Read nande 2 Emyatsi yʼEmigulu 12 Bible Online

2 Emyatsi yʼEmigulu 12 - nande bible

2 Emyatsi yʼEmigulu 12

¹Neryo omugulu obwami bwa Rehoboamũ bwahangana, naye iniamabiyira maka, neryo mwasĩganĩa emigambo yʼOmwami Mukulu, nʼAbaĩsraelĩ bosĩ haguma naye.

²Neryo oko mwaka wʼakatanu wʼOmwami Rehoboamũ, Sĩsakĩ omwami wʼeMĩsĩrĩ mwahetuka erilwa nʼeYerũsalema, kusangwa ĩbamabĩhalya oko Mwami Mukulu,

³haguma nʼesyogalĩ elfu nguma nʼamagana abiri (1,200), nʼabali oko syosabayĩrĩ elfu makũmĩ ndatu (60,000). Nʼabandu abasa haguma naye bakalũa eMĩsĩrĩ babya butaganzika: Abalũbĩmũ, nʼAbasũkĩ, nʼAbaetĩopĩa.

⁴Neryo Sĩsakĩ mwahũnga emĩyĩ eyikongotere eyabya ya Yũda, neryo mwahĩka eYerũsalema.

⁵Neryo omũmĩnyererĩ Semaya mwahĩka uku Rehoboamũ, nʼoko banya-mwami ba Yũda, ababya bahĩndene eYerũsalema busana na Sĩsakĩ, neryo mwabwirabo ati, Omwami Mukulu ati, Mwabĩrĩnyĩsĩganĩa, busana nʼekyo nabĩrĩbasĩga nibya omo byala bya Sĩsakĩ.

⁶Neryo abanya-mwami ba Ĩsraelĩ nʼomwami mobayikehya; mobabũga bati, Omwami Mukulu atunganene.

⁷Neryo omugulu Omwami Mukulu alangira ko bamayĩkehya, ekĩnywa kyʼOmwami Mukulu mokyahĩka uku Semaya, kiti, Babĩrĩyĩkehya; Sĩndĩendĩheryabo; nĩkwa ngandihabo Omulamo muke, nʼerihitana lyage sĩryendĩsyũtũlĩrwa eYerũsalema omo byala bya Sĩsakĩ.

⁸Nĩkwa basyabya bakobe buwe, ibatoka eriminya omũbĩrĩ wage nʼomũbĩrĩ wʼamami wʼebihugo kwʼate mũsĩndo muguma.

⁹Neryo Sĩsakĩ omwami wʼeMĩsĩrĩ mwahetuka eriyalwa nʼeYerũsalema, neryo mwahũnga esyombĩso syʼenyũmba yʼOmwami Mukulu, nʼesyombĩso syʼenyũmba yʼOmwami; mwahũnga ebyosĩ; nibya mwahũnga esyongabo syʼesyamagetsi esyo Solomono akokotaya.

¹⁰Nʼomwami Rehoboamũ mwakokotya esyongabo syʼemiringa omo mwanya wasyo, mwahĩrasyo omo byala byʼabakulu bʼabateya abategaya Olũyĩ lwʼenyũmba yʼOmwami.

¹¹Neryo emigulu yosĩ eyo mwami ingira omo nyũmba yʼOmwami Mukulu, abateya mobasa nʼerihekasyo, neryo, mobasũbyasyo omo kyumba kyʼabateya.

¹²Nʼomugulu ayĩkehaya, erihitana lyʼOmwami Mukulu molyamũlũako, eritindamũherya kutsibu; kandi omo Yũda mohabanika emyatsi mibuya.

¹³Neryo omwami Rehoboamũ mwayĩsĩkya eYerũsalema, mwatabala; kusangwa Rehoboamũ abya wʼemyaka makũmĩ ani nʼomuguma omugulu atsũka eritabala, neryo mwatabala eYerũsalema emyaka erĩkũmĩ nʼeyirinda, omo mũyĩ ogo Mwami Mukulu ayisoga omo bihanda byosĩ bya Ĩsraeli, erĩhĩraho erĩna liwe; nʼerĩna lya koyo wuwe lyabya Nama Omũamonĩ.

¹⁴Naye mwakola ekyabya kibi, kusangwa mwatahĩra omutima wuwe erisonda-sonda Omwami Mukulu.

¹⁵Neryo emĩbĩrĩ ya Rehoboamũ, eyʼerĩmbere nʼeyʼendũlĩ sĩyĩsakĩre omo bĩnywa byʼomũmĩnyererĩ Semaya nʼebyʼomũhanĩ Ĩdo ngʼeriganza lyʼesyondengo kwehĩ? Kandi mohabya malwa ebiro byosĩ omo katĩkatĩ ka Rehoboamũ na Yeroboamũ,

¹⁶Na Rehoboamũ mweya abĩse-kulu buwe, mwatabwa omo mũyĩ wa Dawĩdĩ; na Abĩya mugala wuwe mwabya mwami omo mwanya wuwe.