Read nande 2 Emyatsi yʼEmigulu 21 Bible Online

2 Emyatsi yʼEmigulu 21 - nande bible

2 Emyatsi yʼEmigulu 21

¹Na Yosafatĩ mweya abotata-kulu buwe, mwatabwa ahali abotata wuwe omo mũyĩ wa Dawĩdĩ; na Yoramũ mugala wuwe mwabya mwami omo mwanya wuwe.

²Kandi abya nʼabagala babo ye Azaria, na Mĩkaelĩ, na Sefatĩa; abosĩ aba babya bagala ba Yosafatĩ omwami wʼAbaĩsraelĩ.

³Na tata wabo mwahabo ebihembo binene, byʼebĩtsĩpa, nʼebyʼesyamagetsi, nʼebyʼebindu byʼobũgũlĩ bunene, haguma nʼemĩyĩ eyikongotere yʼeYũda; nĩkwa mwaha Yoramũ yʼobwami, kusangwa abya kambere.

⁴Neryo omugulu Yoramũ atabala omo mwanya wa tata wuwe, nʼerĩyĩsĩkya, neryo mwĩta abagala babo bosĩ omo mũyalĩ, nʼabandi bʼoko bakulu ba Ĩsraelĩ nibya.

⁵Yoramũ abya wʼemyaka makũmĩ asatu nʼeyĩbĩrĩ omugulu atsũka eritabala; neryo mwatabala emyaka munani eYerũsalema.

⁶Mwagendera omo nzira yʼabami ba Ĩsraelĩ, ngoko ekĩtũnga kya Ahabũ kyakola; kusangwa mwahĩkya mwali wa Ahabũ; mwakola ekyabya kibi omo meso wʼOmwami Mukulu.

⁷Nĩkwa Omwami Mukulu mwatanza erĩherya ekĩtũnga kya Dawĩdĩ, busana nʼendagano eyo ayira na Dawĩdĩ, ngoko alaga erimuha nʼabana buwe eritabala kera na kera.

⁸Omo biro biwe, Edomũ mobayisamambula erĩlũa omo bũtabalĩ bwa Yũda, mobayĩhanganĩrya omwami busana nabo.

⁹Neryo Yoramũ mwasokerayo nʼabakulu buwe, haguma nʼesyogalĩ siwe syosĩ Neryo mwahangana omo kiro, mwĩta Abaedomũ abamũtĩmbako nʼabakulu bʼesyogalĩ siwe.

¹⁰Neryo Edomũ kwʼayisamambula atya erĩlũa omo byala bya Yũda nʼerĩhĩka mũnabwĩre; nʼoko mugulu oyo Lĩbũna mwayisamambula erĩlũa omo byala biwe, kusangwa abya ĩnĩabĩrĩsĩganĩa Omwami Mukulu, Nyamuhanga wʼabotata-kulu buwe.

¹¹Kandi mwakokotya ahendata omo bitwa byʼeYũda, mwaleka esyondũlanĩ syʼeYerũsalema isyakwama oluteto, nʼerĩtalya Abayũda.

¹²Neryo ebarua yʼomũmĩnyererĩ Elĩa moyamũhĩkako iti, Omwami Mukulu, Nyamuhanga wa Dawĩdĩ tata wawe akabũga atĩ, Kusangwa sulitalendera omo syonzira sya tata wawe Yosafatĩ kutse omo syonzira sya Asa omwami wʼAbayũda,

¹³nĩkwa wabirigendera omo nzira yʼabami ba Ĩsraelĩ, nʼerireka Yũda nʼesyondũlanĩ syʼeYerũsalema ibakwama oluteto, ngoko ekĩtũnga kya Ahabũ kyakola, kandi wabĩrĩta abagala benyũ abʼekĩtũnga kya tata wawe, ababya babuya kwilaba we,

¹⁴lebaya Omwami Mukulu asyĩta abandu bawe omo kĩhũnzo kinene, nʼabana bawe, nʼabaklĩ bawe, nʼobũsokĩ bwawe bosĩ;

¹⁵nawe, wasyakwa endwala nene yʼamala wawe, nʼamala wawe asyalũamo busana nʼendwala eyʼekiro nʼekiro.

¹⁶Neryo Omwami Mukulu mwatsũmbũkya emitima yʼAbafĩlĩstĩnĩ, nʼAbaarabu, abali hakũhĩ nʼomutano wʼAbaetĩopĩa erilwa na Yoramũ.

¹⁷Mobahetuka erilwa na Yũda, mobingira mugo mo kinya-maka, mobaheka ebindu byosĩ ebyabanika omo nyũmba yʼOmwami, nʼabagala buwe, nʼabakalĩ buwe, mobatamũsĩgĩra mugala nʼomuguma, nina Yoahazĩ ĩyowene, yo mulere wʼoko bagala buwe.

¹⁸Nʼenyũma Wʼebyosĩ ebĩ, Omwami Mukulu mwamũswĩrya omo mala wuwe nʼendwala eyitetoka erilama.

¹⁹Neryo enyũma wʼebindi biro, enyũma wʼemyaka ĩbĩrĩ, amala wuwe mwalũamo busana nʼerilwala liwe, neryo mwahola omo syondwala nyibi. Nʼabandu buwe mobatamũhĩsĩrya, ngʼerĩhĩsĩrya lyʼabotata-kulu buwe.

²⁰Abya wʼemyaka makũmĩ asatu nʼeyĩbĩrĩ omugulu atsũka eritabala, neryo mwatabala eYerũsalema emyaka munani; mwahola ĩsĩanzĩrwe; neryo mobamuta omo mũyĩ wa Dawĩdĩ, nĩkwa butsira omo masinda wʼabami.