Read nande 2 Emyatsi yʼEmigulu 18 Bible Online

2 Emyatsi yʼEmigulu 18 - nande bible

2 Emyatsi yʼEmigulu 18

¹Neryo Yosafatĩ mwabya nʼebindu nʼerĩsĩkĩbwa lĩnene; neryo mwasakana na Ahabũ.

²Neryo enyũma wʼeyindi myaka mwandagalira eSamarĩa eriyabana Ahabũ. Na Ahabũ mwamukerera esyombũlĩ nʼesyonde nyingi busana nʼabandu ababya haguma naye, neryo mwamũtsotsererya erihetuka haguma naye eRamotĩ-gileadĩ.

³Neryo Ahabũ omwami wʼAbaĩsraelĩ mwabwira Yosafatĩ omwami wʼAbayũda ati, Wanganagenda haguma nage eRamotĩ-gĩleadĩ kwehĩ? Naye mwamũsũ; bĩrya ati, Ĩngye indi nga we, nʼabandu bage ngʼabandu bawe; netu tukandibya haguma nawe omo malwa.

⁴Na Yosafatĩ mwabwira omwami wʼAbaĩsraelĩ ati, Ngakũbũlaya Ũtsũke erĩbũlya mũnabwĩre, busana nʼekĩnywa kyʼOmwami Mukulu.

⁵Neryo omwami wʼAbaĩsraelĩ mwahĩndanĩa abamĩnyererĩ, abandu magana ani, neryo mwabũlyabo, ati, Tugende eriyalwa eRamotĩ-gĩleadĩ, kutse sinyigende kwehĩ? Nabo mobabũga bati, Hetuka; kusangwa Nyamuhanga akandĩsyahĩrago omo byala byʼOmwami.

⁶Nĩkwa Yosafatĩ mwabũga ati, Hano sihali gundi mũmĩnyererĩ wʼOmwami Mukulu, itwatoka nʼerĩmũbũlya kwehĩ?

⁷Nʼomwami wʼAbaĩsraelĩ mwabwira Yosafatĩ ati, Hakine mundu muguma oyo wangatũbũlĩrya Omwami Mukulu, nĩkwa nyĩmũkwĩre obusu; kusangwa na kera sialiminyerera ebibuya busana nage, nĩkwa enabi ebiro byosĩ; naye nĩ Mĩkaya mugala wa Ĩmũla. Na Yosafatĩ mwabũga ati, Omwami sĩabũge ekyo.

⁸Neryo omwami wʼAbaĩsraelĩ mwabirikira omukulu muguma mwamubwira ati, Wende Mĩkaya mugala wa Ĩmũla yo lũba.

⁹Neryo omwami wʼAbaĩsraelĩ na Yosafatĩ omwami wʼAbayũda babya bĩkere obuli mundu oko kĩtũmbĩ kiwe kyʼobwami, ibambite esyoropo syabo, neryo babya bĩkere omo kibuga kyʼerĩhũmbĩramo aho bakingirira omo lũkyo lwʼeSamarĩa; nʼabamĩnyererĩ bosĩ babya bakaminyerera embere syabo.

¹⁰Na Zedekĩa mugala wa Kenana mwayĩkokoterya amahembe wʼekyuma, neryo mwabũga ati, Omwami Mukulu amabũga ati, Umwʼaya Wasyatũnda Abasũrĩa, erĩhĩka aho basyahwerekerera.

¹¹Nʼabamĩnyererĩ bosĩ mobaminyerera batya, bati, Uhetukire eRamotĩgĩleadĩ, ũkĩnde; kusangwa Omwami Mukulu asyahĩrago omo byala byʼOmwami.

¹²Nʼomukwenda oyo wayabirikira Mĩkaya mwamubwira ati, Lebaya ebĩnywa byʼabamĩnyererĩ bĩkabũga biguma-guma ebibuya busana nʼomwami; neryo kĩsĩ-kĩsĩ ekĩnywa kyawe kibye ngʼekyabo, ũbũge kibuya.

¹³Na Mĩkaya mwabũga ati, Ngoko Mwami Mukulu aliho ekyo Nyamuhanga wage akabũga, kye nʼekyo nasyabũga.

¹⁴Nʼomugulu ahĩka ahali omwami, omwami mwamũbũlya ati, Mĩkaya, tuyalwe nʼeRamotĩ-gĩleadĩ, kutse nyũmbaye kwehĩ? Naye mwabũga ati, Muhetuke mũsĩngane; nabo basyahĩrwa omo byala byenyũ.

¹⁵Nʼomwami mwamubwira ati, Engendo singahi nasyakũlahĩrĩrya kwehĩ? Nyiti sumbwire nʼekiguma ekite kyʼekwenene omo lĩna lyʼOmwami Mukulu.

¹⁶Naye mwabũga ati, Monalangira Abaĩsraelĩ bosĩ ibapanzikene omo bitwa, ngʼesyombũlĩ esitawite mũlĩsya; neryo Omwami Mukulu mwabũga ati, Esĩ sisiwite mukama; basube obuli mundu omo nyũmba yiwe omo buholo.

¹⁷Nʼomwami wʼAbaĩsraelĩ mwabwira Yosafatĩ ati, Mondakubwira nyiti siendisyaminyerera ebibuya busana nage, bye nʼebibi kwehĩ?

¹⁸Na Mĩkaya mwabũga ati, Neryo muhulikirire ekĩnywa kyʼOmwami Mukulu; monalangira Omwami Mukulu ĩnĩanĩkere oko kĩtũmbi kiwe kyʼobwami, nʼomulondo gosĩ wʼelubula ibanimene oko byala biwe byʼamali nʼebyʼamalembe.

¹⁹Neryo Omwami Mukulu mwabũga ati, Nindi wasyateba Ahabũ omwami wʼAbaĩsraelĩ, iniatoka erihetuka nʼerĩyakwĩra eRamotĩ-gĩleadĩ kwehĩ? Neryo omuguma mwabũga gundi mũsindo nʼogundi gundi mũsĩndo.

²⁰Neryo ekĩrĩmũ kiguma mokyahuluka embere syʼOmwami Mukulu, kiti, Nasyamuteba. Neryo Omwami Mukulu mwabũlyakyo ati, Wasyamuteba ũmũkĩ kwehĩ?

²¹Nakyo mokyabũga kiti, Nasyagenda nʼeribya kĩrĩmũ kyʼeribiha omo muno wʼabamĩnyererĩ buwe bosĩ. Naye mwabũga ati, Wasyamuteba, nʼerĩsĩngana nibya; ugende, Ukole utya.

²²Neryo lino, lebaya, Omwami Mukulu abĩrĩhĩra ekĩrĩmũ kyʼeribiha omo muno wʼabamĩnyererĩ bawe aba; kusangwa Omwami Mukulu abĩrĩbũga obũlĩge busana nawe.

²³Neryo Zedekĩa mugala wa Kenana mwahĩka hakũhĩ, mwaswĩrya Mĩkaya yʼerĩkofi, okwʼĩtema, ati, Omũlĩmũ wa Nyamuhanga mwakalaba omo nzira yahi akanyĩlũako nʼerĩbũga nawe kwehĩ?

²⁴Na Mĩkaya mwabũga ati, Lebaya, wasyalangira oko kiro ekyo, omugulu wasyingira omo kisenge kyʼomwisi erĩyĩbĩsa.

²⁵Nʼomwami wʼAbaĩsraelĩ mwabũga ati, Mwĩmaye Mĩkaya, mũmũsũbaye uku Amonĩ omukulu wʼomũyĩ nʼuku Yoasĩ mugala wʼOmwami;

²⁶mũbũge muti, Omwami ati, Mũhĩre omundu oyũ omo mũlĩkĩ, mũmũlĩsaye akalyo kʼobuligo, nʼamagetsi wʼobuligo, erĩhĩka aho nasyasubulira buholo.

²⁷Na Mĩkaya mwabũga ati, Wamasubula nʼobuholo kwenene, Omwami Mukulu ĩsĩalĩtabũga ũmwʼĩngye. Naye mwabũga ati, Ĩnywe bandu bosĩ, mowe.

²⁸Neryo omwami wʼAbaĩsraelĩ na Yosafatĩ omwami wʼAbayũda mobahetukira eRamotĩ-gĩleadĩ.

²⁹Nʼomwami wʼAbaĩsraelĩ mwabwira Yosafatĩ ati, Ngandiyihindula, nʼeriyalwa; nĩkwa uwe wambale esyoropo syawe. Neryo omwami wʼAbaĩsraelĩ mwayihindula; neryo mobaya omo malwa.

³⁰Neryo omwami wʼeSũrĩa abya iniabirihana abakulu bʼesyogalĩ siwe ati, Simulwe nʼomuke-muke kutse mukulu, yo nʼomwami wʼAbaĩsraelĩ ĩyowene.

³¹Neryo, omugulu abakulu bʼesyogalĩ balangira Yosafatĩ, mobabũga bati, Omwami wʼAbaĩsraelĩ yoyũ. Neryo mobabinduka bati bakalwa naye; nĩkwa Yosafatĩ mwalaka, nʼOmwami Mukulu mwamũwatĩkya; na Nyamuhanga mwatwalabo ehandi.

³²Neryo omugulu abakulu bʼesyogalĩ balangira ngoko ate iyo mwami wʼAbaĩsraelĩ mobataswamukwama.

³³Nʼomundu muguma mwakula obuta buwe mwabũlĩkĩra mwalasa omwami wʼAbaĩsraelĩ omo katĩkatĩ kʼamalungo wʼebyambalo biwe byʼamalwa; kyaleka iniabwira omũgendya wʼegalĩ ati, Ubindule ebyala byawe, unyiheke nyĩlũe omo mulondo; kusangwa namahutala kutsibu.

³⁴Nʼamalwa mwakanya ekiro ekyo; nĩkwa omwami wʼAbaĩsraelĩ mwayegemerya omo galĩ yiwe erilwa nʼAbasũrĩa erĩhĩka omwʼĩgolo; neryo mwahola omo malengera.