Read nande 2 Emyatsi yʼEmigulu 15 Bible Online

2 Emyatsi yʼEmigulu 15 - nande bible

2 Emyatsi yʼEmigulu 15

¹Neryo Omũlĩmũ wa Nyamuhanga mwahĩka uku Azaria mugala wa Odedĩ.

²Naye mwahuluka erĩyahĩndana na Asa, mwamubwira ati, Uwe Asa, nʼAbayũda bosĩ nʼAbabenyamĩna, mũnyowe. Omwami Mukulu ali haguma nenyũ omugulu muli haguma naye; nenyũ mwamamusonda-sonda, asyabanika kwĩnywe; nĩkwa mwamamũsĩganĩa naye asyabasĩga.

³Nĩkwa oko mugulu muli Abaĩsraelĩ babya butsira Nyamuhanga wa kwenene, na butsira mũhererĩ wʼerĩkangĩrĩrya, isibawite migambo.

⁴Nĩkwa omo bũlĩge bwabo mobabindukira Omwami Mukulu Nyamuhanga wa Ĩsraelĩ nʼerimusonda-sonda, naye mwabanika kubo.

⁵Nʼoko migulu eyo mohatabya buholo oko yukahuluka kutse oyukingira eka, nĩkwa engitsi nene moyagalya esyondũlanĩ syosĩ syʼebihugo.

⁶Ekihanda mokyahĩnola ekihanda, nʼomũyĩ mwalwa nʼogundi mũyĩ, kusangwa Nyamuhanga mwagalyabo omo buhanya bosĩ.

⁷Nĩkwa ĩnywe mubye nʼamaka, muyisige; kusangwa omũbĩrĩ wenyũ asyahembwa.

⁸Neryo omugulu Asa owa ebĩnywa ebĩ, nʼeriminyerera lyʼomũmĩnyererĩ Odedĩ, neryo mwahanda omutima mwalũsya esyosanamu syʼesyonye omo kihugo kyosĩ kya Yũda na Benyamĩna, nʼemĩyĩ eyo ahũnga omo kihugo kyʼebitwa kya Efũraĩmũ; kandi mwasũbya ekiherero kyʼOmwami Mukulu, ekyabya embere wʼekĩsekũ kyʼOmwami Mukulu.

⁹Neryo mwahĩndanĩa Abayũda bosĩ, nʼAbabenyamĩna nʼabosĩ ababunga haguma nabo bakalũa ewa Efũraĩmũ na Manase, na Sĩmeonĩ; kusangwa Abaĩsraelĩ bangi mobaya oko luhande luwe, omugulu balangira ngoko Mwami Mukulu Nyamuhanga wuwe abya haguma naye.

¹⁰Neryo mobayĩhĩndanĩa eYerũsalema oko mukera wʼakasatu omo mwaka wʼerĩkũmĩ nʼeyĩtanu wʼeritabala lya Asa.

¹¹Kandi mobahonga busana nʼOmwami Mukulu oko kiro ekyo ukwʼebyo banyega ebinyegwa byʼesyonde magana alinda (700), nʼesyombũlĩ elfu irinda (7,000).

¹²Kandi mobayira endagano yʼerisonda-sonda Omwami Mukulu, Nyamuhanga wʼabotata wabo nʼomutima wabo gosĩ nʼekĩrĩmũ kyabo kyosĩ;

¹³kandi bati, oyutendisyasonda-sonda Omwami Mukulu Nyamuhanga wa Ĩsraelĩ asyĩtwa, amabya mulere kutse mukulu, kutse amabya mulume kutse mũkalĩ.

¹⁴Mobalahĩrya oko Mwami Mukulu omo mulenge munene, nʼerĩũta obogo, omo rumaka nʼesyongubi.

¹⁵NʼAbayũda bosĩ mobatsema busana nʼerĩlahĩrya eryo; kusangwa mobalahĩrya omo mutima wabo gosĩ, nʼerimusonda-sonda nʼomũhwa gosĩ; naye mwabanika kubo. NʼOmwami Mukulu mwahabo erihumula oko mbande syosĩ.

¹⁶Kandi mwalũsya Maka nyĩnya wʼOmwami Asa siabye mwami-kalĩ kusangwa abya ĩnĩabĩrĩkokotya esanamu yʼesyonye busana na Asera; neryo Asa mwakondera esanamu yiwe yʼahisi mwatũndũlayo mo lũtũtũ, mwahĩsĩryayo oko kũsĩ kʼeKĩdũronĩ.

¹⁷Nĩkwa ahendata mohatalũsĩbwaho omo Baĩsraelĩ; nĩkwa omutima wa Asa abya ahĩkene ebiro biwe byosĩ.

¹⁸Neryo mwaleta omo nyũmba ya Nyamuhanga ebindu ebyo tata wuwe ahigula, nʼebyo ahigula, ebĩtsĩpa, nʼesyamagetsi, nʼesindi nyungu.

¹⁹Kandi mohataswabya amalwa erĩhĩka oko mwaka wʼamakũmĩ asatu nʼeyĩtanu wʼeritabala lya Asa.