Read nande 2 Emyatsi yʼEmigulu 14 Bible Online

2 Emyatsi yʼEmigulu 14 - nande bible

2 Emyatsi yʼEmigulu 14

¹Neryo Abĩya mweya abotata-kulu buwe, mobamuta omo mũyĩ wa Dawĩdĩ; na Asa mugala wuwe mwatabala omo mwanya wuwe. Omo biro biwe ekihugo mokyatũlera oko myaka ĩkũmĩ.

²Neryo Asa mwakola ebyabya bibuya nʼebitunganene omo meso wʼOmwami Mukulu Nyamuhanga wuwe.

³Kusangwa mwalũsya ekiherero kyʼehandi, nʼahendata, mwabũnanga esyondũyĩ nyiri, kandi mwakenzera esyosanamu sya Asera syʼahisi,

⁴kandi mwahana Abayũda ati basonda-sondaye Omwami Mukulu Nyamuhanga wʼabotata wabo, nʼerikola emigambo nʼebihano.

⁵Kandi mwalũsya omo mĩyĩ yosĩ yʼAbayũda ahendata nʼesyosanamu syʼeryuba; nʼobwami mobwatũlera embere siwe.

⁶Neryo mwahĩmba emĩyĩ eyikongotere eYũda; kusangwa ekihugo ĩkyamabĩtũlera, isiali nʼamalwa oko myaka eyo, kusangwa Omwami Mukulu ĩnĩabĩrĩmũhũmũlya.

⁷Kusangwa mwabwira Abayũda ati, Tũhĩmbe emĩyĩ eyĩ, nʼerĩtĩmbya kuyo esyombĩmbo nʼemisunguliko miri-miri, nʼesyongyo, nʼemĩkangĩ; ekihugo kikine embere syetu, kusangwa twabirisonda-sondya Omwami Mukulu Nyamuhanga wetu; twabirimusonda-sonda naye abirituha erihumula oko mbande syosĩ. Neryo mobahĩmba mobagasa.

⁸Na Asa abya nʼomulondo owakaheka esyongabo nʼamatũmo, elfu magana asatu (300,000) eYũda; nʼoko Babenyamĩna elfu magana abiri nʼamakũmĩ munani (280,000) abakaheka esyongabo nʼerilasa amata. Abosĩ babya mbangi syʼamaka.

⁹Neryo Zera Omũetĩopĩa mwasa erilwa nabo nʼomulondo wʼemĩlĩonĩ nguma (1,000,000), nʼesyogalĩ magana asatu; neryo mwahĩka eMaresa.

¹⁰Neryo Asa mwayahĩndana naye, mobateka malwa omo musya wʼeZefata eMaresa.

¹¹Na Asa mwalakira Omwami Mukulu Nyamuhanga wuwe, mwabũga ati, Omwami Mukulu, sihali gundi nga we owʼerĩwatĩkya, omo katĩkatĩ kʼowʼamaka nʼoyutawite maka; uwe Mwami Mukulu Nyamuhanga wetu, ũtũwatĩkaye; kusangwa tukayiketera we, nʼomo lĩna lyawe tukayalwa nʼendeko eyĩ. Uwe Mwami Mukulu, nina we Nyamuhanga wetu; Suleke mundu akakũsĩnga.

¹²Neryo Omwami Mukulu mwĩtĩra Abaetĩopĩa embere sya Asa, nʼembere syʼAbayũda; nʼAbaetĩopĩa mobatibita.

¹³Na Asa nʼabandu ababya haguma naye mobakwamabo erĩhĩka eGerarĩ. NʼAbanya Etĩopĩa mobawa bangi isibangatoka eriswahangana; kusangwa mobaherĩbwa embere syʼOmwami Mukulu, nʼembere syʼomulondo wuwe; kandi mobahũnga bingi kutsibu.

¹⁴Kandi mobĩta emĩyĩ yosĩ eyĩtĩmbire eGerarĩ; kusangwa habya obunyegwa bunene muyo.

¹⁵Mobĩta abawite ebihangulo, nibya mobahũnga esyombũlĩ nyingi nʼesyongamia, neryo mobasuba eYerũsalema.