Read nande 2 Emyatsi yʼEmigulu 22 Bible Online

2 Emyatsi yʼEmigulu 22 - nande bible

2 Emyatsi yʼEmigulu 22

¹Nʼesyondũlanĩ syʼeYerũsalema mobahanganĩa Ahazĩa mugala wuwe mulere mo mwami omo mwanya wuwe; kusangwa omulondo wʼabandu abasa haguma nʼAbaarabu ĩbabĩrĩta abakulu buwe bosĩ. Neryo Ahazĩa mugala wa Yoramũ omwami wʼAbayũda mwatsũka eritabala.

²Ahazĩa abya wʼemyaka makũmĩ ani nʼeyĩbĩrĩ omugulu atsũka eribya mwami, neryo mwatabala eYerũsalema Omwaka muguma; nʼerĩna lya koyo wuwe lyabya Atalia mwali wa Omũrĩ.

³Naye mwalendera omo syonzira syʼekĩtũnga kya Ahabũ kusangwa nyĩnya wuwe abya mũhanĩ wuwe erikola ebibi.

⁴Naye mwakola ekibi omo meso wʼOmwami Mukulu, ngoko ekĩtũnga kya Ahabũ kyakola; kusangwa babya bahanĩ buwe erĩmũherya, enyũma wʼoluholo lwa tata wuwe.

⁵Naye mwakawama erĩhano lyabo, kandi mwagenda eRamotĩ-gĩleadĩ haguma na Yoramũ mugala wa Ahabũ omwami wʼAbaĩsraelĩ eriyalwa na Hazaelĩ omwami wʼeSũrĩa; nʼAbasũrĩa mobahũtalya Yoramũ.

⁶Neryo mwasubula erĩlamĩbwa eYezreelĩ busana nʼebironda ebyo bamũhũtalaya eRama, omugulu alwa na Hazaelĩ omwami wʼeSũrĩa. Na Azaria mugala wa Yoramũ omwami wʼAbayũda mwandagala eriyalola uku Yoramũ mugala wa Ahabũ eYezreelĩ kusangwa abya alwere.

⁷Neryo erihera lya Ahazĩa lyabya lĩkalũa uku Nyamuhanga, kusangwa aya ewa Yoramũ; kusangwa abere ahĩka, mwagenda haguma na Yoramũ eriyalwa na Yehũ mugala wa Nĩmsĩ, oyo Mwami Mukulu ahakabaya amagũta eribya mwami busana nʼeribuga ekĩtũnga kya Ahabũ.

⁸Neryo omugulu Yehũ abya akahĩra eritswera oko kĩtũnga kya Ahabũ mweya abanya-mwami ba Yũda, nʼabagala bʼabagala babo Ahazĩa, abakakolera Ahazĩa, neryo mwĩtabo.

⁹Neryo mwasondya Ahazĩa nibya, neryo mobamuhamba kusangwa abya abĩsamĩre eSamarĩa, mobamuleta uku Yehũ, mobamwĩta; neryo mobamuta, kusangwa bati, Iye ni mugala wa Yosafatĩ, oyo wasondaya Omwami Mukulu nʼomutima wuwe gosĩ. Neryo mohatabanika mundu wʼekĩtũnga kya Ahazĩa wʼerĩhanganĩa amaka wʼobwami.

¹⁰Neryo omugulu Atalia nya Ahazĩa alangira ngoko mugala wuwe amabihola, mwahangana mwaherya abana bosĩ bʼobwami bwʼenyũmba ya Yũda.

¹¹Nĩkwa Yosabeatĩ mwali wʼOmwami, mwĩmya Yoasĩ mugala wa Ahazĩa mwamwĩba omo katĩkatĩ kʼabagala bʼomwami omugulu bĩtawa, mwamũhĩra haguma nʼomũlemberĩ wuwe omo kyumba kyʼerigotseramo. Neryo Yosabeatĩ mwali wʼOmwami Yoramũ, omũkalĩ wʼomũhererĩ ye Yehoyada kusangwa abya mwali wabo Ahazĩa, mwamũbĩsa uku Atalia, ĩsĩamwĩta.

¹²Naye mwabya haguma nabo ĩnĩabĩsĩrwe emyaka ndatu omo nyũmba ya Nyamuhanga omugulu Atalia atabalira ekihugo.