Read nande 2 Emyatsi yʼEmigulu 32 Bible Online

2 Emyatsi yʼEmigulu 32 - nande bible

2 Emyatsi yʼEmigulu 32

¹Nʼenyũma wʼemyatsi eyĩ, nʼeritindalegula erĩ, Senakarĩbũ omwami wʼeAsũrĩa mwasa, nʼeriingira eYũda mwahanda ekilaliriro erilwa nʼemĩyĩ eyikongotere, mwaganĩrya erĩkĩndayo busana naye ĩyowene.

²Neryo omugulu Hezekĩa alangira ngoko Senakarĩbũ amabĩhĩka, kandi ngoko asũnzĩkanaya erilwa nʼeYerũsalema,

³Hezekĩa mwayĩsũnza haguma nʼabakulu buwe nʼesyombangĩ siwe erĩrĩba amagetsi wʼesyongũnũnũko esyabya eyĩhya wʼomũyĩ; nabo mobamũwatĩkya.

⁴Mobahĩndana batya abandu bangi, mobalĩba esyongũnũnũko syosĩ, nʼakũsĩ ako akasenda omo katĩkatĩ kʼekihugo, bati, Busana nakĩ abami bʼeAsũrĩa bangasa nʼeribana amagetsi mangi kwehĩ?

⁵Neryo Hezekĩa mwahanda omutima, mwaswahĩmba olũhĩmbo losĩ olwabya lusambukere kandi mwasingika kulo kwʼesyonyũmba ĩsĩsũngũlĩkĩre, kandi mwahĩmba olundi lũhĩmbo eyĩhya kulo. Kandi mwasĩkya eMĩlo omo mũyĩ wa Dawĩdĩ, mwakokotya ebindu byʼamalwa nʼesyongabo nyingi.

⁶Mwahĩra abakulu bʼamalwa oko bandu, mwayahĩndanĩabo omo kibuga oko lũkyo lwʼomũyĩ, neryo mwasĩkya emitima yabo ati,

⁷Muyire amaka, muhande emitima simubahe kutse erĩhanga-hangya busana nʼomwami wʼeAsũrĩa, kutse busana nʼomulondo gosĩ owali haguma naye; kusangwa oyuli haguma netu ni mukulu kwilaba oyuli naye.

⁸Okuboko kʼomubiri kuli haguma naye; nĩkwa haguma netu ni Mwami Mukulu Nyamuhanga wetu erĩtũwatĩkya nʼeritulwira malwa wetu. Nʼabandu mobayiketera ebĩnywa bya Hezekĩa omwami wʼeYũda.

⁹Enyũma wʼaho Senakarĩbũ omwami wʼeAsũrĩa mwatuma abagombe buwe eYerũsalema iniane eLakĩsĩ nʼemilondo yiwe yosĩ haguma naye, uku Hezekĩa omwami wʼAbayũda, nʼoko Bayũda bosĩ ababya eYerũsalema ati,

¹⁰Senakarĩbũ omwami wʼeAsũrĩa akabũga ati, Mukayiketerakĩ kwehi?, muti mũkĩkala eYerũsalema eyĩyĩbambĩrweko,

¹¹Hezekĩa siakabateba-teba erĩbĩta nʼenzala nʼenyota, ati, Omwami Mukulu Nyamuhanga wetu asyatũlamya omo byala byʼOmwami wʼeAsũrĩa.

¹²Si nina Hezekĩa oyo walũsaya ahendata huwe nʼebiherero biwe kwehĩ, nʼerihamula Abayũda nʼAbanya Yerũsalema, ati, Mwasyaramya embere syʼekiherero kiguma, nʼendata kukyo imwahĩsya obukwa?

¹³Sĩmwasĩ ebyo ĩngye nʼabotata wage twakola oko bandu bosĩ bʼebihugo kwehi? Esyonyamuhanga syʼebihanda byʼebihugo mosyanatoka erĩlamya ekihugo kyabo omo byala byage kwehĩ?

¹⁴Nindi omo katĩkatĩ kʼesyonyamuhanga syosĩ syʼebihanda ebyo abotata wage baheraya, oyo wagatoka erĩlamya abandu buwe omo byala byage, muti Namuhanga wenyũ angatoka erĩbalamya omo byala byage kwehĩ?

¹⁵Neryo lino simuleke Hezekĩa akabateba, kutse erĩbatalya omo mũsĩndo oyũ, kandi sĩmũmwĩkĩrĩraye, kusangwa sihali nyamuhanga wʼekihanda nʼekiguma kutse wʼobwami nʼobuguma oyo wangatoka erĩlamya bandu buwe omo byala byage, kutse omo byala byʼabotata wage. Kwilaba ho kangahi Nyamuhanga wenyũ asyatoka erĩbalamya omo byala byage kwehĩ?

¹⁶Nʼabagombe buwe mobabũga nabi kandi busana nʼOmwami Mukulu Nyamuhanga, na busana na Hezekĩa omugombe wuwe.

¹⁷Kandi mwasaka esyobarua nibya, eritsuma Omwami Mukulu Nyamuhanga wa Ĩsraelĩ, nʼerĩbũga nabi busana naye, ati, Ngoko esyonyamuhanga syʼebihanda syʼebihugo, esĩtalamaya abandu babo omo byala byage, litya Nyamuhanga wa Hezekĩa sĩendĩsyalamya abandu buwe omo byala byage.

¹⁸Mobabirikira nʼomulenge munene omo mũbũge wʼAbayũda oko bandu bʼeYerũsalema ababya oko lũhĩmbo, erĩũbahyabo, nʼerĩĩtabo obuba, bati batoke erihũnga omũyi.

¹⁹Neryo mobahula Nyamuhanga wʼeYerũsalema ngoko bakahula esyonyamuhanga syʼabandu bʼekihugo, esyakokotĩbawa omo mĩbĩrĩ yʼebyala byʼabandu.

²⁰Nĩkwa omwami Hezekĩa, nʼomũmĩnyererĩ Ĩsaya mugala wa Amosĩ, mobasaba busana nʼomwatsi oyũ, mobalakira elubula.

²¹Neryo Omwami Mukulu mwatuma omũlaĩka, oyo watĩnda esyombangĩ syosĩ syʼamaka, nʼomũsondolĩ nʼabakulu omo kilaliriro kyʼOmwami wʼeAsũrĩa. Neryo mwasuba omo kihugo kiwe nʼesĩsonĩ. Nʼomugulu ahĩka omo hekalũ ya nyamuhanga wuwe, bagala buwe abo abuta mobamwĩtĩraho omo mũyalĩ.

²²Omwami Mukulu kwʼalamaya Hezekĩa yʼatya nʼesyondũlanĩ syʼeYerũsalema omo byala bya Senakarĩbũ omwami wʼeAsũrĩa, nʼomo byala byʼabandi bosĩ, mwasondolabo omo mbande syosĩ.

²³Nʼabangi mobaletera Omwami Mukulu ebihembo eYerũsalema, nʼebindu byʼobũgũlĩ bunene uku Hezekĩa omwami wʼeYũda; erĩtsũka ekiro ekyo kyaleka ĩnĩahamĩbwa omo meso wʼebihanda byosĩ.

²⁴Oko biro ebyo Hezekĩa mwalwala hakũhĩ nʼerihola; neryo mwasaba Omwami Mukulu, nʼOmwami Mukulu mwabũga naye mwamuha ekiminyikalo.

²⁵Nĩkwa Hezekĩa mwatasũbũlya ndeke ngʼolulengo lʼomũyĩsa akolerawa, kusangwa omutima wuwe ayiheka; busana nʼekyo erihitana molyambyako, nʼoko Yũda nʼeYerũsalema.

²⁶Nĩkwa Hezekĩa mwayĩkehya busana nʼeriyiheka lyʼomutima wuwe, iye nʼesyondũlanĩ syʼeYerũsalema kyaleka erihitana lyʼOmwami Mukulu ĩrĩtahĩka kubo omo biro bya Hezekĩa.

²⁷Na Hezekĩa abya nʼebindu binene kutsibu nʼerĩsĩkĩbwa; naye mwayibanira esyombĩso syʼebĩtsĩpa, nʼesyamagetsi, na busana nʼamabwe wʼobũgũlĩ bunene, na busana nʼebikakumba ndeke, na busana nʼesyongabo, na busana nʼemihanda yosĩ yʼebindu byowene;

²⁸amanyũmba wʼesyombĩso nibya busana nʼerikanya lyʼesyombuto, ebĩnyũ bihya-bihya nʼamagũta; nʼamanyũmba busana nʼesyonde syʼemihanda yosĩ, nʼebĩyĩte busana nʼebihangulo.

²⁹Kandi mwayibanira emĩyĩ, nʼebĩhyo nʼebihangulo bingi; kusangwa Nyamuhanga iniabirimuha obũsokĩ bunene.

³⁰Hezekĩa oyũ yo walĩba esyongũnũnũko syʼendata syʼamagetsi weʼeGĩhonĩ, neryo mwandagalyago oko luhande lwʼeyĩkwa lʼomũyĩ wa Dawĩdĩ. Na Hezekĩa mwagasa omo mĩbĩrĩ yiwe yosĩ.

³¹Nĩkwa omo mwatsi wʼabakwenda bʼabakulu bʼeBabelĩ, abamutumako erĩbũlya ebyʼeriswekera ebyakolawa omo kihugo, Nyamuhanga mwamũsĩganĩa erimulengako, iniatoka eriminya ebyosĩ ebyabya omo mutima wuwe.

³²Neryo eyindi mĩbĩrĩ ya Hezekĩa, nʼemĩbĩrĩ yiwe yowene, lebaya, ĩsakĩre omo syonzolĩ syʼomũmĩnyererĩ Ĩsaya mugala wa Amosĩ, omo kitabu kyʼabami bʼeYũda na Ĩsraelĩ.

³³Na Hezekĩa mweya abotata-kulu buwe, mobamuta omo kisambiro kyʼesisinda syʼabagala ba Dawĩdĩ. NʼeYũda yosĩ nʼesyondũlanĩ syʼeYerũsalema mobamũsikya oko luholo luwe. Na Manase mugala wuwe mwabya mwami omo mwanya wuwe.