Read nande 2 Emyatsi yʼEmigulu 16 Bible Online

2 Emyatsi yʼEmigulu 16 - nande bible

2 Emyatsi yʼEmigulu 16

¹Oko mwaka wʼamakũmĩ asatu na ndatu wʼeritabala lya Asa, omwami Basa wʼAbaĩsraelĩ mwahetuka eriyalwa na Yũda, neryo mwahĩmba eRama, iniatoka erĩkakĩrya obuli mundu erihuluka kutse eriingira ewʼomwami Asa wʼeYũda.

²Neryo Asa mwahũlũkya ebĩtsĩpa nʼesyamagetsi omo syombĩso syʼenyũmba yʼOmwami Mukulu nʼesyʼenyũmba yʼOmwami, mwatuma uku Benĩ-hadadĩ omwami wʼeSũrĩa, oyo wabya ĩkere eDamasekĩ, ati,

³Habye erisakana omo katĩkatĩ kage nawe, ngoko lyabya omo katĩkatĩ ka tata wage na tata wawe; lebaya, namakutumira ebĩtsĩpa nʼesyamagetsi; ugende ũtwe endagano yawe na Basa omwami wʼAbaĩsraelĩ, alũe kwĩngye.

⁴Neryo Benĩ-hadadĩ mwahulikirira omwami Asa, mwatuma abakulu bʼemilondo yiwe erilwa nʼemĩyĩ ya Ĩsraelĩ; nabo mobakĩnda eĨyonĩ, nʼeDanĩ, nʼeAbelĩ-maĩmũ, nʼemĩyĩ yosĩ yʼesyombĩso sya Nafũtalĩ.

⁵Neryo omugulu Basa owago, mwaleka erĩhĩmba eRama, mwaleka omũbĩrĩ wuwe.

⁶Neryo omwami Asa mwatwala Abayũda bosĩ; mobayaheka amabwe wʼeRama, nʼemiti yago, ebyo Basa ahĩmbamo; neryo mwahĩmba mubyo eGeba nʼeMĩsĩpa.

⁷Oko mugulu oyo, omũhanĩ Hananĩ mwahĩka oko mwami wʼAbayũda ye Asa, mwamubwira ati, Kusangwa wabiriyiketera omwami wʼeSũrĩa, isulitayiketera Omwami Mukulu Nyamuhanga wawe, busana nʼekĩ, omulondo wʼOmwami wʼeSũrĩa amabala erĩlũa omo byala byawe.

⁸Abanya Etĩopĩa nʼAbalũbĩmũ sibabya mulondo munene kutsibu, haguma nʼesyogalĩ, nʼabali oko syosabayĩrĩ bangi kutsibu kwehĩ? Nĩkwa, kusangwa wayiketera Omwami Mukulu, iye mwahĩrabo omo byala byawe.

⁹Kusangwa ameso wʼOmwami Mukulu akalaba-laba omo kihugo kyosĩ, erĩyĩkangya mo wʼamaka busana nʼabʼomutima ahĩkene kwiye. Ũmwʼekĩ wabirikola ebyʼobũkĩrũ; kusangwa erĩtsũka lino Wasyabya nʼamalwa.

¹⁰Neryo Asa mwahitana oko mũhanĩ, mwamũhĩra omo nyũmba yʼomũlĩkĩ; kusangwa abya amuhiteneko kutsibu busana nʼomwatsi oyũ. Kandi Asa mwanũbya abandi bandu oko mugulu oyo.

¹¹Neryo, lebaya, emĩbĩrĩ ya Asa, eyʼerĩmbere nʼeyʼerĩnyũma, lebaya ĩsakĩre omo kitabu kyʼabami bʼAbayũda nʼAbaĩsraelĩ.

¹²Nʼoko mwaka wʼamakũmĩ asatu nʼomwenda wʼobutabale buwe, Asa mwalwala omo bisando biwe; endwala yiwe moyabya nene kutsibu; nĩkwa omo ndwala yiwe mwatasonda-sonda Omwami Mukulu, nĩkwa mwasonda-sonda abakũmũ.

¹³Neryo Asa mweya abotata-kulu buwe, mwahola oko mwaka wʼamakũmĩ ani nʼomuguma wʼobutabale buwe.

¹⁴Mobamuta omo masinda wuwe ago ayibatsira omo mũyĩ wa Dawĩdĩ, mobamũgotserya omo ngotsero eyoswĩre nʼobuli mihanda yʼebikakumba ndeke ebyakokotĩbawa nʼamenge wʼabanyima-nyima, mobamũtwanira omuliro munene.