Read nande 2 Emyatsi yʼEmigulu 19 Bible Online

2 Emyatsi yʼEmigulu 19 - nande bible

2 Emyatsi yʼEmigulu 19

¹Neryo omwami Yosafatĩ mwasuba omo nyũmba yiwe eYerũsalema mo buholo.

²Na Yehũ mugala wa Hananĩ omũhanĩ mwayahĩndana naye, mwabwira omwami Yosafatĩ ati, Linakutolere erĩwatĩkya ababi, nʼerianza abakakwa Omwami Mukulu yʼobusu kwehĩ? Busana nʼomwatsi oyũ, erihitana liri ukʼuwe erĩkalũa oko Mwami Mukulu.

³Nĩkwa umʼuwe hanabanĩkĩre ebibuya, kusangwa wabĩrĩlũsya esyosanamu sya Asera omo kihugo, kandi wabĩrĩhĩra omutima wawe erisonda-sonda Nyamuhanga.

⁴Na Yosafatĩ mwĩkala eYerũsalema; mwalendera omo katĩkatĩ kʼabandu erĩtsũka eBerĩ-seba erĩhĩka omo kihugo kyʼebitwa kya Efũraĩmũ, kandi mwasũbyabo oko Mwami Mukulu, Nyamuhanga wʼabotata-kulu wabo.

⁵Neryo mwahĩra abatswerĩ omo kihugo, omo mĩyĩ yosĩ eyikongotere ya Yũda, oko mũyĩ nʼoko mũyĩ,

⁶mwabwira abatswerĩ abo ati, Mũlebaye ndeke ebyo mukakola; kusangwa simulitswera busana nʼabandu nĩkwa busana nʼOmwami Mukulu; naye ali haguma nenyũ omwʼitswera eryo.

⁷Neryo lino obuba bwʼomwami Mukulu bubye nenyũ; mũyĩtegaye mukolekyo; kusangwa sihali kibi haguma nʼOmwami Mukulu Nyamuhanga wetu, kutse ebitaga, kutse erĩĩmya ekyũtũlĩro.

⁸Kandi eYerũsalema Yosafatĩ mwahĩra Abalawĩ nʼabahererĩ, nʼabakulu bʼebĩtũnga byʼabotata ebya Ĩsraelĩ, busana nʼeritswera lyʼOmwami Mukulu, na busana nʼeritswera amahaka omo syondũlanĩ syʼeYerũsalema.

⁹Neryo mwahanabo ati, Ko mwasyakola mutya omwʼeriubaha lyʼOmwami Mukulu, obutalegula, nʼomo mutima gosĩ.

¹⁰Nʼomugulu obuhaka bũkabahĩkako bũkalũa oko bagala benyũ abĩkere omo mĩyĩ yabo, erĩlwĩsĩsanĩa omusasi nʼomusasi, nʼomo katĩkatĩ kʼemigambo nʼebihano, nʼemigambo nʼebilayiro, mwasyasagĩsyabo, Sibabye ko lubanza embere syʼOmwami Mukulu, neryo erihitana lĩkasyabahĩkako nʼoko bagala benyũ, mukole mutya, neryo simwendisyabya ko lubanza.

¹¹Neryo, lebaya, Amarĩa omũhererĩ mukulu asyabya mukulu wenyũ omo myatsi yosĩ yʼOmwami Mukulu; na Zebadĩa mugala wa Ĩsĩmaelĩ omũtabalĩ wʼekĩtũnga kya Yũda, omo myatsi yosĩ yʼOmwami. Nibya, Abalawĩ basyabya bakulu embere syenyũ. Mubye nʼamaka mukole. NʼOmwami Mukulu abye nʼabatunganene.