Read nande 2 Emyatsi yʼEmigulu 17 Bible Online

2 Emyatsi yʼEmigulu 17 - nande bible

2 Emyatsi yʼEmigulu 17

¹Na Yosafatĩ mugala wuwe mwabya mwami omo mwanya wuwe, neryo mwayĩsĩkya oko Baĩsraelĩ.

²Neryo mwahĩra emilondo yʼabasĩrĩkanĩ omo mĩyĩ yosĩ eyikongotere ya Yũda, kandi mwahĩra abateya omo kihugo kya Yũda, nʼomo mĩyĩ ya Efũraĩmũ eyo tata wuwe Asa anyega.

³NʼOmwami Mukulu mwabya haguma na Yosafatĩ, kusangwa mwalendera omo syonzira syʼerĩmbere sya tata-kulu wuwe Dawĩdĩ, mwatasondya Baalĩ,

⁴nĩkwa mwasonda-sonda Nyamuhanga wa tata wuwe, mwakwama ebihano biwe, mwatakola ngoko Baĩsraelĩ bakola.

⁵Busana nʼekyo, Omwami Mukulu mwasĩkya obwami omo byala biwe; nʼAbayũda bosĩ mobaleta omuhako uku Yosafatĩ; neryo mwabya nʼebindu nʼerĩsĩkya lĩnene.

⁶Nʼomutima wuwe mwayĩsyandira omo syonzira syʼOmwami Mukulu nʼakandi mwalũsya ahʼendata na Aserĩmũ e Yũda.

⁷Nʼoko mwaka wʼakasatu wʼobutabale buwe mwatuma abakulu buwe, ye Benĩ-haĩlĩ, na Obadĩa, na Zekarĩa, na Netanelĩ, na Mĩkaya, erĩkangĩrĩrya omo mĩyĩ yʼeYũda;

⁸na haguma nabo Abalawĩ, ye Semaya, na Netanĩa, na Zebadĩa, na Asahelĩ, na Semĩramotĩ, na Yonatana, na Adonĩa, na Tobĩa, na Tobadonĩa, Abalawĩ; na haguma nabo abahererĩ Elĩsama na Yehoramũ.

⁹Nabo mobakangĩrĩrya eYũda, ibanawite oko kitabu kyʼemigambo yʼOmwami Mukulu haguma nabo; mobalendera omo mĩyĩ yosĩ yʼeYũda, nʼerĩkangĩrĩrya omo katĩkatĩ kʼabandu.

¹⁰Nʼobuba bʼOmwami Mukulu mobwawa oko mami gosĩ wʼebihugo ebyabya bĩtĩmbĩre eYũda, kyaleka ibataswalwa na Yosafatĩ.

¹¹Nʼabandi bʼoko Bafĩlĩstĩnĩ mobaletera Yosafatĩ ebihembo, nʼebĩtsĩpa busana nʼomuhako; nʼAbanya Arabĩa mobamuletera ebihangulo, esyombangale elfu irinda nʼamagana alinda (7,700), nʼesyombaya elfu irinda nʼamagana alinda (7,700).

¹²Na Yosafatĩ obukulu buwe mobwakanya kutsibu; kandi mwahĩmba eYũda amanyũmba awakongotere nʼemĩyĩ yʼesyombĩso.

¹³Kandi abya awite bindu binene omo mĩyĩ yʼeYũda; nʼabandu bʼamalwa, esyombangĩ, eYerũsalema.

¹⁴Eyĩ ye miganzo yabo ngʼebĩtũnga byʼabotata wabo; eYũda, abakulu bʼamaelfu, Adĩna iyo mukulu, na haguma naye elfu magana asatu wʼesyombagĩ (300,000);

¹⁵nʼoyũmũkwamĩre ye Yehonanĩ omukulu, na haguma naye elfu magana abiri nʼamakũmĩ munani (280,000);

¹⁶nʼenyũma kwiye Amasĩa mugala wa Zĩkĩrĩ, oyo wayiha nʼomutima gosĩ oko Mwami Mukulu; na haguma naye esyombangĩ elfu magana abiri (200,000);

¹⁷NʼAbabenyamĩna; Elĩada yo mbangĩ, na haguma naye elfu magana abiri (200,000) abahekĩre amata nʼesyongabo;

¹⁸nʼenyũma wuwe ye Yehozabadĩ, na haguma naye elfu erĩgana nʼamakũmĩ munani (180,000) abasĩkĩre erilwa.

¹⁹Aba bo bakolera omwami, bate oko abo mwami ahĩra omo mĩyĩ ikongotere eYũda hosĩ.