Read nande 2 Emyatsi yʼEmigulu 26 Bible Online

2 Emyatsi yʼEmigulu 26 - nande bible

2 Emyatsi yʼEmigulu 26

¹Nʼabandu bosĩ ba Yũda mobĩmya Ũzĩa oyo wabya wʼemyaka erĩkũmĩ nʼendatu, mobamuyira mo mwami omo mwanya wa tata wuwe Amazĩa.

²Naye mwahĩmba eElotĩ, mwasũbyaho oko Yũda, omwami abere abyeya abotata-kulu buwe.

³Ũzĩa abya wʼemyaka erĩkũmĩ nʼendatu omugulu atsũka eribya mwami; neryo mwatabala eYerũsalema emyaka makũmĩ atanu nʼeyĩbĩrĩ; nʼerĩna lya koyo wuwe lyabya Yekolĩa wʼeYerũsalema.

⁴Naye mwakola ekitunganene omo meso wʼOmwami Mukulu ngʼebyosĩ ebyo tata wuwe Amazĩa akola.

⁵Neryo mwayĩhĩra okwʼisonda-sonda Nyamuhanga omo biro bya Zekarĩa oyo wabya nʼeriminya omo syonzolĩ sya Nyamuhanga; nʼemigulu yosĩ eyo asonda-sonda Omwami Mukulu, Nyamuhanga mwamuha erigasa.

⁶Neryo mwayalwa nʼAbafĩlĩstĩnĩ, mwaterya olũhimbo lwʼeGatĩ, nʼolũhĩmbo lwʼeYabũne, nʼolũhĩmbo lwʼeAsĩdodĩ; kandi mwahĩmba emĩyĩ eAsĩdodĩ, nʼomo katĩkatĩ kʼAbafĩlĩstĩnĩ.

⁷Na Nyamuhanga mwamũwatĩkya erilwa nʼAbafĩlĩstĩnĩ, nʼerilwa nʼAbaarabu ababya bĩkere eGũrĩ-balĩ, nʼAbameũnĩmũ.

⁸NʼAbaamonĩ mobaha Ũzĩa omuhako; nʼerĩna liwe molyakũmayira ehosĩ erĩhĩka oko mutano wʼeMĩsĩrĩ; kusangwa mwakanya omo maka kutsibu.

⁹Kandi Ũzĩa mwahĩmba amanyũmba awayĩsũngũlĩkĩre eYerũsalema oko Lũkyo lwʼEngonde, nʼoko Lũkyo lwʼOmusya, nʼaho ekikunda kĩkatĩmba, mwawatyaho ndeke.

¹⁰Kandi mwahĩmba amanyũmba ayo awayĩsũngũlĩkĩre omo mbwarara. Kandi mwakwika ebitehero bingi, kusangwa abya awite ebihangulo bingi; omo bwerere nʼoko hitwa, kandi abya awite abalĩmĩ nʼabateya bʼebĩnyũ omo bitwa nʼomo malima awabogĩre; kusangwa abya anzĩre obulime.

¹¹Kandi Ũzĩa abya awite omulondo wʼabalwĩ, abaya oko malwa omo milondo, ngʼeriganza eryo mũhandĩkĩ Yeĩelĩ aganza nʼomukulu Maaseya, omo byala bya Hanania omuguma wʼoko bakulu bʼomwami.

¹²Nʼeriganza lyosĩ lyʼabakulu bʼebĩtũnga byʼabotata, esyombangĩ syʼamaka, babya elfu ĩbĩrĩ nʼamagana ndatu (2,600).

¹³Nʼomo byala byabo mwabya amaka wʼomulondo wʼeelfu magana asatu nʼirinda nʼamagana atanu (307,500) abakalwa nʼamaka manene, erĩwatĩkya omwami erilwa nʼenzĩgũ.

¹⁴Na Ũzĩa mwakokotya busana nabo na busana nʼomulondo gosĩ, esyongabo, nʼamatũmo, nʼesyongofĩa, nʼamupa wʼebyuma, nʼamata, nʼamabwe wʼerigusa omo mukoba.

¹⁵NʼeYerũsalema mwakokotya amasĩnĩ awakokotĩbawa nʼabanyima-nyima eribya oko manyũmba awayĩsũngũlĩkĩre nʼoko syongonde busana nʼerilasa emisoha nʼamabwe manene manene. Nʼerĩna liwe molyakũmayira ehali-hali; kusangwa awatĩkĩbawa nʼebyʼeriswekera erĩhĩka aho abanira amaka.

¹⁶Nĩkwa abere abibya nʼamaka omutima wuwe mwayipipa kyaleka iniakola nabi, neryo mwahalya embere syʼOmwami Mukulu Nyamuhanga wuwe; kusangwa mwingira omo Hekalũ yʼOmwami Mukulu erĩhĩsya obukwa oko kiherero kyʼobukwa.

¹⁷Nʼomũhererĩ Azaria mwingira enyũma wuwe, haguma nʼabahererĩ bʼOmwami Mukulu makũmĩ munani ababya esyombangĩ.

¹⁸Nabo mobayibambira oko mwami Ũzĩa, mobamubwira bati, Si mwatsi wawe, uwe Ũzĩa, erĩhĩsya obukwa busana nʼOmwami Mukulu, nĩkwa nĩ hamũlĩ yʼabahererĩ abagala ba Harũnĩ, ababirihigulwa busana nʼerĩhĩsya obukwa. Ũlũa omo habũyĩrĩre; kusangwa wabĩrĩhalya; kutse siryendisyakuletera erikengwa nʼOmwami Mukulu Nyamuhanga.

¹⁹Neryo Ũzĩa mwahitana; naye abya awite oko ruho omo byala biwe olwʼerĩhĩsya obukwa; nʼomugulu abya ahitene oko bahererĩ, ebihaga mobyahuluka oko mbũmo yʼobũsũ buwe embere syʼabahererĩ omo nyũmba yʼOmwami Mukulu aho mũsĩke wʼekiherero kyʼobukwa.

²⁰Na Azaria omũhererĩ mukulu, nʼabahererĩ bosĩ, mobamusamalira, neryo, lebaya, abya muhaga omo mbũmo yʼobũsũ buwe, neryo mobamũkũna eyĩhya yo lũba; ega, naye mwanguha erihuluka, kusangwa Omwami Mukulu ĩnĩabĩrĩmũswĩrya.

²¹Nʼomwami Ũzĩa mwabya muhaga erĩhĩka oko kiro kyʼoluholo luwe, mwĩkala omo nyũmba eyiri aho wayo, inina muhaga; kusangwa ahigawa omo nyũmba yʼOmwami Mukulu. Na Yotamũ mugala wuwe mwabya mukulu omo nyũmba yʼOmwami, iniakatswera abandu bʼekihugo.

²²Neryo eyindi mĩbĩrĩ ya Ũzĩa, eyʼerĩmbere nʼeyʼerĩnyũma, omũmĩnyererĩ Ĩsaya mugala wa Amosĩ, mwasakayo.

²³Neryo Ũzĩa mweya abotata-kulu buwe; mobamuta Ahali abotata wuwe omo kisuki kyʼeritamo ekyʼabami; kusangwa babũga bati. Ni muhaga; na Yotamũ mugala wuwe mwabya mwami omo mwanya wuwe.