Read nande 2 Emyatsi yʼEmigulu 28 Bible Online

2 Emyatsi yʼEmigulu 28 - nande bible

2 Emyatsi yʼEmigulu 28

¹Ahazĩ abya wʼemyaka makũmĩ abiri omugulu atsũka eribya mwami, neryo mwatabala eYerũsalema emyaka ĩkũmĩ na ndatu; kandi mwatakola ekitunganene omo meso wʼOmwami Mukulu, nga tata wuwe Dawĩdĩ.

²Nĩkwa mwagendera omo syonzira syʼabami ba Ĩsraelĩ, nibya mwahesa esyosanamu syʼerĩnũnĩa busana na Baalĩ.

³Kandi mwahĩsya obukwa omo musya wʼomugala wa Hĩnomũ, kandi mwahĩsya abana buwe omo muliro, ngʼesyonye syʼebihanda ko siri, ebyo Mwami Mukulu ahiga embere syʼabana ba Ĩsraelĩ.

⁴Mwahonga obuhere, nʼerĩhĩsya obukwa oko hendata, nʼoko bitwa, nʼoko ndĩna yʼobuli muti mubisi.

⁵Busana nʼekyo, Omwami Mukulu Nyamuhanga wuwe mwamũhĩra omo byala byʼOmwami wʼeSũrĩa; nabo mobamwĩta, mobamũhũngako endeko nene yʼabanyegwa, mobaletabo eDamasekĩ. Kandi mwahĩrwa omo byala byʼOmwami wʼAbaĩsraelĩ, oyo wamwĩta nʼerĩĩta lĩnene.

⁶Kusangwa Peka mugala wa Remalĩa mwĩta ekiro kiguma elfu erĩgana nʼamakũmĩ abiri (120,000) eYũda, abosĩ esyombangi; kusangwa ĩbabĩrĩsĩganĩa Omwami Mukulu, Nyamuhanga wʼabotata wabo.

⁷Na Sĩkĩrĩ, embangĩ ya Efũraĩmũ, mwĩta Maaseya mugala wʼOmwami, na Azĩrĩkamũ omukulu wʼekitũnga, na Elkana oyũsũbũkĩre omwami.

⁸Nʼabana ba Ĩsraelĩ mobahũnga oko bagala babo elfu magana abiri (200,000), abakalĩ, nʼabagala nʼabali, kandi mobahũnga kubo obunyegwa nibya, mobaleta obunyegwa obo eSamarĩa.

⁹Nĩkwa omũmĩnyererĩ wʼOmwami Mukulu abyayo, erĩna liwe lyabya Odedĩ; naye mwayahĩndana nʼendeko eyo eyahĩka eSamarĩa, mwabwirabo ati, Mũlebaye, kusangwa Omwami Mukulu, Nyamuhanga wʼabotata wenyũ, mwahitana oko Bayũda, abĩrĩhĩrabo omo byala byenyũ, nenyũ mwabĩrĩrabo omwʼitsuruma eryabĩrĩhĩka elubula.

¹⁰Na lino mukakandayirira eriyira abana ba Yũda nʼabʼeYerũsalema mo bakobe benyũ bʼobulume nʼabʼobũkalĩ. Nenyũ simuwite erĩhalya lyenyũ busana nʼOmwami Mukulu Nyamuhanga wenyũ kwehĩ?

¹¹Neryo lino munyihulikirire, mũsũbũlaye abanyegwa abo mwabĩrĩhũnga oko bagala benyũ; kusangwa erihitana lĩkalĩre lyʼOmwami Mukulu liri ũkwʼĩnywe.

¹²Neryo abandi bʼoko bakulu bʼabana ba Efũraĩmũ, ye Azaria mugala wa Yohana, na Berekĩa mugala wa Mesĩlĩmotĩ, na Yehĩzĩkĩa mugala wa Salumu, na Amasa mugala wa Ahadĩlaĩ, mobanegena nʼabalũa oko malwa,

¹³mobabwirabo bati, Sĩmwendĩkolya abanyegwa bo hano; kusangwa mukakandayirira ebikandituletera omusango embere syʼOmwami Mukulu, eritomekera ebibi byetu nʼamalolo wetu; kusangwa amalolo wetu ni manene, nʼerihitana lĩkalĩre liri oko Baĩsraelĩ.

¹⁴Neryo abandu abambite ebindu byʼamalwa mobasĩga abanyegawa nʼobũnyeyĩ embere syʼabakulu nʼendeko yosĩ.

¹⁵Neryo abandu abahulawa omo mena mobahangana, mobĩmya abanyegawa bosĩ ababya ndũmbũ, mobambalyabo oko byanyegawa, nʼerihabo esyongimba nʼesyongendero, kandi mobahabo ebyʼerirya nʼawʼerĩpũlya, nʼerĩhakabyabo amagũta, nʼeriheka abosĩ ababya batohĩre oko syopunda, nʼeriretabo eYerĩko, omũyĩ wʼamabondo, oko bagala babo; neryo mobasuba eSamarĩa.

¹⁶Oko mugulu oyo, omwami Ahazĩ mwatuma oko bami bʼeAsũrĩa atĩ bamũwatĩkaye.

¹⁷Kusangwa Abaedomũ ibamabiasa kandi erĩĩta Yũda, nʼeriheka abanyegawa.

¹⁸NʼAbafĩlĩstĩnĩ nibya ibamabibambira emĩyĩ yʼomwʼirungu, nʼekyʼolutambi lwʼeyĩkwa kyʼeYũda nʼerĩhũnga eBetĩ-semesĩ, nʼeAyalonĩ, nʼeGederotĩ, nʼeSoko, haguma nʼemĩyĩ yayo, nʼeTimũna nʼemĩyĩ yayo, nʼeGĩmũzo nibya, nʼemĩyĩ yayo; mobĩkalayo.

¹⁹Kusangwa Omwami Mukulu mwakehya Abayũda busana na Ahazĩ omwami wʼAbaĩsraelĩ; kusangwa ĩnĩabĩrĩtsandya Abayũda, nʼeriregula kutsibu oko Mwami Mukulu.

²⁰Na Tĩgĩlatĩ-pĩleserĩ omwami wʼeAsũrĩa mwalwa naye, mwamũpapũkya, nĩkwa mwatamũwatĩkya.

²¹Kusangwa Ahazĩ mwĩmya oko byʼenyũmba yʼOmwami Mukulu, nʼoko byʼenyũmba yʼOmwami nʼoko byʼabanyamwami mwahabyo omwami wʼeAsũrĩa; nĩkwa mobĩtamũ watĩkya.

²²Nʼomwami Ahazĩ omugulu asĩsĩkana, mwalegula oko Mwami Mukulu kwilaba.

²³Kusangwa mwahongera esyonyamuhanga syʼeDamasekĩ, esyamwĩta; kandi mwabũga ati, Kusangwa esyonyamuhanga syʼabami bʼeSũrĩa mosyawatĩkyabo, neryo nage ngandihongerasyo sĩnyĩwatĩkaye nage. Nĩkwa mosyamũtwĩkalya nʼAbaĩsraelĩ bosĩ.

²⁴Kandi Ahazĩ mwahĩndanĩa ebindu byʼenyũmba ya Nyamuhanga, mwatsũtsanga ebindu ebyo byʼenyũmba ya Nyamuhanga mo bitswe-bitswe, mwakinga esyonyũyĩ syʼenyũmba yʼOmwami Mukulu; neryo mwayĩhĩmbĩra ebiherero omo buli ngonde yʼeYerũsalema,

²⁵Kandi mwayira ahendata omo buli mũyĩ wa Yũda busana nʼerĩhĩsya obukwa busana nʼesindi nyamuhanga, mwahĩtanĩa Omwami Mukulu, Nyamuhanga wʼabotata wuwe.

²⁶Neryo eyindi mĩbĩrĩ yiwe, nʼemibere yiwe yosĩ, eyʼerĩmbere nʼeyʼenyũma, lebaya ĩsakĩre omo kitabu kyʼabami bʼAbayũda nʼabʼAbaĩsraelĩ.

²⁷Neryo Ahazĩ mweya abotata-kulu buwe, mobamuta omo mũyĩ eYerũsalema; kusangwa mobatamũkolya omo masinda wʼabami bʼAbaĩsraelĩ. Na Hezekĩa mugala wuwe mwatabala omo mwanya wuwe.