Read nande 2 Emyatsi yʼEmigulu 13 Bible Online

2 Emyatsi yʼEmigulu 13 - nande bible

2 Emyatsi yʼEmigulu 13

¹Oko mwaka wʼerĩkũmĩ nʼomunani wʼOmwami Yeroboamũ, Abĩya mwatsũka eribya mwami oko Bayũda.

²Mwatabala eYerũsalema emyaka ĩsatu; nʼerĩna lya koyo wuwe lyabya Mĩkaya mwali wa Ũrĩelĩ owʼeGĩbea. Nʼamalwa mwabya omo katĩkatĩ ka Abĩya na Yeroboamũ.

³Na Abĩya mwateka malwa nʼomulondo wʼesyombangĩ syʼamalwa esyayisogawa, abandu elfu magana ani (400,000); na Yeroboamũ mwateka malwa erilwa naye nʼabandu abayisogawa, esyombagĩ syʼamalwa elfu magana munani (800,000).

⁴Na Abĩya mwahangana oko kitwa Zemaraĩmũ, ekyabya omo kihugo kyʼebitwa kya Efũraĩmũ, mwabũga ati, Uwe Yeroboamũ, nʼAbaĩsraelĩ bosĩ, munyihulikirire;

⁵sĩmwasĩ ngoko Mwami Mukulu Nyamuhanga wa Ĩsraelĩ aha Dawĩdĩ nʼabagala buwe eritabala oko Baĩsraelĩ ebiro byosĩ omo ndagano yʼomũnyũ kwehĩ?

⁶Nĩkwa Yeroboamũ mugala wa Nebatĩ, omugombe wa Solomono mugala wa Dawĩdĩ, mwahangana nʼeriyisamambula oko mukama wuwe.

⁷Nikwa abandu abatawite mugaso mobayĩhĩndanĩa ukwʼiye, abandu batya-batya, mobasĩka nʼerĩsĩnga Rehoboamũ mugala wa Solomono, omugulu Rehoboamũ abya mulere, nʼowʼomutima molo-molo, mwatatoka erĩkakĩryabo.

⁸Na lino mũkaganĩraya erĩkakĩrya obwami bwʼomwami Mukulu omo byala byʼabagala ba Dawĩdĩ; nenyũ muli ndeko nene, kandi muwite ebyana byʼesyonde byʼesyamagetsi ebyo Yeroboamũ akokotaya busana nenyũ eribya esyonyamuhanga.

⁹Momutahiga abahererĩ bʼOmwami Mukulu, bagala ba Harũnĩ, nʼAbalawĩ, ĩmwabĩrĩyĩhĩrĩra abahererĩ ngʼomũsĩndo wʼabandu bʼebindi bihugo kwehĩ? Neryo oyukasa nʼeriyihigula omo nume nderendere nʼesyombangale sirinda, oyo atoke eribya mũhererĩ wʼesite esyonyamuhanga.

¹⁰Nĩkwa ĩtwe, Omwami Mukulu ni Nyamuhanga wetu, netu sĩtwetamũsĩganĩa; kandi abagala ba Harũnĩ bakakolera Omwami Mukulu, ngʼabahererĩ, nʼAbalawĩ bakakola emĩbĩrĩ yabo.

¹¹Nabo bakahĩsĩraya Omwami Mukulu obuli tũtũtũ amahere wʼerĩokererya nʼobukwa obukakumba ndeke; kandi bakategekanaya amandu wʼerĩkanganĩa oko mesa ĩbuyĩrĩre; nʼomutagala wʼetala yʼesyamagetsi haguma nʼesyotala syasyo, eriaka obuli ĩgolo-golo; kusangwa ĩtwe tũkategaya omũbĩrĩ wʼOmwami Mukulu Nyamuhanga wetu; nĩkwa ĩnywe mwabĩrĩmũsĩganĩa.

¹²Neryo, lebaya, Nyamuhanga ali haguma netu, akatubera embere, nʼabahererĩ buwe haguma nʼesyongubi esĩkasagĩsaya eribuha engubi yʼerilwa nenyũ. Ĩnywe bana ba Ĩsraelĩ, Simulwe nʼOmwami Mukulu, Nyamuhanga wʼabotata wenyũ; kusangwa simwendisyatoka.

¹³Nĩkwa Yeroboamũ mwatĩmbya enyũma wabo ekĩrĩmbyo kyaleka abandi ibabya embere syʼAbayũda, nʼabasombĩ ibabya enyũma wabo.

¹⁴Nʼomugulu Abayũda balangira enyũma, lebaya amalwa abya embere nʼenyũma wabo: neryo mobalakira Omwami Mukulu, nʼabahererĩ mobabuha esyongubi.

¹⁵Neryo abandu ba Yũda mobũta obogo; nʼomugulu abandu ba Yũda bũta obogo, neryo Nyamuhanga mwĩtĩra Yeroboamũ nʼAbaĩsraelĩ bosĩ embere sya Abĩya na Yũda.

¹⁶Nʼabana ba Ĩsraelĩ mobasaga Abayũda, na Nyamuhanga mwahĩrabo omo byala byabo.

¹⁷Na Abĩya nʼabandu buwe mobakĩndabo nʼerĩĩta lĩnene; kyaleka abalume abayisogawa ba Ĩsraeli ĩbakwa elfu magana atanu (500,000).

¹⁸Litya abana ba Ĩsraeli mobasĩngwa oko mugulu oyo, nʼabana ba Yũda mobakĩndabo, kusangwa bayiketera Omwami Mukulu Nyamuhanga wʼabotata wabo.

¹⁹Na Abĩya mwakwamirira Yeroboamũ, mwamũhũnga kwʼemĩyĩ, eBetelĩ, nʼemĩyĩ yayo, nʼeYesana nʼemĩyĩ yayo, nʼeEfũraĩmũ nʼemĩyĩ yayo.

²⁰Kutse Yeroboamũ mwataswabana amaka oko biro bya Abĩya. NʼOmwami Mukulu mwamũswĩrya, neryo mwahola.

²¹Nĩkwa Abĩya mwayira amaka, mwahĩkya bakalĩ ĩkũmĩ nʼabani, mwabuta bagala makũmĩ abiri nʼababiri, nʼabali ĩkũmĩ nʼendatu.

²²Nʼeyindi mĩbĩrĩ ya Abĩya, nʼemibere yiwe, nʼebĩnywa biwe, bĩsakĩre omo kitabu kyʼerigambula kyʼomũmĩnyererĩ Ĩdo.