Read nande 2 Emyatsi yʼEmigulu 20 Bible Online

2 Emyatsi yʼEmigulu 20 - nande bible

2 Emyatsi yʼEmigulu 20

¹Neryo enyũma wʼemyatsi eyĩ, abana ba Moabũ, nʼabana ba Amonĩ, nʼabandi bʼoko Baamonĩ, mobahĩka erilwa na Yosafatĩ.

²Neryo abandi mobasa eribwira Yosafatĩ bati, Endeko nene ĩkalũa eSũrĩa eyisirya oko ngetsi, ĩkahĩka erilwa nawe; neryo lebaya, abali eHazazonĩ-tamarĩ eyo ni Engedĩ.

³Na Yosafatĩ mubaha, mwayĩhĩra okwʼisonda-sonda Omwami Mukulu; neryo mwahamula ati batsire erirya akalyo eYũda hosĩ.

⁴Neryo Abayũda mobayĩhĩndanĩa abosĩ erĩsondya erĩwatĩkya lyʼOmwami Mukulu, mobalũa omo mĩyĩ yosĩ ya Yũda erisonda-sonda Omwami Mukulu.

⁵Neryo Yosafatĩ mwahangana omo ndeko ya Yũda nʼeyeYerũsalema, omo nyũmba yʼOmwami Mukulu, embere wʼekibuga kihya-kihya;

⁶Neryo mwabũga ati, Uwe Mwami Mukulu, Nyamuhanga wʼabotata-kulu betu, suli Nyamuhanga omo lubula kwehĩ? Kandi suli mũtabalĩ oko mami gosĩ wʼebihanda kwehĩ? Nʼomo byala byawe muli Obũtokĩ nʼamaka, isihali oyo wangatoka erihangana erilwa nawe.

⁷Uwe Nyamuhanga wetu, uwe utahiga esyondũlanĩ syʼekihugo ekĩ embere syʼabandu bawe Ĩsraelĩ kwehĩ, nʼerihakyo kera na kera oko bana bʼomwĩra wawe Abrahamũ kwehĩ?

⁸Nabo mobĩkala mukyo, mobakũhĩmbĩra mukyo mwʼahabũyĩrĩre busana nʼerĩna lyawe, bati,

⁹Ekitsibu kyamatũhĩkako, omũyalĩ, nʼeritswera, kutse obũkonĩ bwʼakasũsũ, kutse enzala, twasyahangana embere wʼenyũmba eyĩ nʼembere syawe kusangwa erĩna lyawe liri omo nyũmba eyĩ, nʼerikulakira omo malĩge wetu, nawe wasyowa nʼerĩlamya.

¹⁰Na lino, lebaya, abana bʼeAmonĩ nʼeMoabũ nʼabʼekitwa kyʼeSeĩrĩ, abo wakaga Ĩsraelĩ erĩyahũnga omugulu balũa omo kihugo kyʼeMĩsĩrĩ, nĩkwa mobakitira hali kubo, mobataheryabo;

¹¹lebaya, ngoko bakatuliha, eriasa nʼerĩtũlũsya omo kihugo kyawe ekyo watuha omo ndagano.

¹²Uwe Nyamuhanga wetu, siwenditswerabo kwehĩ? Kusangwa situwite maka oko ndeko nene eyĩ abakasyalwa netu; kutse Sĩtwasĩ ekyo twangakola; nĩkwa ameso wetu ali ukʼuwe.

¹³NʼAbayũda bosĩ mobahangana embere syʼOmwami Mukulu, haguma nʼesyomekeke syabo, nʼabakalĩ babo, nʼabana babo.

¹⁴Neryo Omũlĩmũ wʼOmwami Mukulu mwahĩka uku Yahazĩelĩ mugala wa Zekarĩa, mugala wa Benaya, mugala wa Yeĩelĩ, mugala wa Matanĩa, Omũlawĩ, wʼabagala ba Asafũ omo katĩkatĩ kʼendeko;

¹⁵Neryo Yahazĩelĩ mwabũga ati, ĩnywe Bayũda bosĩ, muhulikirire, nenyũ, ĩnywe ndũlanĩ syʼeYerũsalema, nawe mwami Yosafatĩ: Omwami Mukulu akababwira ati, Simubahe, sĩmũhangahangaye busana nʼendeko nene eyĩ; kusangwa amalwa sĩ wenyũ, nĩkwa ni wa Nyamuhanga.

¹⁶Omo ngyakya mwandagalire kubo; lebaya, bakahetukira omo bwiruka bwʼeZĩze; nenyũ mwasyeyabo oko ndũlĩ yʼomusya, embere wʼembwarara yʼeYerũelĩ.

¹⁷Ĩnywe simwendisyalwa omo malwa aya; muyiteke, muhangane, mulangire erĩlamya lyʼOmwami Mukulu eriri haguma nenyũ, ĩnywe Bayũda nʼAbanya Yerũsalema; simubahe, kutse erĩhanga-hangya; omo ngyakya muhuluke kubo; kusangwa Omwami Mukulu ali haguma nenyũ.

¹⁸Na Yosafatĩ mũnamya omutwe nʼerĩtũlama ahisi; nʼAbayũda bosĩ nʼesyondũlanĩ syʼeYerũsalema mobawa ahisi embere syʼOmwami Mukulu, nʼerĩramya Omwami Mukulu.

¹⁹NʼAbalawĩ abʼoko bana bʼAbakohatĩ nʼabʼoko bana bʼAbakoratĩ mobahangana eripipa Omwami Mukulu, Nyamuhanga wa Ĩsraelĩ omo mulenge munene kutsibu.

²⁰Nʼengyakya-ngyaka mobahangana nʼeriya omo mbwarara yʼeTekoa; nabo babere bakahuluka, Yosafatĩ mwahangana mwabũga ati, Uwe Yũda nʼesyondũlanĩ syʼeYerũsalema munyihulikirire; mwĩkĩrĩraye Omwami Mukulu Nyamuhanga wenyũ, ko mwasyahanganĩbwa mutya. Mwĩkĩrĩraye abamĩnyererĩ buwe, neryo mwasyabana erĩsĩngana.

²¹Neryo abere abĩkanĩa nʼabandu, mwahamulabo eriimbira Omwami Mukulu, nʼeriha eripipa omo bibuya byʼerĩbũyĩrĩre, nʼomugulu bakahuluka embere wʼomulondo babũge bati, Muhe Omwami Mukulu ewasĩngya; kusangwa obubuya buwe bʼolwanzo ni bwa kera na kera.

²²Nʼomugulu batsũka eriimba nʼeripipa, Omwami Mukulu mwahĩra abalĩmbya erilwa nʼabana ba Amonĩ, na Moabũ, nʼabʼekitwa kyʼeSeĩrĩ abasyalwa na Yũda; nabo mobakĩndwa.

²³Kusangwa abana ba Amonĩ na Moabũ mobahangana erilwa nʼesyondũlanĩ syʼekitwa kyʼeSeĩrĩ, erĩĩtabo kutsibu nʼerĩheryabo; babere babuga erĩherya esyondũlanĩ syʼeSeĩrĩ, mobabindukirana obuli mundu erĩĩta mũlĩkyabo.

²⁴Nʼomugulu Abayũda bahĩka oko nyũmba eyo eyĩsũngũlĩkĩre yʼerĩteya yʼembwarara, mobalolya ameso gʼoko ndeko; neryo, lebaya, ibabiribya bĩnda ibabiriwa oko kitaka, isihali nʼomuguma oyo wabala.

²⁵Neryo omugulu Yosafatĩ nʼabandu buwe bahĩka eriheka ebinyegwa byabo, mobabana omo katĩkatĩ kabo ebindu binene, esyongimba, nʼebindu byʼobũgũlĩ bunene, ebyo bĩmaya, ebingi kwilaba ebyo bangatoka eriheka. Mobasibaho biro bisatu bakahũnga ebindu kusangwa byabya bingi.

²⁶Nʼoko kiro kyʼebini mobayĩhĩndanĩa omo musya wʼeBaraka; kusangwa eyo mobapipa Omwami Mukulu; busana nʼekyo erĩna lyaho molyahulwa mo Musya wa Baraka erĩhĩka na mũnabwĩre.

²⁷Neryo mobasubula obuli mundu wʼe Yũda nʼowʼeYerũsalema, na Yosafatĩ embere syabo, erisuba eYerũsalema nʼobutseme; kusangwa Omwami Mukulu mwatsemesyabo busana nʼesyonzĩgũ syabo.

²⁸Neryo mobahĩka eYerũsalema nʼesyonanga, nʼesyonzenze, nʼesyongubi erĩhĩka oko nyũmba yʼOmwami Mukulu.

²⁹Nʼeriubaha lya Nyamuhanga molyabya oko mami gosĩ wʼebihugo omugulu bowa ngoko Mwami Mukulu alwa nʼesyonzĩgũ sya Ĩsraelĩ.

³⁰Neryo obwami bwa Yosafatĩ mobwatũlera; kusangwa Nyamuhanga wuwe mwamuha erĩtũlera oko mbande syosĩ.

³¹Neryo Yosafatĩ mwatabala oko Yũda; abya wʼemyaka makũmĩ asatu nʼeyĩtanu omugulu atsũka eritabala; neryo mwatabala eYerũsalema emyaka makũmĩ abiri nʼeyĩtanu; nʼerĩna lya koyo wuwe lyabya Azũba mwali wa Sĩlĩhĩ.

³²Neryo mwalendera omo nzira ya tata wuwe Asa, mwatakita kuyo, nʼerikola ekyabya kitunganene omo meso wʼOmwami Mukulu.

³³Nĩkwa ahendata mohatalũsĩbwa; kutse abandu ĩsĩbebahĩra emitima yabo uku Nyamuhanga wʼabotata wabo.

³⁴Neryo eyindi mĩbĩrĩ ya Yosafatĩ, eyʼerĩmbere nʼeyʼenyũma, lebaya ĩsakĩre omo bĩnywa bya Yehũ mugala wa Hananĩ oyukahulawa omo kitabu kyʼabami ba Ĩsraelĩ.

³⁵Nʼenyũma wʼemyatsi eyĩ, Yosafatĩ omwami wʼAbayũda mwasakana na Ahazĩa omwami wʼAbaĩsraelĩ, Yosafatĩ mwakola nabi erikola atya.

³⁶Mwasakana naye erĩkokotya amato wʼeriya eTarsĩsĩ; mobabatsira amato ayo eEzĩonĩ-geberĩ.

³⁷Oko mugulu oyo, Elĩezerĩ mugala wa Dodavahũ wʼeMaresa mwaminyerera busana na Yosafatĩ ati, Kusangwa wabirisakana na Ahazĩa, Omwami Mukulu abĩrĩherya emĩbĩrĩ yawe. Nʼamato ayo mwatulangika, mwatatoka eriya eTarsĩsĩ.