Read nande 2 Emyatsi yʼEmigulu 2 Bible Online

2 Emyatsi yʼEmigulu 2 - nande bible

2 Emyatsi yʼEmigulu 2

¹Neryo Solomono mwakandayirira erĩhĩmba enyũmba busana nʼerĩna lyʼOmwami Mukulu, nʼenyũmba busana nʼobwami buwe.

²Neryo Solomono mwaganza abandu elfu makũmĩ alinda (70,000) busana nʼeriheka emiheke, nʼabandu elfu makũmĩ munani (80,000) ababya babatsĩ omo bitwa, nʼeelfu ĩsatu nʼamagana ndatu (3,600) eribya bahanganĩrĩ babo.

³Na Solomono mwatumira uku Hĩramũ omwami wʼeTĩro, ati, Ngoko wakolera tata wage Dawĩdĩ, nʼerimutumira emĩerezĩ eyʼerĩmũhĩmbĩra enyũmba yʼerĩĩkalamo, nage kʼunyikole utya.

⁴Lebaya, nyĩkĩsĩya ĩnahĩmba enyũmba busana nʼerĩna lyʼOmwami Mukulu Nyamuhanga wage, erimuhigulirayo, nʼerĩhĩsya embere siwe obukwa bwʼebikakumba ndeke, na busana nʼamandu wʼerĩkanganĩa emigulu yosĩ, na busana nʼobuhere bwʼerĩokererya omo tũtũtũ nʼomwʼĩgolo, nʼoko syoSabato, nʼoko mikera mihya-mihya, nʼoko biro bikulu ebyahamulawa byʼOmwami Mukulu Nyamuhanga wetu. Ekĩ ni kilayiro kya kera na kera busana nʼAbaĩsraelĩ.

⁵Nʼenyũmba eyo ngahĩmba yasyabya yingaha; kusangwa Nyamuhanga wetu ni mukulu kwilaba esyonyamuhanga syosĩ.

⁶Nĩkwa nindi wangatoka erĩmũhĩmbĩra enyũmba kwehĩ, kusangwa olubula nʼekyanya kyʼebyanya sĩbĩmũhĩkene. Nage Ĩngyendi, uti nangamũhĩmbĩra enyũmba kwehĩ, lye nʼerĩhĩsya obukwa embere siwe.

⁷Neryo lino Unyitumire omundu munyima-nyima wʼomũbĩrĩ wʼesyamagetsi nʼekĩtsĩpa nʼomulinga, nʼebyuma, nʼomo syongimba syʼomunyama, nʼesyʼengula, nʼesyʼomũnĩkĩ, oyo wasĩ erinyora emihanda yosĩ yʼeribatsa, erikola haguma nʼabandu banyima-nyima abo ngwite eYũda nʼeYerũsalema, abo tata wage Dawĩdĩ abana.

⁸Unyitumire emiti yʼemĩerezĩ nibya, nʼemiti yʼekĩlagũ, nʼemiti yʼomũsandalĩ, eyĩkalũa eLebanonĩ; kusangwa nyĩnasĩ abagombe bawe ko basĩ eribatsa emiti yʼeLebanonĩ. Neryo kwenene, abagombe bage basyabya nʼabagombe bawe,

⁹erĩnyĩkokoterya emiti mingi; kusangwa enyũmba eyo ngandĩhĩmba ikandisyabya nene nʼeyʼeriswekerwa.

¹⁰Neryo lebaya, nasyaha abagombe bawe, ababatsĩ abakakonda emiti, esyondengĩ syʼengano eyĩhũmbĩre elfu makũmĩ abiri (20,000), nʼesyondengĩ elfu makũmĩ abiri (20,000) syʼekisusu, nʼamalega wʼebĩnyũ elfu makũmĩ abiri (20,000), nʼamalega wʼamagũta elfu makũmĩ abiri (20,000).

¹¹Neryo Hĩramũ omwami wʼeTĩro mwasũbĩrya omo barua eyo atumira Solomono ati, Kusangwa Omwami Mukulu anzĩre abandu buwe, abirikuyira mo mwami wabo.

¹²Kandi Hĩramũ mwabũga ati, Omwami Mukulu, Nyamuhanga wa Ĩsraelĩ, apipawe, oyo wahangika olubula nʼekitaka, oyo waha omwami Dawĩdĩ omugala wʼamenge, oyuwite eriyilandako, nʼeriminya oyo wasyahĩmba enyũmba busana nʼOmwami Mukulu, nʼenyũmba busana nʼobwami buwe.

¹³Na lino nabirikutumira omundu munyima-nyima, iniawite amenge, ye Hĩramũ-abĩ,

¹⁴mugala wʼomũkalĩ wʼabali ba Danĩ; na tata wuwe abya mundu wʼeTĩro, omunyima-nyima omo mũbĩrĩ wʼesyamagetsi, nʼowʼebĩtsĩpa, nʼowʼebyuma, nʼowʼamabwe, nʼowʼemiti, nʼowʼesyongimba syʼomunyama, nʼesyʼomũnĩkĩ, nʼesyʼekĩtanĩ kĩbũyahĩre, nʼesyʼengula, kandi nʼeribatsa emihanda yosĩ yʼeribatsa, nʼerĩkokotya emĩsĩndo yosĩ yʼerĩtegekanĩa, eryo akahabawa, erikola haguma nʼabandu banyima-nyima bawe, na haguma nʼabandu banyima-nyima bʼomukama wage Dawĩdĩ tata wawe.

¹⁵Neryo lino, omukama wage, atumire abagombe buwe engano eyo, nʼekisusu, nʼamagũta nʼebĩnyũ, ebyo mukama wage ahula.

¹⁶Netu tukandikonda emiti eLebanonĩ yosĩ eyo uli nayo bwaga; tukandisyaletayo ĩyĩbohĩre haguma oko ngetsi erĩkolyayo eYofa; nawe iwatoka eritwalayo eYerũsalema.

¹⁷Neryo Solomono mwaganza ababunga bosĩ ababya omo kihugo kya Ĩsraelĩ, ngʼemiganzo eyo tata wuwe Dawĩdĩ aganza; nabo mobabanika elfu ĩgana nʼamakũmĩ atanu nʼĩsatu nʼamagana ndatu (153,600).

¹⁸Neryo mwahĩra elfu makũmĩ alinda (70,000) ba kubo eriheka emiheke, nʼeelfu makũmĩ munani (80,000) babye babatsĩ omo bitwa, nʼeelfu ĩsatu nʼamagana ndatu (3,600) babye bahanganĩrĩ erĩhĩra abandu oko mũbĩrĩ.