Read nande 2 Emyatsi yʼEmigulu 23 Bible Online

2 Emyatsi yʼEmigulu 23 - nande bible

2 Emyatsi yʼEmigulu 23

¹Nʼoko mwaka wʼakalinda, Yehoyada mwayĩsĩkya mwahangana nʼabakulu bʼamagana; ye Azaria mugala wa Yoramũ, na Ĩsmaelĩ mugala wa Yehohananĩ, na Azaria mugala wa Obedĩ, na Maseya mugala wa Adaya, na Elĩsafatĩ mugala wa Zĩkĩrĩ.

²Mobalaba eYũda hosĩ, nʼerĩhĩndanĩa Abalawĩ erĩlũa omo mĩyĩ yosĩ ya Yũda, nʼabakulu bʼebĩtũnga byʼabotata ba Ĩsraelĩ, mobasa eYerũsalema.

³Nʼendeko yosĩ moyalagana nʼomwami omo nyũmba ya Nyamuhanga. Neryo Yehoyada mwabwirabo ati, lebaya, omugala wʼOmwami akanditabala ngoko Mwami Mukulu abũga busana nʼabagala ba Dawĩdĩ.

⁴Omwatsi ogo mwasyakola goyo: omuguma oko basatu benyũ oko bahererĩ nʼAbalawĩ abakingira oko Sabato basyabya bateya bʼesyongyo, nʼomuguma oko basatu benyũ basyabya oko nyũmba yʼOmwami;

⁵nʼomuguma oko basatu oko lũkyo lwʼekibanza; nʼabandu bosĩ basyabya omo bibuga byʼenyũmba yʼOmwami Mukulu.

⁶Nĩkwa simuleke omundu eriingira omo nyũmba yʼOmwami Mukulu, ĩba nʼabahererĩ basa, nʼAbalawĩ abakakola; abo basyingiramo, kusangwa babũyĩrĩre; nĩkwa abandu bosĩ bategaye obũteya bwʼomwami Mukulu.

⁷NʼAbalawĩ basyatĩmba oko mwami oko mbande syosĩ, obuli mundu nʼebindu biwe byʼamalwa omo byala biwe; nʼobuli mundu oyukingira omo nyũmba, ĩtawe; nenyũ mubye haguma nʼomwami omugulu akingira nʼomugulu akahuluka.

⁸Neryo Abalawĩ nʼAbayũda bosĩ mobakola ngʼebyosĩ omũhererĩ Yehoyada ahana; nʼobuli mundu mwatwala abandu buwe abakingira oko kiro kyʼeSabato, haguma nʼabakahuluka oko kiro kyʼeSabato; kusangwa omũhererĩ Yehoyada mwatakũlũkya emilondo.

⁹Nʼomũhererĩ Yehoyada mwaha abakulu bʼamagana amatũmo, neʼsyongabo, nʼotungabo ebyabya byʼOmwami Dawĩdĩ ebyabya omo nyũmba ya Nyamuhanga.

¹⁰Neryo mwategeka abandu bosĩ, obuli mundu nʼebindu biwe byʼamalwa omo byala biwe, erĩtsũka oko luhande lwʼamali lwʼenyũmba nʼerihĩka oko luhande lwʼamalembe lwʼemyũmba, ahahererenĩe nʼekiherero nʼenyũmba, erĩtĩmba oko mwami.

¹¹Neryo mobahũlũkya mugala wʼOmwami, mobamũhĩra kwʼembĩta yʼOmwami, kandi mobamuha emigambo mobamuyira mo mwami; na Yehoyada nʼabagala buwe mobamũhakabya amagũta; bati, Omwami akote.

¹²Neryo omugulu Atalia owa olukanda lwʼabandu bakatibita nʼeripipa omwami, mwahĩka oko bandu omo nyũmba yʼOmwami Mukulu;

¹³neryo mwasamalira, neryo lebaya, omwami iniahangene hakũhĩ nʼendũyĩ yiwe oko lũkyo, nʼabakulu, nʼabakabuha esyongubi hakũhĩ nʼomwami, nʼabandu bosĩ bʼekihugo mobatsema, nʼeribuha esyongubi; nʼabĩmbĩ nabo mobawata ebikimba, nʼerisondola eriimba lyʼeripipa. Neryo Atalia mwatulanga esyongimba siwe, mwabũga ati, Embĩta yʼobũyĩgũ, Embĩta yʼobũyĩgũ!

¹⁴Na Yehoyada omũhererĩ mwahũlũkya abakulu bʼamagana abahĩrawa oko mulondo, mwabwirabo ati, mũmũhũlũkĩraye eyĩhya omo katĩkatĩ kʼemilondo; nʼoyukamukwama ĩtawe omo mũyalĩ; kusangwa omũhererĩ mwabũga ati, Sĩmũmwĩtĩre omo nyũmba yʼOmwami Mukulu.

¹⁵Neryo mobamuhigulira enzira; naye mwalaba oko lũkyo lwʼeriingiriramo lwʼesyosabayĩrĩ oko nyũmba yʼOmwami; mobamwĩtĩraho.

¹⁶Na Yehoyada mwayira endagane nʼabandu bosĩ, nʼomwami, naye nibya ati, babye bandu bʼOmwami Mukulu.

¹⁷Nʼabandu bosĩ mobaya oko nyũmba ya Baalĩ, mobasambulayo. Mobatulanga ekiherero kyayo, nʼesyosanamu syayo mo bitswe-bitswe, mobĩta ye Matanĩ omũhererĩ wa Baalĩ, embere syʼekiherero.

¹⁸Na Yehoyada mwahĩra emĩbĩrĩ yʼe nyũmba yʼOmwami Mukulu omo hamulĩ yʼabahererĩ Abalawĩ, abo Dawĩdĩ agaba omo nyũmba yʼOmwami Mukulu erihera amahere wʼerĩokererya wʼOmwami Mukulu, ngoko kĩsakĩre omo migambo ya Musa, omo butseme nʼeriimba, ngoko Dawĩdĩ ahamula.

¹⁹Kandi mwahĩra abateya oko syongyo syʼenyũmba yʼOmwami Mukulu, Sihabye mundu oyũtsandĩre eriingiramo.

²⁰Neryo Yehoyada mwĩmya abakulu bʼamagana, nʼabakama, nʼabakulu bʼabandu, nʼabandu bosĩ bʼekihugo, mobandagalya omwami erĩlũa omo nyũmba yʼOmwami Mukulu, mobalaba omo lũkyo lwʼendata erĩhĩka oko nyũmba yʼOmwami. Neryo mobĩkalya omwami oko kĩtũmbĩ kyʼobwami.

²¹Nʼabandu bosĩ bʼekihugo mobatsema batya, nʼomũyĩ mwatũlera. Na Atalia ĩbabĩrĩmwĩta omo mũyalĩ.