Read nande 2 Emyatsi yʼEmigulu 1 Bible Online

2 Emyatsi yʼEmigulu 1 - nande bible

2 Emyatsi yʼEmigulu 1

¹Neryo Solomono mugala wa Dawĩdĩ mwasĩka omo bwami buwe, nʼOmwami Mukulu Nyamuhanga wuwe abya haguma naye, kandi mwamũhamya kutsibu.

²Na Solomono mwabũga nʼAbaĩsraelĩ bosĩ, nʼabakulu bʼamaelfu, nʼabʼamagana, nʼabatswerĩ, nʼoko buli mũsondolĩ wʼAbaĩsraelĩ bosĩ, abakulu bʼebĩtũnga byʼabotata.

³Neryo Solomono nʼendeko yosĩ haguma naye, mobaya ahendata ahabya eGĩbeonĩ; kusangwa eHema yʼerĩhĩndanamo ya Nyamuhanga ho yabya, eyo Musa omugombe wʼOmwami Mukulu akokotaya omo mbwarara.

⁴Nĩkwa erĩsandũko lya Nyamuhanga, Dawĩdĩ ĩnĩabĩrĩlũsyalyo eKĩrĩatĩ-Yearĩmũ eriretalyo aho Dawĩdĩ akokotaya busana nalyo; kusangwa ahandiralyo eHema eYerũsalema.

⁵Neryo ekiherero kyʼomulinga, ekyo Bezalelĩ mugala wa Ũrĩ, mugala wa Hũrĩ akokotaya, kyabya embere syʼahabũyĩrĩre hʼOmwami Mukulu; na Solomono nʼendeko mobasondyakyo.

⁶Neryo Solomono mwahetukira oko kiherero kyʼomulinga embere syʼOmwami Mukulu ekyabya ahali eHema yʼerĩhĩndanamo mwahererako amahere wʼerĩokererya elfu nguma (1,000).

⁷Omo kiro ekyo Nyamuhanga mwahulukira Solomono, mwamubwira ati, Ũbũlaye ekyo nangakuha.

⁸Na Solomono mwabwira Nyamuhanga ati, Wabĩrĩkangya tata wage Dawĩdĩ ebibuya byʼolwanzo lunene, kandi wabirinyiyira mo mwami omo mwanya wuwe.

⁹Neryo lino, uwe Mwami Mukulu Nyamuhanga, erilaga lyawe uku tata wage Dawĩdĩ lĩberererĩbawe; kusangwa wabirinyiyira mo mwami wʼabandu bangi ngʼolũtũtũ lwʼekitaka.

¹⁰Na lino umbe amenge nʼeriminya, inatoka erihuluka nʼeriingira embere syʼabandu aba; kusangwa nindi wangatoka eritswera abandu bawe aba, abangaha kwehĩ?

¹¹Neryo Nyamuhanga mwabwira Solomono ati, Kusangwa ekĩ kyabya omo mutima wawe, ĩsũlĩyĩbũlĩraya ebindu, kutse obũsokĩ, kutse erĩsĩkya, kutse engebe yʼabakakũkwa obusu, kutse sũlĩtabũlya eribyaho biro bingi; nĩkwa wabĩrĩyĩbũlĩrya amenge nʼeriminya, iwatoka eritswera abandu bage, abo nabirikuyirira mo mwami wabo.

¹²Neryo amenge nʼeriminya wabirihabwabyo; kandi ngandikuha ebindu, nʼobukamahe, nʼerĩsĩkĩbwa, kwilaba abami bosĩ ababya embere syawe, kandi sihendisyabya ogundi oyo Wasyabya nʼebingaha.

¹³Neryo Solomono mwalũa oko hendata eGĩbeonĩ, erĩlũa aho embere wʼeHema yʼerĩhĩndanamo, mwaya eYerũsalema; neryo mwatabalira Abaĩsraelĩ.

¹⁴Neryo Solomono mwahĩndanĩa esyogalĩ nʼabali oko syosabayĩrĩ; kandi mwabya nʼesyogalĩ elfu nʼamagana ani (1,400), nʼabali oko syosabayĩrĩ elfu erĩkũmĩ nʼĩbĩrĩ (12,000), abo ahĩra omo mĩyĩ yʼesyogalĩ, na haguma nʼomwami eYerũsalema.

¹⁵Neryo omwami Solomono mwayira ebĩtsĩpa nʼesyamagetsi eribya bingi ngʼamabwe eYerũsalema, nʼemiti yʼemĩerezĩ eribya ngʼemiti yʼemĩsabũ eyiri omo bwerere busana nʼobungi bwayo.

¹⁶Nʼesyosabayĩrĩ esyo Solomono abya awite syalũsĩbawa eMĩsĩrĩ; abahĩnganĩa bʼomwami mobangirirasyo omo bihangulo, obuli kihangulo nʼenzwere yakyo.

¹⁷Kandi mobalũsya egalĩ ĩkalũa eMĩsĩrĩ busana nʼesyosekelĩ syʼekĩtsĩpa magana ndatu (600), nʼesabayĩrĩ busana nʼesyosekelĩ erĩgana nʼamakũmĩ atanu (150). Nʼabami bosĩ bʼAbahĩtĩ, nʼabami bʼeSĩrĩa ko baletasyo batya omo byala byabo.