Read nande 2 Emyatsi yʼEmigulu 10 Bible Online

2 Emyatsi yʼEmigulu 10 - nande bible

2 Emyatsi yʼEmigulu 10

¹Neryo Rehoboamũ mwaya eSekemũ; kusangwa Abaĩsraelĩ bosĩ ĩbamabĩhĩka eSekemũ erimuyira mo mwami.

²Neryo omugulu Yeroboamũ mugala wa Nebatĩ owa omwatsi oyo [kusangwa abya eMĩsĩrĩ, eyo atibita akalũa ahali omwami Solomono], neryo Yeroboamũ mwasubula akalũa eMĩsĩrĩ.

³Neryo mobamutumirako erimubirikira. Neryo omugulu Yeroboamũ nʼAbaĩsraelĩ bosĩ bahĩka, mobabũga na Rehoboamũ, bati,

⁴Tata wawe mwakalya engomo yetu; neryo nawe wangũhaye omũbĩrĩ owakalĩre wa tata wawe, nʼengomo yiwe eyĩrĩtohĩre eyo atũhekaya, netu twasyakukolera.

⁵Naye mwabwirabo ati, Mwasyambĩkako kandi enyũma wʼebiro bisatu. Neryo abandu mobalũaho.

⁶Neryo omwami Rehoboamũ mwakanĩa haguma nʼabalume bakulu, ababya bakakolera tata wuwe Solomono omugulu abya akiriho, ati, Muti nangasũbĩrya abandu aba bo nyiti kwehĩ?

⁷Mobamubwira bati, Wamabya mwenge oko bandu aba, nʼerĩtsemesyabo, nʼeribwirabo ebĩnywa bibuya, neryo basyabya bagombe bawe ebiro byosĩ.

⁸Nĩkwa mwaleka erĩhano lyʼabalume bakulu eryo bamuha, mwabũlya oko balwana abʼoko lubu luwe, nʼerimukolera.

⁹Neryo mwabũlyabo ati, Nenyũ muti twangatoka erĩsũbĩrya abandu aba bo tuti, ababĩrĩbũga nage bati, Wangũhaye engomo yetu tata wawe atũhĩrako.

¹⁰Nʼabalwana abʼoko lubu luwe mobamubwira bati, Ko wasyabwira bandu ababũga nawe bati, Tata wawe mwatũlĩtoherya engomo, nĩkwa ũtwangũhĩrayeyo. Ko wasyabwirabo utya, Akasanwe kage ni kanene kwilaba erihindi rya tata wage.

¹¹Neryo lino tata wage kwʼabahekaya engomo ĩrĩtohĩre, ĩngye nganditomeka oko ngomo yenyũ; tata wage mwabakunga omo mikoba, nĩkwa ĩngye nasyabakunga omo nge.[1]

¹²Neryo Yeroboamũ nʼabandu bosĩ mobasa uku Rehoboamũ oko kiro kyʼakasatu ngoko mwami abũga, ati, Mwasyambĩkako kandi oko kiro kyʼebisatu.

¹³Nʼomwami mwasũbĩryabo omo muhayo; nʼomwami Rehoboamũ mwaleka erĩhano lyʼabalume bakulu,

¹⁴mwabwirabo ngʼerĩhano lyʼabalwana, ati, Tata wage mwalĩtohya engomo yenyũ, nĩkwa ĩngye nasyatomekerayo; tata wage mwabakunga omo mukoba, nĩkwa ĩngye nasyabakunga omo nge.[2]

¹⁵Neryo omwami mwatahulikirira abandu; kusangwa Nyamuhanga mwabindulago atya, Omwami Mukulu atoke erĩhanganĩa ekĩnywa kiwe, ekyo alayira Ahĩya Omũsĩlonĩ, busana na Yeroboamũ mugala wa Nebatĩ.

¹⁶Neryo omugulu Abaĩsraelĩ bosĩ balangira nogoko mwami sĩalĩtowabo abandu mobasũbĩrya omwami, bati, Tuli nʼerĩgabo lyahi uku Dawĩdĩ kwehĩ? Kutse situwite mwandu uku mugala wa Yese. Uwe Ĩsraelĩ, obuli mundu musube omo mahema wenyũ; na lino uwe Dawĩdĩ, Ũlebaye enyũmba yawe. Litya Abaĩsraelĩ bosĩ mobasuba omo mahema wabo.

¹⁷Nĩkwa abana ba Ĩsraelĩ ababya bĩkere omo mĩyĩ yʼeYũda, Rehoboamũ mwatabala kubo.

¹⁸Neryo omwami Rehoboamũ mwatuma Hadoramũ oyo wabya mũhanganĩrĩ wʼabandu bʼomũbĩrĩ wʼemetre; nʼabana ba Ĩsraelĩ mobamugusa kwʼamabwe neryo mwahola. Nʼomwami Rehoboamũ mwanguha erisambira oko galĩ yiwe, eritibita eYerũsalema.

¹⁹Neryo Abaĩsraelĩ mobayisamambula oko kĩtũnga kya Dawĩdĩ erĩhĩka mũnabwĩre.