Read nande 2 Emyatsi yʼEmigulu 33 Bible Online

2 Emyatsi yʼEmigulu 33 - nande bible

2 Emyatsi yʼEmigulu 33

¹Manase abya wʼemyaya ĩkũmĩ nʼeyĩbĩrĩ omugulu atsũka eritabala; mwatabala emyaka makũmĩ atanu nʼeyĩtanu.

²Naye mwakola ekibi omo meso wʼOmwami Mukulu, erikwama esyonye syʼebihanda ebyo Mwami Mukulu ahiga embere syʼabana ba Ĩsraelĩ.

³Kusangwa mwahĩmba kandi ahendata aho tata wuwe Hezekĩa asambula; kandi mwahanganĩa ebiherero busana na Baalĩ, mwakokotya esyosanamu sya Asera, mwaramya omulondo gosĩ wʼelubula, nʼerikolerago.

⁴Mwahĩmba ebiherero omo nyũmba yʼOmwami Mukulu, aho Mwami Mukulu abũga ati, Omo Yerũsalema hasyabya erĩna lyage kera na kera.

⁵Kandi mwahĩmba ekiherero busana nʼomulondo gosĩ wʼelubula omo bibuga bibiri byʼenyũmba yʼOmwami Mukulu.

⁶Nibya mwalabya abana buwe omo muliro omo musya wa Benĩ-hĩnomũ; kandi mwabya akalagula omo myatsi yʼekyanya, kandi mwakola omo syongĩsa, nʼerilagula, mwagenda oko bʼesyombĩnga, nʼeriya oko bakũmũ; mwakola ebibi bingi omo meso wʼOmwami Mukulu, erĩmũhĩtanĩa.

⁷Kandi mwasingika esanamu eyo abatsa omo nyũmba ya Nyamuhanga eyo ahũlĩraya Dawĩdĩ nʼomugala wuwe Solomono, ati, Omo nyũmba eyĩ nʼomo Yerũsalema, ebyo nayisoga omo katĩkatĩ kʼebihanda byosĩ bya Ĩsraelĩ, ho nasyahĩra erĩna lyage kera na kera:

⁸kutse sindiendĩsyaswalũsya ekisando kya Ĩsraelĩ omo kihugo ekyo nahamulira abotata wenyũ, bamateya erikola ebyosĩ ebyo nahana busana nabo, ebihano, nʼemigambo, nʼebilayiro omo buno bwa Musa.

⁹Neryo Manase mwateba Yũda nʼesyondũlanĩ syʼeYerũsalema kyaleka ibakola ebibi kwilaba ebihanda ebyo Mwami Mukulu aheraya embere syʼabana ba Ĩsraelĩ.

¹⁰Neryo Omwami Mukulu mwabwira Manase nʼabandu buwe; nĩkwa mobatowa.

¹¹Busana nʼekyo Omwami Mukulu mwaleta kubo abakulu bʼemilondo yʼOmwami wʼeAsũrĩa, mobahamba Manase omo mbaniko omo nĩndo, nʼerimuboha omo misege yʼemiringa, mobamutwala eBabelĩ.

¹²Nʼomugulu abya omo bũlĩge, mwalakira Omwami Mukulu Nyamuhanga wuwe, mwayĩkehya kutsibu embere sya Nyamuhanga wʼabotata buwe.

¹³Omugulu Manase amusaba, Omwami Mukulu mwamũlĩgĩra, mowa erilaka liwe, mwamũsũbya eYerũsalema omo bwami buwe. Neryo Manase mwaminya ngoko Mwami Mukulu yo na Nyamuhanga.

¹⁴Neryo enyũma kwʼaho Manase mwahĩmba olũhĩmbo lwʼeyĩhya wʼomũyĩ wa Dawĩdĩ, oko luhande lwʼeyĩkwa lwʼe Gĩhonĩ, omo musya, erĩhĩka oko Lũkyo lwʼeringirira lwʼAmahere; neryo mwatĩmbya mulo mwʼeOfelĩ, mwalolyalo endata kutsibu. Kandi mwahĩra abakulu bʼabasĩrĩkanĩ omo mĩyĩ yosĩ yʼeYũda eyikongotere.

¹⁵Kandi mwalũsya esyonyamuhanga syʼehandi, nʼesanamu eyabya omo nyũmba yʼOmwami Mukulu, nʼebiherero byosĩ ebyo abya abĩrĩhĩmba oko kitwa kyʼenyũmba yʼOmwami Mukulu, nʼeYerũsalema, mwagusabyo eyĩhya wʼomũyĩ.

¹⁶Neryo mwahĩmba ekiherero kyʼOmwami Mukulu, mwaherera kukyo esyohongo syʼamahere wʼobuholo nʼeriha ewasĩngya, kandi mwahana Yũda ati bakolere Omwami Mukulu Nyamuhanga wa Ĩsraelĩ.

¹⁷Nĩkwa abandu ibakinahongera ahendata, nĩkwa ini busana nʼOmwami Mukulu Nyamuhanga wabo musa.

¹⁸Nʼeyindi mĩbĩrĩ ya Manase, nʼerisaba liwe uku Nyamuhanga wuwe, nʼebĩnywa byʼabahanĩ ababũga naye omo lĩna lyʼOmwami Mukulu, Nyamuhanga wa Ĩsraelĩ, lebaya, bĩsakĩre omo mĩbĩrĩ yʼabami ba Ĩsraelĩ.

¹⁹Nʼerisaba liwe nibya, kandi ngoko Nyamuhanga amũlĩgĩra erĩmowa, nʼebibi biwe byosĩ, nʼerilegula liwe, nʼaho ahĩmba ahendata, nʼerisingika esyosanamu sya Asera, nʼesindi sanamu esĩbatsĩre, emuliro wʼerĩyĩkehya liwe, lebaya bĩsakĩre omo myatsi ya Hozaĩ.

²⁰Neryo Manase mweya abotata-kulu buwe, mobamuta omo nyũmba yiwe. Na Amonĩ mugala wuwe mwabya mwami omo mwanya wuwe.

²¹Amonĩ abya wʼemyaka makũmĩ abiri nʼeyĩbĩrĩ omugulu atsũka eribya mwami, neryo mwatabala eYerũsalema emyaka ĩbĩrĩ.

²²Mwakola ebibi omo meso wʼOmwami Mukulu ngoko tata wuwe Manase akola; na Amonĩ mwaherera esyosanamu syosĩ esĩbatsĩre, esyo tata wuwe Manase akokotaya, mwakolerasyo.

²³Mwatayĩkehya embere syʼOmwami Mukulu, ngoko tata wuwe Manase ayĩkehaya; nĩkwa Amonĩ mwakanyĩrĩrya ebibi biwe.

²⁴Nʼabagombe buwe mobamuyira embĩta nyibi, mobamwĩtĩra omo nyũmba yiwe.

²⁵Nĩkwa abandu bʼekihugo mobĩta abosĩ abayira omwami Amonĩ embĩta nyibi; nʼabandu bʼekihugo mobayira Yosĩa mugala wuwe mo mwami omo mwanya wuwe.