmigulu 29 Bible Online

1 Emyatsi yʼEmigulu 29 - nande bible

1 Emyatsi yʼEmigulu 29

¹Neryo omwami Dawĩdĩ mwabwira endeko yosĩ ati, Solomono mugala wage, oyo Nyamuhanga musa ayisoga, akine mulere kandi siabegere, nʼomũbĩrĩ ni mungi; kusangwa eHekalũ si busana na mundu nĩkwa ni busana nʼOmwami Mukulu Nyamuhanga.

²Neryo lino omo maka wage gosĩ nabĩrĩtegekanĩa busana nʼenyũmba ya Nyamuhanga wage, esyamagetsi busana nʼebindu byʼesyamagetsi, nʼebĩtsĩpa busana nʼebindu byʼebĩtsĩpa, nʼemiringa busana nʼebindu byʼemiringa, nʼebyuma busana nʼebindu byʼebyuma, nʼemiti busana nʼebindu byʼemiti, nʼamabwe wʼeSardĩo, nʼamabwe wʼerisingika, nʼamabwe awabatsĩre, busana nʼeriingira omo bindi, nʼawʼemiringo-miringo, nʼamabwe emihanda yosĩ yʼobũgũlĩ bunene, nʼamabwe mangi awasasagenĩe.

³Kandi kusangwa nabĩrĩhĩra olwanzo lwage oko nyũmba ya Nyamuhanga, kandi kusangwa nyinawite embĩso yage yʼesyamagetsi nʼeyʼebĩtsĩpa; ngahabyo busana nʼenyũmba ya Nyamuhanga wage, kwilaba ebyosĩ ebyo nabĩrĩtegekanĩa busana nʼeHekalũ ĩbũyĩrĩre,

⁴sye syotalanta elfu ĩsatu (3,000) syʼesyamagetsi ebyʼesyamagetsi sya Ofĩrĩ, nʼesyotalanta elfu irinda (7,000) syʼebĩtsĩpa bĩtũkwĩre, busana nʼeriswika esyombĩmbo syʼamanyũmba;

⁵esyamagetsi busana nʼebindu byʼesyamagetsi, nʼebyʼebĩtsĩpa busana nʼebindu byʼebĩtsĩpa, na busana nʼemihanda yosĩ yʼemĩbĩrĩ yʼerikolwa omo byala byʼabanyima-nyima. Nindi wanzĩre eriyiha busana nʼeriyihigula mũnabwĩre busana nʼOmwami Mukulu kwehĩ?

⁶Neryo abakulu bʼebĩtũnga byʼabotata, nʼabakulu bʼebihanda ba Ĩsraelĩ, nʼabasondolĩ bʼamaelfu, nʼabʼamagana, haguma nʼabĩmanĩrĩ bʼomũbĩrĩ wʼOmwami, mobahĩtya nʼomũhwa;

⁷mobaha busana nʼomũbĩrĩ wʼenyũmba ya Nyamuhanga esyotalanta syʼesyamagetsi elfu ĩtanu (5,000) na darkonĩ elfu ĩkũmĩ (10,000) nʼesyotalanta syʼebĩtsĩpa elfu ĩkũmĩ (10,000) nʼesyotalanta syʼemiringa elfu ĩkũmĩ nʼomunani (18,000), nʼesyotalanta syʼebyuma elfu ĩgana (100,000).

⁸Nʼababya bawite amabwe wʼobũgũlĩ bunene mobahago oko mbĩso yʼenyũmba yʼOmwami Mukulu, omo byala bya Yehĩelĩ Omũgersonĩ.

⁹Neryo abandu mobatsema, kusangwa mobahĩtya nʼomũhwa, kusangwa mobaha nʼomutima ahĩkene nʼomũhwa. Nʼomwami Dawĩdĩ nibya mwatsema nʼobutseme bunene.

¹⁰Busana nʼekyo Dawĩdĩ mwapipa Omwami Mukulu embere syʼendeko yosĩ; neryo Dawĩdĩ mwabũga ati, Uwe Mwami Mukulu, Nyamuhanga wa Ĩsraelĩ tata wetu, upipawe kera na kera.

¹¹Obukulu, nʼobũtokĩ, nʼolukengerwa, nʼerĩkĩnda, nʼerikengwa, ni byawe, uwe Mwami Mukulu; kusangwa ebyosĩ ebiri omo lubula, nʼebiri omo kihugo ni byawe; obwami ni bwawe, uwe Mwami Mukulu, ũkayĩhamaya mo mukulu Wʼebyosĩ.

¹²Ebindu nʼerĩsĩkya bĩkalũa ukʼuwe, nawe ukatabala oko byosĩ; nʼomo byala byawe muli Obũtokĩ nʼamaka; ebyala byawe byo bĩkahamaya, nʼeriha maka oko bosĩ.

¹³Neryo lino, Nyamuhanga wetu, tukakuha ewasĩngya nʼeripipa erĩna lyawe lyʼolukengerwa.

¹⁴Nĩkwa Ĩngyendi, nʼabandu bage ni bahi, tuti twangatoka eriha nʼomũhwa ngʼomuhanda oyũ kwehĩ? Kusangwa ebindu byosĩ bĩkalũa ukʼuwe, nʼebyʼebyala byawe byo twabirikuha.

¹⁵Kusangwa tuli babunga embere syawe, nʼabagendĩ ngoko abotata wetu bosĩ babya; ebiro byetu muna-kihugo biri ngʼekyũtsũtsũ, isihali amaha.

¹⁶Uwe Mwami Mukulu Nyamuhanga wetu, ebindu byosĩ ebyo twabĩrĩtegekanĩa busana nʼerĩkũhĩmbĩra enyũmba busana nʼerĩna lyawe lĩbũyĩrĩre bĩkalũa omo byala byawe, kandi ebyosĩ ni byawe.

¹⁷Nyamuhanga wage, nyĩnasĩ nibya, ngoko ukalenga omutima, kandi ũkatsemesĩbawa omo litunganene. Nĩkwa ĩngye omo litunganene lyʼomutima wage nabirianza eriha ebindu byosĩ ebĩ; na lino nabirilangira nʼobutseme abandu bawe abali hano, bakakuha nʼomũhwa.

¹⁸Uwe Mwami Mukulu, Nyamuhanga wa Abrahamũ, nʼowa Ĩsaka, nʼowa Ĩsraelĩ, abotata-kulu betu, ũtegaye ekĩ kera na kera omwʼĩsũnzĩkanĩa lyʼobũlengekanĩa bwʼemitima yʼabandu bawe, nʼerĩtegekanĩa emitima yabo busana nawe;

¹⁹uhe mugala wage Solomono omutima ahĩkene, erĩteya ebihano byawe, nʼerĩtũlago lyawe, nʼemigambo yawe, nʼerikola emyatsi yosĩ eyĩ, nʼerĩhĩmba enyũmba nyibuya eyo nabĩrĩtegekanĩrya ebindu.

²⁰Neryo Dawĩdĩ mwabwira endeko yosĩ ati, Lino mupipe Omwami Mukulu Nyamuhanga wenyũ. Nʼendeko yosĩ moyapipa Omwami Mukulu, Nyamuhanga wʼabotata wabo, mobũnamya emitwe yabo, mobasĩkya Omwami Mukulu, nʼomwami.

²¹Mobahongera Omwami Mukulu amahere, kandi mobahera amahere wʼerĩokererya busana nʼOmwami Mukulu engyaka wʼekiro ekyo, esyonume elfu nguma (1,000), nʼesyombangale elfu nguma (1,000), nʼebyana byʼesyombũlĩ elfu nguma (1,000), haguma nʼamahere wabo wʼerĩpũlya, nʼamahere mangi kutsibu busana nʼAbaĩsraelĩ bosĩ,

²²mobalya nʼerĩpũlya embere syʼOmwami Mukulu oko kiro ekyo nʼobutseme bunene. Kandi mobayira Solomono mugala wa Dawĩdĩ mo mwami engendo yʼakabiri, mobamũhakabya amagũta busana nʼOmwami Mukulu abye mukulu, na Zadokĩ eribya mũhererĩ.

²³Neryo Solomono mwĩkala oko kĩtũmbĩ kyʼobwami kyʼOmwami Mukulu ngʼOmwami omo mwanya wa Dawĩdĩ tata wuwe, neryo mwagasa; nʼAbaĩsraelĩ bosĩ mobamwowa.

²⁴Nʼabakulu bosĩ, nʼesyombangĩ, nʼabagala bosĩ nibya bʼomwami Dawĩdĩ mobayĩhĩra omo byala byʼOmwami Solomono.

²⁵NʼOmwami Mukulu mwahamya Solomono yo kutsibu omo meso wʼAbaĩsraelĩ bosĩ, kandi mwamuha obukengwa obute bwatabya oko gundi mwami wʼAbaĩsraelĩ embere siwe.

²⁶Neryo Dawĩdĩ mugala wa Yese mwatabala oko Baĩsraelĩ bosĩ.

²⁷Nʼemigulu atabala oko Baĩsraelĩ yabya myaka makũmĩ ani (40); mwatabala eHebũronĩ emyaka irinda, nʼeYerũsalema mwatabala emyaka makũmĩ asatu nʼeyĩsatu (33).

²⁸Neryo mwahola ĩnĩakũlĩre ndeke, iniabiribuga biro, nʼebindu nʼerĩsĩkĩbwa; na Solomono mugala wuwe mwatabala omo mwanya wuwe.

²⁹Neryo emĩbĩrĩ yʼOmwami Dawĩdĩ, eyʼembere nʼeyʼenyũma, lebaya ĩsakĩre omo bĩnywa byʼomũlangĩrĩ Samwelĩ, nʼomo bĩnywa byʼomũmĩnyererĩ Natana nʼomo bĩnywa byʼomũlangĩrĩ ye Gadĩ,

³⁰haguma nʼeritabala liwe lyosĩ, nʼamaka wuwe, nʼemigulu eyamulabako, nʼoko Ĩsraelĩ, nʼeyalaba oko mami gosĩ wʼebihugo ebyo.