Read nande 2 Emyatsi yʼEmigulu 25 Bible Online

2 Emyatsi yʼEmigulu 25 - nande bible

2 Emyatsi yʼEmigulu 25

¹Amazĩa abya wʼemyaka makũmĩ abiri nʼeyĩtanu omugulu atsũka eribya mwami, neryo mwatabala eYerũsalema emyaka makũmĩ abiri nʼomwenda; nʼerĩna lya koyo wuwe lyabya Yoadanĩ wʼeYerũsalema.

²Naye mwakola eritunganene omo meso wʼOmwami Mukulu; nĩkwa butsira omo mutima gosĩ.

³Neryo omugulu obwami buwe bwabana amaka, mwĩta abagombe buwe abĩta omwami tata wuwe.

⁴Nĩkwa mwatĩta abana babo, nĩkwa mwakola ngʼebysakawa omo migambo omo kitabu kya Musa, ngoko Mwami Mukulu ahana ati, Abotata sĩbasyekwa busana nʼabana, kutse abana sĩbasyekwa busana nʼabotata; nĩkwa obuli mundu asyahola busana nʼamalolo wuwe.

⁵Kandi Amazĩa mwahĩndanĩa Abayũda haguma, mwatondekabo ngʼebĩtũnga byʼabotata wabo, ibanawite abakulu bʼamaelfu nʼabakulu bʼamagana, Abayũda bosĩ nʼAbabenyamĩna; neryo mwaganzabo erĩtsũka oko bʼemyaka makũmĩ abiri nʼabakulu kwʼaho, mwabanabo ini elfu magana asatu (300,000), abandu bayisogawa, abangatoka eriyalwa, ababegere erĩtũmo nʼengabo.

⁶Neryo mwĩngĩrya oko mũbĩrĩ wʼabasĩrĩkanĩ abakalũa eĨsraelĩ esyombangĩ syʼamaka abandu elfu erĩgana (100,000) busana nʼesyotalanta syʼebĩtsĩpa erĩgana liguma.

⁷Neryo omundu wa Nyamuhanga mwamũhĩkako ati, Uwe mwami, Suleke omulondo wʼAbaĩsraelĩ akagenda nawe; kusangwa Omwami Mukulu siali haguma nʼAbaĩsraelĩ, haguma nʼabana bosĩ ba Efũraĩmũ.

⁸Nĩkwa wamanza erigenda, Ukole nʼamaka, Ũsĩke busana nʼamalwa, nĩkwa Nyamuhanga asyakugusa ahisi embere wʼenzĩgũ; kusangwa Nyamuhanga awite amaka wʼerĩwatĩkya, nʼerigusa ahisi.

⁹Na Amazĩa mwabwira omundu wa Nyamuhanga ati, Nĩkwa twasyakolakĩ omo syotalanta erĩgana esyo nabiriha oko mulondo wʼAbaĩsraelĩ kwehĩ? Nʼomundu wa Nyamuhanga mwasũbĩrya ati, Omwami Mukulu awite nyingi kwilaba esĩ erikuhasyo.

¹⁰Neryo Amazĩa mwasololabo, omulondo owamũhĩkako akalũa ewa Efũraĩmũ, basube ewabo. Busana nʼekyo erihitana lyabo molyakala kutsibu busana na Yũda, mobasuba ewabo ibahitene kutsibu.

¹¹Na Amazĩa mwahanda omutima, mwasondola abandu buwe, mwaya oko Musya wʼOmũnyũ, mwĩta abana ba Seĩrĩ elfu ĩkũmĩ (10,000).

¹²Nʼabandi elfu ĩkũmĩ (10,000) abana ba Yũda mobahekabo ibaneho, mobaletabo endata okwʼĩbwe, mobagusabo ahisi bakalũa oko kalimi-limi kʼerĩbwe, mobabũnangika mo bitswe-bitswe.

¹³Nĩkwa abandu bʼomulondo abo Amazĩa asũbũlaya, ati sibagende haguma naye oko malwa, mobawirira emĩyĩ ya Yũda, erĩtsũka eSamarĩa erĩhĩka eBetĩ-horonĩ, mobĩta kubo elfu ĩsatu (3,000), mobahũnga obũnyeyĩ bunene.

¹⁴Neryo enyũma Amazĩa abere abisubula okwʼĩta Abaedomũ, mwaleta esyonyamuhanga syʼabana bʼeSeĩrĩ, mwasingikayso eribya esyonyamuhanga siwe, mwayũnamya embere wasyo, mwahĩsĩryasyo obukwa.

¹⁵Busana nʼekyo, erihitana lya Nyamuhanga molyaka busana na Amazĩa, neryo mwamutumako omũmĩnyererĩ, oyo wamubwira ati, Busana nakĩ wabirisondasondya esyonyamuhanga syʼabandu, esĩtalamaya abandu babo omo byala byawe kwehĩ?

¹⁶Neryo omugulu abya akabũga naye, omwami mwamubwira ati, Twabĩrĩkũhĩra oko bahanĩ bʼomwami kwehĩ? Uhune! Ukasonda erĩkwa busana nakĩ kwehĩ? Neryo omũmĩnyereri mwahuna mwabũga ati, Nyĩnasĩ ko Nyamuhanga abĩrĩganĩrya erĩkũherya, kusangwa wabirikola ekĩ, kandi sũlĩtowa erihana lyage.

¹⁷Neryo omwami Amazĩa wʼeYũda mwaya embĩta mwatuma uku Yoasĩ, mugala wa Yoahazĩ, mugala wa Yehũ, omwami wa Ĩsraelĩ, ati wase, tulolaneko bũsũ nʼobũsũ.

¹⁸Na Yoasĩ omwami wʼAbaĩsraelĩ mwatuma oko mwami wʼAbayũda, ati, Omusakisaki owabya eLebanonĩ mwatuma oko mũerezĩ owabya eLebanonĩ ati, Uhe mwali wawe eribya mũkalĩ wa mugala wage; neryo enyama yʼomolĩ eyabya eLebanonĩ moyalabaho moyalyatangirira omusakisaki oyo.

¹⁹Ũkabũga uti, Lebaya, wabĩrĩta Abaedomũ. Nʼomutima wawe akakũhamaya eriyipipa. Lino Wĩkale eka; busana nakĩ ukasonda omwatsi wʼobũlĩge kwehĩ? Uti ũkakwa, na Yũda haguma nawe kwehĩ?

²⁰Nĩkwa Amazĩa mwagana erĩowa; kusangwa omwatsi oyo alũa uku Nyamuhanga, iniatoka erĩhĩrabo omo byala bya Yoasĩ, kusangwa basonda-sonda esyonyamuhanga syʼeEdomũ.

²¹Neryo Yoasĩ omwami wʼAbaĩsraelĩ mwahetukirayo; iye na Amazĩa omwami wʼAbayũda mobalolanako obũsũ oko bũsũ eBetĩ-semesĩ owabya wʼeYũda.

²²Na Yũda mwasĩngwa embere sya Ĩsraelĩ; nʼobuli mundu mwatibita omo hema yiwe.

²³Na Yoasĩ omwami wʼAbaĩsraelĩ mwahamba Amazĩa omwami wʼAbayũda, mugala wa Yoasĩ mugala wa Yoahazĩ, eBetĩ-semesĩ, mwamwandagalĩrya eYerũsalema, mwaterya olũhĩmbo lwʼeYerũsalema erĩtsũka oko Lũkyo lwa Efũraĩmũ erĩhĩka oko Lũkyo lwʼEngonde, emetere 184.

²⁴Neryo mwahũnga esyamagetsi syosĩ nʼebĩtsĩpa, nʼesyonyungu syosĩ esyabanika omo nyũmba ya Nyamuhanga haguma na Obedĩ-edomũ, nʼebindu byʼenyũmba yʼOmwami nʼabʼomũlĩkĩ nibya, neryo mwasuba eSamarĩa.

²⁵Na Amazĩa mugala wa Yoasĩ omwami wʼAbayũda mwabuga emyaka erĩkũmĩ nʼeyĩtanu enyũma wʼoluholo lwa Yoasĩ mugala wa Yoahazĩ omwami wʼeĨsraelĩ.

²⁶Nʼeyindi mĩbĩrĩ ya Amazĩa eyʼerĩmbere nʼeyerĩnyũma, lebaya, yĩsakĩre omo kitabu kyʼabami bʼeYũda na Ĩsraelĩ.

²⁷Neryo erĩtsũka omugulu Amazĩa abinduka erireka erikwama Omwami Mukulu mobamuyira embĩta yʼobũyĩgũ eYerũsalema; naye mwatibita eLakĩsĩ. Nĩkwa mobamukwamirira eLakĩsĩ, mobamwĩtĩrayo.

²⁸Mobamuleta oko syosabayĩrĩ, mobamuta ahali abotata wuwe omo mũyĩ wa Yũda.