Read nande 2 Emyatsi yʼEmigulu 30 Bible Online

2 Emyatsi yʼEmigulu 30 - nande bible

2 Emyatsi yʼEmigulu 30

¹Neryo Hezekĩa mwatumira oko Baĩsraelĩ bosĩ nʼAbayũda bosĩ, mwasakira Efũraĩmũ na Manase esyobarua ati bahĩke omo nyũmba yʼOmwami Mukulu eYerũsalema, eriyira ebiro bikulu byʼErikiruka busana nʼOmwami Mukulu, Nyamuhanga wa Ĩsraelĩ.

²Kusangwa omwami nʼabanya-mwami buwe, nʼendeko yosĩ ibamabiya embĩta erĩteya erikiruka oko mukera wʼakabiri.

³Kusangwa mobatatoka erĩteyalyo oko mugulu oyo, kusangwa abahererĩ isibetayihigula omo miganzo ĩhĩkene, kutse nʼabandu ĩsĩbalĩbahĩndana eYerũsalema.

⁴Nʼomwatsi oyo mowana omo meso wʼOmwami nʼa wʼendeko yosĩ.

⁵Neryo mobahanganĩa omugambo erĩtũlaganĩalyo omo Ĩsraelĩ yosĩ erĩtsũka eBerĩ-seba nʼerĩhĩka eDanĩ, base eriyira Erikiruka busana nʼOmwami Mukulu, Nyamuhanga wa Ĩsraelĩ, eYerũsalema; kusangwa abangi mobatabya bakayiralyo ngoko kyabya kĩsakĩre.

⁶Neryo abakwenda mobagenda nʼesyobarua esĩkalũa oko mwami nʼabanya-mwami buwe eriya eĨsraelĩ nʼeYũda hosĩ ngʼekihano kyʼOmwami, bati, Ĩnywe bana ba Ĩsraelĩ, musube oko Mwami Mukulu, Nyamuhanga wa Abrahamũ, Ĩsaka, na Ĩsraelĩ, atoke erisuba ũkwʼĩnywe ababala nʼerĩsĩgala oko byala byʼabami bʼeAsũrĩa.

⁷Kandi Simubye ngʼabotata wenyũ, kandi ngʼabagala benyũ, abalegula busana nʼOmwami Mukulu, Nyamuhanga wʼabotata wabo, kyaleka iniayirabo mo nye, ngoko mukalangira.

⁸Na lino Simubye bʼebĩkya bĩkalĩre, ngoko abotata wenyũ babya; nĩkwa muyihe oko Mwami Mukulu, mwingire ahabũyĩrĩre huwe, aho ahigula busana na kera na kera, mukolere Omwami Mukulu Nyamuhanga wenyũ, erihitana liwe lĩkalĩre litoke erĩbalũako.

⁹Kusangwa mwamasuba oko Mwami Mukulu, abagala benyũ nʼabana benyũ basyabana eriganyirwa embere wʼabahekabo mo banyegwa, nabo ibasuba omo kihugo ekĩ; kusangwa Omwami Mukulu Nyamuhanga wenyũ ni wʼolukogo nʼowʼeriganyira, ĩsĩendĩsyalũsya obũsũ buwe ũkwʼĩnywe, mwamamusubako.

¹⁰Neryo abakwenda mobalaba oko buli mũyĩ omo kihugo kya Efũraĩmũ na Manase, erĩhĩka nʼeZebũlonĩ, nĩkwa mobasekereryabo, nʼerĩsĩnĩngũlĩrabo.

¹¹Nĩkwa abandi bandu Abaaserĩ nʼAbamanase, nʼAbazebũlũnĩ mobayĩkehya, mobasa eYerũsalema.

¹²Nʼebyala bya Nyamuhanga mobyahĩka uku Yũda nʼerihabo omutima muguma wʼerikola erihana lyʼOmwami nʼeryʼabanya-mwami busana nʼekĩnywa kyʼOmwami Mukulu.

¹³Nʼoko mukera wʼakabiri abandu bangi mobahĩndana eYerũsalema eriyira ebiro bikulu byʼamandu awate mo kĩhamya, ini ndeko nene kutsibu.

¹⁴Neryo mobahangana mobalũsya ekiherero ekyabya eYerũsalema, mobalũsya ebiherero byosĩ ebyʼobukwa, mobagusabyo omo kũsĩ kʼeKĩdũronĩ.

¹⁵Mobakera Erikiruka oko kiro kyʼerĩkũmĩ nʼebini kyʼomukera wʼakabiri; nʼabahererĩ nʼAbalawĩ mobahemuka, mobayihigula, mobaleta amahere wʼerĩokererya omo nyũmba yʼOmwami Mukulu.

¹⁶Mobahangana eriyitondeka omo myanya yabo, ngʼekihano kya Musa omundu wa Nyamuhanga. Nʼabahererĩ mobatsatsanga omusasi ogo bangirira omo byala byʼAbalawĩ.

¹⁷Kusangwa habya bangi omo ndeko abatayĩhĩgwĩre. Busana nʼekyo, Abalawĩ mobabya bakasondola erikera Erikiruka busana nʼobuli mundu oyũterĩre, erihigulabo busana nʼOmwami Mukulu.

¹⁸Kusangwa endeko yʼabandu, abangi Abaefũraĩmũ, nʼAbamanase, nʼAbaĩsakarĩ, nʼAbazebũlũnĩ, ĩsĩbayerĩrye nĩkwa mobalya Erikiruka nĩkwa butsira ngoko kyasakawa. Kusangwa Hezekĩa abya iniabirisabirabo, ati, Omwami Mukulu mubuya abuyire omundu

¹⁹oyũkahĩra omutima wuwe erisonda-sonda Nyamuhanga, Omwami Mukulu, Nyamuhanga wʼabotata wuwe, nomo angabya ĩsĩerĩre ngʼeriera lyʼahabũyĩrĩre ko liri.

²⁰Litya Omwami Mukulu mowa Hezekĩa, mwalamya abandu.

²¹Nʼabana ba Ĩsraelĩ ababya eYerũsalema mobayira ebiro bikulu byʼamandu awate mwʼekĩhamya ebiro birinda nʼobutseme bunene; nʼAbalawĩ nʼabahererĩ mobapipa Omwami Mukulu ekiro nʼekiro, eriimbira Omwami Mukulu omo bindu byʼeriimba byʼomulenge munene.

²²Na Hezekĩa mwabũga ebĩnywa byʼerĩsĩkya emitima yʼAbalawĩ bosĩ ababya nʼeriminya lyowene omo myatsi yʼOmwami Mukulu. Omo biro birinda mobalya okwʼirya ĩnene ko batya, ibakahera esyohongo syʼamahere wʼobuholo nʼeriha ewasĩngya oko Mwami Mukulu, Nyamuhanga wʼabotata wabo.

²³Nʼendeko yosĩ mobayisoga erikwama erirya ĩnene eryo ebindi biro birinda; neryo mobalyalyo ebiro birinda ebyo nʼobutseme.

²⁴Kusangwa Hezekĩa omwami wʼeYũda mwaha endeko eyo esyonume syʼesyonde elfu nguma (1,000), nʼesyombũlĩ elfu irinda (7,000); nʼabanya-mwami mobaha endeko esyonume syʼesyonde elfu nguma (1,000), nʼesyombũlĩ elfu ĩkũmĩ (10,000); nʼabahererĩ bangi kutsibu mobayihigula.

²⁵Nʼendeko yosĩ ya Yũda haguma nʼabahererĩ nʼAbalawĩ, nʼendeko yosĩ abalũa eĨsraelĩ; nʼababunga abalũa omo kihugo kya Ĩsraelĩ, nʼababya bĩkere eYũda, mobatsema.

²⁶Mobwabya butseme bunene eYerũsalema; kusangwa erĩtsũka oko migulu ya Solomono mugala wa Dawĩdĩ omwami wa Ĩsraelĩ, isihetabya mwatsi alingene nʼoyũ eYerũsalema.

²⁷Neryo abahererĩ Balawĩ mobahangana mobatsumula abandu; nʼomulenge wabo mwowĩka, nʼerisaba lyabo molyahĩka ahʼerĩĩkala liwe lĩbũyĩrĩre omo lubula.