Read nande 2 Emyatsi yʼEmigulu 11 Bible Online

2 Emyatsi yʼEmigulu 11 - nande bible

2 Emyatsi yʼEmigulu 11

¹Neryo omugulu Rehoboamũ ahĩka eYerũsalema, mwahĩndanĩa ebĩtũnga bya Yũda na Benyamĩna, abandu abayisogawa abasĩ erilwa, elfu erĩgana nʼamakũmĩ munani (180,000), erilwa nʼAbaĩsraelĩ, erĩsũbya obwami uku Rehoboamũ.

²Nĩkwa ekĩnywa kyʼOmwami Mukulu mokyahĩka uku Semaya omundu wa Nyamuhanga kiti,

³Ubwire Rehoboamũ mugala wa Solomono omwami wʼAbayũda, nʼAbaĩsraelĩ bosĩ abali eYũda nʼeBenyamĩna, uti,

⁴Omwami Mukulu akabũga ati, Simuhetuke eriyalwa nʼabagala benyũ; musube obuli mundu omo nyũmba yiwe; kusangwa omwatsi oyũ akalũa ũkwʼĩngye. Neryo mobahulikirira ebĩnywa byʼOmwami Mukulu, mobasubula erireka eriyalwa na Yeroboamũ.

⁵Rehoboamũ mwĩkala eYerũsalema, neryo mwahĩmba eYũda emĩyĩ yʼeriyilwira.

⁶Mwahĩmba eBetelehemũ, nʼeEtamũ, nʼeTekoa,

⁷nʼeBetĩ-sũrĩ, nʼeSoko, nʼeAdũlamũ,

⁸nʼeGatĩ, nʼeMaresa, nʼeZĩfũ,

⁹nʼeAdoraĩmũ, nʼeLakĩsĩ, nʼeAzeka,

¹⁰nʼeZora, nʼeAĩlonĩ, nʼeHebũronĩ owali eYũda nʼeBenyamĩna, emĩyĩ eyiko ngotere.

¹¹Kandi mwakongotera ahakongotere, neryo mwahĩra muyo abakulu, nʼesyombĩso syʼakalyo, nʼesyʼamagũta, nʼesyʼebĩnyũ.

¹²Nʼomo buli mũyĩ mwahĩra esyongabo nʼamatũmo, mwayirayo mo yʼamaka kutsibu. Neryo mwahamba Yũda na Benyamĩna mo buwe.

¹³Nʼabahererĩ nʼAbalawĩ ababya omo Ĩsraelĩ yosĩ mobahangana haguma naye bakalũa oko mitano yabo yosĩ.

¹⁴Kusangwa Abalawĩ mobasĩga emĩyĩ yabo nʼamasokĩ wabo, mobasa eYũda nʼeYerũsalema; kusangwa Yeroboamũ nʼabagala buwe mobaganabo sibakolere Omwami Mukulu omũbĩrĩ wabo wʼobũhererĩ.

¹⁵Yeroboamũ mwayĩhĩrĩra abahererĩ buwe busana nʼahʼendata, na busana nʼesyombaya, na busana nʼebyana byʼende ebyo akokotaya.

¹⁶Nʼabandu bakalũa omo bihanda byosĩ bya Ĩsraelĩ, abahĩra emitima yabo erisonda-sondya Omwami Mukulu Nyamuhanga wa Ĩsraelĩ, mobasa eYerũsalema erisyaherera Omwami Mukulu Nyamuhanga wʼabotata wabo.

¹⁷Litya mobasĩkya obwami bwa Yũda oko myaka ĩsatu, nʼerĩsĩkya Rehoboamũ mugala wa Solomono; kusangwa oko myaka ĩsatu mobalendera omo nzira ya Dawĩdĩ na Solomono.

¹⁸Na Rehoboamũ mwatahya omũkalĩ ye Mahalatĩ, mwali wa Yerĩmotĩ mugala wa Dawĩdĩ, na Abĩhaĩlĩ mwali wa Elĩabũ mugala wa Yese;

¹⁹naye mwamubutira bagala, Yeũsĩ, na Semarĩa, na Zahamũ.

²⁰Nʼenyũma wʼoyo mwahĩkya Maka mwali wa Abũsoloma; naye mwamubutira Abĩya, na Ataĩ, na Zĩza, na Selomĩtĩ.

²¹Na Rehoboamũ mwanza Maka, ye mwali wa Abũsoloma, kwilaba abakalĩ buwe bosĩ nʼabahwekĩ buwe. Kusangwa mwatahya abakalĩ ĩkũmĩ nʼomunani nʼabahwekĩ makũmĩ ndatu; mwabuta bagala makũmĩ abiri nʼomunani nʼabali makũmĩ ndatu.

²²Na Rehoboamũ mwahanganĩa Abĩya mugala wa Maka eribya mukulu, omũsondolĩ omo katĩkatĩ kʼabagala babo; kusangwa abya anzĩre erimuyira mo mwami.

²³Kandi mwakola nʼamenge, mwagabira abagala buwe bosĩ omo bihugo byosĩ bya Yũda na Benyamĩna, oko buli mũyĩ akongotere; kandi mwahabo ebyalya bingi. Kandi mwahĩkĩryabo abakalĩ bangi.