Read nande 2 Emyatsi yʼEmigulu 29 Bible Online

2 Emyatsi yʼEmigulu 29 - nande bible

2 Emyatsi yʼEmigulu 29

¹Na Hezekĩa abya wʼemyaka makũmĩ abiri nʼeyĩtanu omugulu atsũka eribya mwami, neryo mwatabala eYerũsalema emyaka makũmĩ abiri nʼomwenda. Nʼerĩna lya koyo wuwe lyabya Abĩya mwali wa Zekarĩa.

²Naye mwakola ekitunganene omo meso wʼOmwami Mukulu, ngʼebyosĩ tata wuwe Dawĩdĩ akola.

³Oko mwaka wʼerĩtsũka wʼeritabala liwe, oko mukera wʼerĩtsũka, mwakingula esyonyũyĩ syʼenyũmba yʼOmwami Mukulu, mwasũbyasyo.

⁴Kandi mwakolyamo abahererĩ nʼAbalawĩ, mwahĩndanĩabo haguma omo kibuga ebwanga bwʼendata.

⁵Mwabwirabo ati, ĩnywe Balawĩ mumbulikirire; lino muyihigule, muhigule nʼenyũmba yʼOmwami Mukulu, Nyamuhanga wʼabotata-kulu wenyũ, kandi mutwale eyĩhya ebĩtĩsĩrĩre erĩlũa ahabũyĩrĩre.

⁶Kusangwa abotata wetu babĩrĩhalya, nʼerikola ebibi omo meso wʼOmwami Mukulu Nyamuhanga wetu, kandi babĩrĩmũsĩganĩa babirikebera ehandi erĩlũa oko herĩĩkala lyʼOmwami Mukulu, nʼerĩmũlolya kwʼemigongo.

⁷Kandi babirikinga esyonyũyĩ syʼekĩsekũ, nʼerĩrĩmya esyotala, kandi sĩbetahĩsya obukwa kutse erihera amahere wʼerĩokererya ahabũyĩrĩre busana na Nyamuhanga wa Ĩsraelĩ.

⁸Busana nʼekyo erihitana lyʼOmwami Mukulu lyabya oko Yũda nʼeYerũsalema, kandi abirihabo eribya kindu, kyʼerĩũbahya, nʼeribya nye, nʼerĩsyolĩbwa, ngoko mukalangira omo meso wenyũ.

⁹Kusangwa, lebaya, abotata wetu babiriwa omo mũyalĩ, nʼabagala nʼabali nʼabakalĩ betu babĩrĩhũngwa mo basayĩ busana nʼomwatsi oyũ.

¹⁰Neryo lino kiro omo mutima wage eriyira endagano nʼOmwami Mukulu, Nyamuhanga wa Ĩsraelĩ, erihitana lĩkalĩre liwe lĩtũlũeko.

¹¹Abagala bage simulindirire; kusangwa Omwami Mukulu abiriyisoga nywe erihangana embere siwe, nʼerimukolera, imwabya bakolĩ buwe, nʼerĩokya obukwa.

¹²Neryo Abalawĩ mobahangana, ye Mahatĩ mugala wa Amasaĩ, na Yoelĩ mugala wa Azaria, oko bagala bʼAbakohatĩ; nʼabʼoko bagala ba Merarĩ, ye Kĩsĩ, mugala wa Abũdĩ, na Azaria mugala wa Yehalelĩ, nʼabʼoko Bagerĩsonĩ, ye Yoa mugala wa Zĩma, na Edenĩ mugala wa Yoa;

¹³nʼabʼoko bagala ba Elĩzafanĩ, ye Sĩmũrĩ na Yeũelĩ; nʼabʼoko bagala ba Asafũ, ye Zekarĩa na Matanĩa;

¹⁴nʼabʼoko bagala ba Hemanĩ ye Yehũelĩ na Sĩmeĩ; nʼabʼoko bagala ba Yedũtũnĩ, ye Semaya na Ũzĩelĩ.

¹⁵Mobahĩndanĩa bagala babo, mobayihigula, mobingira, ngʼerihana lyʼOmwami omo bĩnywa byʼOmwami Mukulu, erĩerya enyũmba yʼOmwami Mukulu.

¹⁶Nʼabahererĩ mobingira omo luhande lwʼomwisi lwʼenyũmba yʼOmwami Mukulu, erĩbĩryayo, neryo mobalũsyamo olũtũtũ losĩ olo babana omo Hekalũ yʼOmwami Mukulu erigusalo omo kibuga kyʼenyũmba yʼOmwami Mukulu. NʼAbalawĩ mobahekalo eritwalalo eyĩhya oko kũsi kʼeKĩdũronĩ.

¹⁷Neryo mobatsũka erihigulayo oko kiro kyʼerĩtsũka kyʼomukera wʼerĩtsũka, neryo oko kiro kyʼomunani kyʼomukera mobahĩka oko kĩsekũ kyʼOmwami Mukulu; mobahigula enyũmba yʼOmwami Mukulu omo biro munani; nʼoko kiro kyʼerĩkũmĩ nʼendatu kyʼomukera wʼerĩtsũka mobabugayo.

¹⁸Neryo mobingira eyiri omwami Hezekĩa mobabũga bati. Twabĩrĩbĩrya enyũmba yosĩ yʼOmwami Mukulu, nʼekiherero kyʼobuhere bwʼerĩokererya, haguma nʼebindu byaho byosĩ, nʼemesa yʼobundu bwʼerĩkanganĩa haguma nʼebindu byaho byosĩ.

¹⁹Kandi ebindu byosĩ ebyo mwami Ahazĩ agusa omugulu atabala nʼomugulu alegula, twabĩrĩkokotyabyo nʼerihigulabyo; neryo, lebaya, biri embere syʼekiherero kyʼOmwami Mukulu.

²⁰Neryo omwami Hezekĩa mwahangana omo ngyakya-ngyakya, mwahĩndanĩa abanya-mwami bʼomũyĩ, neryo mwahetukira omo nyũmba yʼOmwami Mukulu.

²¹Neryo mobaleta esyonume sirinda syʼesyonde, nʼesyombangale sirinda nʼebyana byʼesyombũlĩ birinda, nʼesyombaya sirinda, eribya buhere bwʼebibi busana nʼobwami na busana nʼahabũyĩrĩre, na busana nʼAbayũda. Neryo mwahana abahererĩ bagala ba Harũnĩ baheresyo oko kiherero kyʼOmwami Mukulu.

²²Neryo mobakera esyonume esyo syʼesyonde, nʼabahererĩ mobĩmya omusasi, mobatsatsangago oko kiherero; mobakera esyombangale, nʼeritsatsanga omusasi oko kiherero; kandi mobakera ebyana byʼesyombũlĩ, mobatsatsanga omusasi oko kiherero.

²³Neryo mobaleta esyombaya syʼobuhere bwʼebibi embere wʼOmwami nʼendeko, neryo mobahĩra kusyo ebyala byabo.

²⁴Nʼabahererĩ mobakerasyo, moberya ekiherero omo musasi wasyo, eririhira Abaĩsraelĩ bosĩ; kusangwa omwami mwahamula obuhere bwʼerĩokererya nʼobuhere bwʼebibi bibye busana nʼAbaĩsraelĩ bosĩ.

²⁵Neryo Hezekĩa mwahĩra Abalawĩ omo nyũmba yʼOmwami Mukulu haguma nʼamasengo, nʼesyonzenze, nʼesyonanga, ngʼerihana lya Dawĩdĩ, nʼerya Gadĩ omũhanĩ wʼOmwami, nʼeryʼomũmĩnyererĩ Natana; kusangwa Omwami Mukulu mwahanabo busana nʼabamĩnyererĩ.

²⁶NʼAbalawĩ mobahangana nʼebindu byʼeriimbamo bya Dawĩdĩ, nʼabahererĩ ibawite oko syongubi.

²⁷Na Hezekĩa mwahamula erihera obuhere bwʼerĩokererya oko kiherero. Nʼomugulu obuhere bwʼerĩokererya bwatsũka, Olwimbo lwʼOmwami Mukulu molwatsũka nibya, nʼesyongubi, haguma nʼebindu byʼeriimba bya Dawĩdĩ omwami wʼAbaĩsraelĩ.

²⁸Nʼendeko yosĩ moyaramya, nʼabĩmbĩ mobimba, nʼabʼesyongubi mobabuha; ebyosĩ ebĩ, mobyabya bitya erĩhĩka aho buhere bwʼerĩokererya bwamabihwera.

²⁹Neryo babere babibuga erihera obuhere, omwami nʼabosĩ ababya haguma naye mobũnama nʼerĩramya.

³⁰Kandi omwami Hezekĩa nʼabakulu na Abalawĩ eriimbira Omwami Mukulu eripipa omo bĩnywa bya Dawĩdĩ, nʼebya Asafũ omũlangĩrĩ. Neryo mobimba eripipa nʼobutseme, mobũnama nʼerĩramya.

³¹Neryo Hezekĩa mwasũbĩrya ati, Lino mwabiriyihigula busana nʼOmwami Mukulu; musegere hakũhĩ mulete esyohongo nʼamahere wʼewasĩnga omo nyũmba yʼOmwami Mukulu. Nʼendeko moyaleta esyohongo nʼamahere wʼewasĩngya; nʼababya bʼomutima owʼerianza mobaleta amahere wʼerĩokererya.

³²Nʼemiganzo yʼamahere wʼerĩokererya ago endeko yaleta yabya esyonume syʼesyonde makũmĩ alinda, nʼesyombangale erĩgana, nʼebyana byʼesyombũlĩ magana abiri. Esyosĩ esĩ syabya busana nʼobuhere bwʼerĩokererya busana nʼOmwami Mukulu.

³³Nʼebindu ebyahigulawa byabya esyonde syʼobulume magana ndatu (600) nʼesyombũlĩ elfu ĩsatu (3,000).

³⁴Nĩkwa abahererĩ babya bake, ibakataluka erikera amahere gosĩ wʼerĩokererya; kyaleka Abalawĩ, abagala babo, ĩbawatĩkyabo, erĩhĩka omugulu omũbĩrĩ amabihwa, nʼerĩhĩka aho abahererĩ bamabiyihigula; kusangwa Abalawĩ babya bʼemitima itunganene busana nʼeriyihigula kwilaba abahererĩ.

³⁵Nibya amahere wʼerĩokererya abya mangi, haguma nʼebĩsabũ byʼamahere wʼobuholo, na haguma nʼamahere wʼerĩpũlya busana nʼobuli buhere bwʼerĩokererya. Nʼomũbĩrĩ wʼenyũmba yʼOmwami Mukulu mwatondekwa atya.

³⁶Na Hezekĩa mwatsema, nʼabandu bosĩ, busana nʼekyo Mwami Mukulu akokotaya busana nʼabandu. Kusangwa omwatsi oyo abũlĩkĩranayabo.