Read nande 2 Emyatsi yʼEmigulu 31 Bible Online

2 Emyatsi yʼEmigulu 31 - nande bible

2 Emyatsi yʼEmigulu 31

¹Neryo ebyosĩ ebĩ byabere byahwa, Abaĩsraelĩ bosĩ ababyaho mobaya oko mĩyĩ ya Yũda, mobatulanga esyondũyĩ mo bihande, nʼerikondera esyosanamu sya Asera syʼahisi, nʼerisambula ahendata nʼebiherero eYũda hosĩ nʼeBenyamĩna, nʼomo Efũraĩmũ nibya, nʼewa Manase, erĩhĩka aho bamabĩhererya ebyosĩ. Neryo abana ba Ĩsraelĩ bosĩ mobasubula, obuli mundu oko bũsokĩ buwe, omo mĩyĩ yabo.

²Na Hezekĩa mwahĩra erigabana lyʼabahererĩ nʼAbalawĩ oko milondo yabo, obuli mundu ngʼomũbĩrĩ wuwe, abahererĩ nʼAbalawĩ, busana nʼamahere wʼerĩokererya, na busana nʼamahere wʼobuholo, erikola nʼeriha ewasĩngya nʼeripipa omo syongyo syʼekilaliriro kyʼOmwami Mukulu.

³Kandi mwahĩra nibya erĩgabo lyʼOmwami oko bindu biwe busana nʼamahere wʼerĩokererya, awʼetũtũtũ nʼerĩgolo, nʼamahere wʼerĩokererya busana nʼesyo Sabato, na busana nʼemikera mihya-mihya, na busana nʼebiro bikulu ebyahĩrawa, ngoko kĩsakĩre omo migambo yʼOmwami Mukulu.

⁴Kandi mwahana abandu ababya bĩkere eYerũsalema eriha erĩgabo lyʼabahererĩ nʼeryʼAbalawi, ibatoka erĩyĩhĩra oko migambo yʼOmwami Mukulu.

⁵Neryo erihamula eryo lyabere lyabihuluka, abana ba Ĩsraelĩ mobaha ebingi ebyʼobuyilula byʼengano, nʼebĩnyũ bihya-bihya, nʼamagũta, nʼobuki, nʼebyosĩ ebikera omo malima, nʼekihande kiguma kyʼerĩkũmĩ kyʼebindu byosĩ mobaleta bingi.

⁶Nʼabana ba Ĩsraelĩ na Yũda ababya bĩkere omu mĩyĩ ya Yũda, nabo mobaleta ekihande kiguma kyʼerĩkũmĩ kyʼesyonde syʼobulume nʼesyombũlĩ, nʼekihande kiguma kyʼerĩkũmĩ kyʼebindu ebyo byahigulawa busana nʼOmwami Mukulu Nyamuhanga wabo, mobabikabyo mo bilundo bilundo.

⁷Oko mukera wʼakasatu mobatsũka erĩhĩra ebilundo ebyo, neryo mobabugabyo omo mukera wʼakalinda.

⁸Nʼomugulu Hezekĩa nʼabatabalĩ basa bakalebya ebilundo ebyo, mobapipa Omwami Mukulu nʼabandu buwe Abaĩsraelĩ.

⁹Neryo Hezekĩa mwabũlĩrĩrya abahererĩ nʼAbalawĩ busana nʼebilundo.

¹⁰Na Azaria omũmĩnyererĩ mukulu, owʼekĩtũnga kya Zadokĩ, mwamũsũbĩrya ati, Erĩtsũka omugulu abandu batsũka erireta esyohongo omo nyũmba yʼOmwami Mukulu, twabiribana ebitutolere byʼerirya nʼebingi kwʼaho, kusangwa Omwami Mukulu abiritsumula abandu buwe; nʼebiriasaka byebĩ ni bingi.

¹¹Neryo Hezekĩa mwahanabo bakokotaye ebyumba omo nyũmba yʼOmwami Mukulu; nabo mobakokotyabyo.

¹²Neryo mobĩngĩrya erĩhĩtya nʼekiguma kyʼerĩkũmi nʼebindu ebyahigulawa. Na Konanĩa Omũlawi mwabya mukulu wabyo, na Sĩmeĩ mugala wabo abya wʼakabiri.

¹³Na Yehĩelĩ, na Azazĩa, na Nahatĩ, na Asahelĩ, na Yerĩmotĩ, na Yozabadĩ, na Elĩelĩ, na Ĩsĩmakĩa, na Mahatĩ, na Benaya, babya balangĩrĩ omo hamũlĩ ya Konanĩa na Sĩmeĩ mugala wabo, omwʼihana lyʼOmwami Hezekĩa, na Azaria abya mũtabali mukulu wʼenyũmba yʼOmwami Mukulu.

¹⁴Na Kore mugala wa Ĩmũna Omũlawĩ, omũteya wʼolũkyo lwʼebwanga bwʼendata abya mũhanganĩrĩ wʼamahere wʼerĩhĩtya lyʼolwanzo lwa Nyamuhanga, erigaba erĩhĩtya lyʼOmwami Mukulu, nʼebindu ebyo bĩbũyĩre kutsibu.

¹⁵Nʼabʼehamũlĩ yiwe babya Edenĩ, na Mĩnĩamĩnĩ, na Yesũa, na Sĩmaya, na Amarĩa, na Sekanĩa, omo mĩyĩ yʼabahererĩ, erigabira bagala babo butalegula oko magabo wabo omo milondo yʼabakulu bakulu, kutse bake-bake,

¹⁶butsira amasako wʼesyondengo oko balume, abʼemyaka makũmĩ asatu nʼabakulu kwʼaho, obuli muguma oyo wingira omo nyũmba yʼOmwami Mukulu, ngoko mũbĩrĩ wʼobuli kiro kwʼayĩsũnza, busana nʼemĩbĩrĩ yabo omo myanya yabo ngʼemilondo yabo.

¹⁷Kandi busana nʼabahererĩ abaganzawa oko syondengo syʼabahererĩ ngʼebĩtũnga byʼabotata wabo, nʼAbalawĩ abʼemyaka makũmĩ abiri nʼabakulu kwʼaho, omo myanya yabo yʼomũbĩrĩ nʼemilondo yabo.

¹⁸Nʼerisaka lyʼabaganzawa oko syondengo molyabya lyʼabana balere babo bosĩ, abakalĩ babo, nʼabagala, nʼabali, omo ndeko yosĩ; kusangwa mobayihigula butalegula omo lĩbũyĩrĩre.

¹⁹Kandi busana nʼabagala ba Harũnĩ abahererĩ ababya omo malĩsĩryo omo hĩyĩ hyabo, kutse omo buli mũyĩ habya abalume abahulawa omo mena erigabira abalume bosĩ amagabo omo katĩkatĩ kʼabahererĩ nʼoko bosĩ abaganzawa omo syondengo omo katĩkatĩ kʼAbalawĩ.

²⁰Hezekĩa kwʼakola atya omo Yũda hosĩ; mwakola ebibuya, nʼebitunganene, nʼebyʼekwenene embere syʼOmwami Mukulu Nyamuhanga wuwe.

²¹Nʼomo buli mũbĩrĩ ogo atsũka omo mũbĩrĩ wʼenyũmba ya Nyamuhanga, omo migambo nʼomo bihano, erisonda-sonda Nyamuhanga wuwe, mwakolabyo nʼomutima wuwe gosĩ, neryo mwagasa.