Read nande 2 Emyatsi yʼEmigulu 24 Bible Online

2 Emyatsi yʼEmigulu 24 - nande bible

2 Emyatsi yʼEmigulu 24

¹Yoasĩ abya wʼemyaka irinda omugulu atsũka eribya mwami; neryo mwatabala eYerũsalema emyaka makũmĩ ani; nʼerĩna lya koyo wuwe lyabya Zĩbĩa, wʼeBerĩ-seba.

²Na Yoasĩ mwakola ebibuya omo meso wʼOmwami Mukulu ebiro byosĩ byʼeribyaho byʼomũhererĩ Yehoyada.

³Na Yehoyada mwamũtahĩrya abakalĩ babiri; naye mwabuta bagala nʼabali.

⁴Neryo enyũma wʼemyatsi eyĩ Yoasĩ mwaganĩrya erĩsũbya enyũmba yʼOmwami Mukulu.

⁵Neryo mwahĩndanĩa haguma abahererĩ nʼAbalawĩ, mwabwirabo ati, Mugende oko mĩyĩ ya Yũda mũsonga-songaye oko Baĩsraelĩ bosĩ esyofranka syʼerĩsũbya enyũmba ya Nyamuhanga wenyũ obuli mwaka; kandi mwangũhaye omwatsi oyũ. Nĩkwa Abalawĩ mobatakolago lũba.

⁶Neryo omwami mwabirikira omukulu Yehoyada, mwamubwira ati, Busana nakĩ sulitahatikana Abalawĩ erĩlũsya omusolo eYũda nʼeYerũsalema ogo Musa omugombe wʼOmwami Mukulu ahĩra oko ndeko yʼAbaĩsraelĩ, busana nʼeHema yʼerĩtũlago kwehĩ?

⁷Kusangwa bagala ba Atalia omũkalĩ mubi oyo, babya ibabirisambula enyũmba yʼOmwami Mukulu; kandi ĩbabiriha oko Babaalĩ ebindu byosĩ ebisolwere byʼenyũmba yʼOmwami Mukulu.

⁸Neryo omwami mwahamula, neryo mobakokotya erĩsandũko, mobahĩralyo oko lũkyo lwʼenyũmba yʼOmwami Mukulu.

⁹Neryo mobatũlago eYũda nʼeYerũsalema hosĩ eriretera Omwami Mukulu omusolo ogo Musa omugombe wa Nyamuhanga ahĩra oko Baĩsraelĩ omo mbwarara.

¹⁰Nʼabakulu bosĩ nʼabandu bosĩ mobatsema, mobaletago, nʼerĩhĩrago omwʼĩsandũko, erĩhĩka aho bamabibugirago.

¹¹Neryo omugulu erĩsandũko lyaletawa oko bakulu bʼomwami oko byala byʼAbalawĩ, nʼomugulu balangira ko muli ebĩtsĩpa bingi, omũhandĩkĩ wʼOmwami nʼomũsondolĩ wʼomũhererĩ mukulu ibakasa nʼerĩũtũla ebyabya omwʼĩsandũko, mobaswĩmyalyo, mobahekalyo nʼerĩsũbyalyo aho walyo. Ko bakola batya obuli kiro mobahĩndanĩa ebĩtsĩpa bingi.

¹²Nʼomwami na Yehoyada mobahabyo oko bakola omũbĩrĩ wʼenyũmba yʼOmwami Mukulu; mobasondya abahĩmbĩ nʼababatsĩ bʼerĩsũbya enyũmba yʼOmwami Mukulu, nibya abakahesa ebyuma nʼemiringa busana nʼerĩsũbya enyũmba yʼOmwami Mukulu.

¹³Neryo abakakola omũbĩrĩ mobakola, nʼomũbĩrĩ wʼerĩsũbyayo mwakoleka omo byala byabo, nabo mobahanganĩa enyũmba ya Nyamuhanga omo lulengo lwayo, mobawatyayo.

¹⁴Neryo babere babyũsũlyayo, mobaletera omwami na Yehoyada ebĩtsĩpa ebyasaka, mobahesa mubyo mwʼebindu busana nʼenyũmba yʼOmwami Mukulu bye bindu byʼerikolamo nʼebyʼeriherako, nʼemyũko nʼebindu byʼesyamagetsi nʼebĩtsĩpa. Mobahera amahere wʼerĩokererya omo nyũmba yʼOmwami Mukulu emigulu yosĩ oko biro bya Yehoyada.

¹⁵Nĩkwa Yehoyada mwakula nʼeribya wʼemyaka minene, neryo mwahola; omugulu ahola abya wʼemyaka erĩgana nʼamakũmĩ asatu.

¹⁶Mobamuta omo katĩkatĩ kʼabami omo mũyĩ wa Dawĩdĩ, kusangwa akolera Abaĩsraelĩ bʼebibuya, na busana na Nyamuhanga nʼenyũmba yiwe.

¹⁷Neryo enyũma wʼoluholo lwa Yehoyada, abakulu ba Yũda mobasa nʼerĩũnamira omwami. Neryo omwami mwahulikirirabo.

¹⁸Mobasĩganĩa enyũmba yʼOmwami Mukulu, Nyamuhanga wʼabotata wabo, mobakolera Asera nʼesyosanamu; nʼerihitana molyahĩka oko Yũda nʼeYerũsalema busana nʼomusango wabo oyũ.

¹⁹Nĩkwa mwatumirabo abamĩnyererĩ, erĩsũbyabo oko Mwami Mukulu; mobatũlĩra gobo; nĩkwa mobatatega matwĩ.

²⁰NʼOmũlĩmũ wa Nyamuhanga mwahĩka uku Zekarĩa mugala wʼomũhererĩ Yehoyada; naye mwahangana endata oko bandu, mwabwirabo ati, Nyamuhanga akabũga ati, Busana nakĩ mũkahalaya oko bihano byʼOmwami Mukulu isimuligasa kwehĩ? Kusangwa mwabĩrĩsĩganĩa Omwami Mukulu, naye abĩrĩbasĩganĩa.

²¹Neryo mobaya embĩta busana naye, nʼerĩmũswĩrya omo mabwe okwʼihamula lyʼOmwami omo kibuga kyʼenyũmba yʼOmwami Mukulu.

²²Neryo omwami Yoasĩ mwatibuka ebibuya ebyo tata wuwe Yehoyada amukola, nĩkwa mwĩta mugala wuwe. Neryo Zekarĩa abere akalekula, mwabũga ati, Omwami Mukulu alangirekyo, nʼerĩkĩsyakyo!

²³Neryo okwʼihwa lyʼomwaka omulondo wʼAbasũrĩa mobamuhetukirako; mobahĩka eYũda nʼeYerũsalema, mobaherya abakulu bosĩ bʼabandu omo katĩkatĩ kʼabandu, neryo mwatuma obũnyeyĩ bosĩ bwabo oko mwami wʼeDamasekĩ.

²⁴Kusangwa omulondo wʼAbasũrĩa mobasa nʼabandu bake; nĩkwa Omwami Mukulu mwahĩra endeko nene kutsibu omo byala byabo kusangwa babĩrĩsĩganĩa Omwami Mukulu Nyamuhanga wʼabotata-kulu wabo. Litya mobahĩra eritswera uku Yoasĩ.

²⁵Nʼomugulu bamũsĩga kusangwa mobamũsĩga inialwere kutsibu, abagombe buwe mobamuyira embĩta busana nʼomusasi wʼomugala wa Yehoyada omũhererĩ, mobamwĩtĩra omo ngyingo yiwe, naye mwahola; mobamuta omo mũyĩ wa Dawĩdĩ, nĩkwa mobatamuta omo masinda wʼabami.

²⁶Nʼabamuyira embĩta baba; Zabadĩ mugala wʼomũkalĩ ye Sĩmeatĩ wʼAbaamonĩ, na Yehozabadĩ mugala wʼomũkalĩ ye Sĩmĩrĩtĩ wʼeMoabũ.

²⁷Nĩkwa busana nʼabagala buwe, nʼemyatsi yʼeriminyerera busana naye, nʼerĩsũbya enyũmba ya Nyamuhanga, lebaya bĩsakĩre omo myatsi yʼekitabu kyʼabami. Na Amazĩa mugala wuwe mwabya mwami omo mwanya wuwe.