Read nande 2 Emyatsi yʼEmigulu 34 Bible Online

2 Emyatsi yʼEmigulu 34 - nande bible

2 Emyatsi yʼEmigulu 34

¹Yosĩa abya wʼemyaka munani omugulu atsũka eribya mwami; mwatabala emyaka makũmĩ asatu nʼomuguma eYerũsalema.

²Mwakola ebibuya omo meso wʼOmwami Mukulu, mwalendera omo nzira sya Dawĩdĩ tata-kulu wuwe, mwatakitira oko mali kutse oko malembe.

³Kusangwa oko mwaka wʼomunai wʼeritabala liwe, iniakine mũlwana, mwatsũka erisonda-sonda Nyamuhanga wa tata-kulu wuwe Dawĩdĩ; nʼoko mwaka wʼerĩkũmĩ nʼeyĩbĩrĩ mwatsũka erĩbĩrya eYũda, nʼeYerũsalema erĩlũsya ahendata nʼesyosanamu sya Asera, nʼesyosanamu esĩbatsĩre, nʼesyosanamu syʼerĩnũnĩa.

⁴Kandi mobasambula ebiherero bya Balĩ embere siwe; nʼesyosanamu syʼeryuba esyabya endata kubyo, mwakonderasyo ahisi; na Asera, nʼesyosanamu esĩbatsĩre, nʼesyosanamu syʼerĩnũnĩa, mwatulangasyo mo bihande bihande, mwayirasyo mo lũtũtũ, mũtulĩralo oko masinda wʼabo bahererasyo.

⁵Kandi mwahĩsĩrya amakũha wʼabahererĩ oko biherero byabo, mwabĩrya eYũda nʼeYerũsalema.

⁶Mwakola atya omo mĩyĩ ya Manase nʼeya Efũraĩmũ, na Sĩmeonĩ, erĩhĩka ewa Nafũtalĩ omo bĩma ebĩtĩmbĩreho.

⁷Neryo mwasambula ebiherero, mwatũndũla Asera nʼesyosanamu esĩbatsĩre ngʼolũtũtũ, kandi mwakondera esyosanamu syosĩ syʼeryuba ahisi omo kigugo kyosĩ kya Ĩsraelĩ, neryo mwasuba eYerũsalema.

⁸Neryo omo mwaka wʼerĩkũmĩ nʼomunani wʼeritabala liwe, omugulu amabĩbĩrya ekihugo nʼenyũmba, mwatuma Safanĩ mugala wa Azalĩa, na Maseya omũtabalĩ wʼomũyĩ, na Yoa mugala wa Yoahazĩ omũhandĩkĩ wʼemyatsi, erĩsũbya enyũmba yʼOmwami Mukulu Nyamuhanga wuwe.

⁹Neryo mobahĩka uku Hĩlkĩa omũhererĩ mukulu, mobamuha esyofranka esyaletawa omo nyũmba ya Nyamuhanga, esyo Abalawĩ, abateya bʼolũkyo, bakuma-kuma omo byala bya Manase na Efũraĩmũ, nʼabasĩgala oko Baĩsraelĩ nʼAbayũda bosĩ na Benyamĩna, nʼesyondũlanĩ syʼeYerũsalema.

¹⁰Mobahĩrasyo omo byala byʼabakolĩ ababya bakateya enyũmba yʼOmwami Mukulu; nʼabakolĩ bʼonũbĩrĩ abakola omo nyũmba yʼOmwami Mukulu mobakola mubyo busana nʼerisũbya nʼerĩowanĩa enyũmba.

¹¹Mobahasyo oko babatsĩ nʼabahĩmbĩ, erigula amabwe awabatsĩre, nʼemiti yʼerĩhĩndanĩryako, nʼeriyira emigamba busana nʼamanyũmba ago abami ba Yũda baheraya.

¹²Nʼabandu mobakola omũbĩrĩ butalegula; nʼabahanganĩrĩ babo babya Yahatĩ, na Obadĩa, Abalawĩ, bʼabagala ba Merarĩ; na Zekarĩa, na Mesũlamũ, bʼabagala bʼAbakohatĩ, nʼAbalawĩ, abosĩ babya banyima-nyima bʼebindu byʼeriimba.

¹³Kandi mobabya bateya bʼabahekĩ bʼemiheke, mobasondola erilangira abosĩ abakola omũbĩrĩ omo mĩsĩndo yosĩ yʼomũbĩrĩ; nʼomo Balawĩ mohabya abahandĩkĩ, nʼabakulu nʼabateya bʼesyongyo.

¹⁴Neryo omugulu bahũlũkaya esyofranka esyaletawa omo nyũmba yʼOmwami Mukulu, omũhererĩ Hĩlkia mwabana ekitabu kyʼemigambo yʼOmwami Mukulu eyahabawa omo byala bya Musa.

¹⁵Na Hĩlkĩa mwasũbĩrya mwabwira omũhandĩkĩ Safanĩ ati, Nabiribana ekitabu kyʼemigambo omo nyũmba yʼOmwami Mukulu. Na Hĩlkĩa mwaha ekitabu ekyo kyo Safanĩ.

¹⁶Na Safanĩ mwatwala ekitabu ekyo oko mwami, kandi mwaletera omwami engulu, ati, Ebyosĩ ebyalayirawa abagombe bawe, banemukolabyo.

¹⁷Nabo babĩrĩũtũla esyofranka esyo syabanika omo nyũmba yʼOmwami Mukulu, babĩrĩhĩrasyo omo byala byʼabahanganĩrĩ, nʼomo byala byʼabakolĩ bʼomũbĩrĩ.

¹⁸Nʼomũhandĩkĩ Safanĩ mwabwira omwami ati, Omũhererĩ Hĩlkĩa abirimba ekitabu. Na Safanĩ mwasoma mukyo embere syʼOmwami.

¹⁹Neryo omugulu omwami owa ebĩnywa byʼemigambo, mwatulanga esyongimba siwe.

²⁰Nʼomwami mwahana Hĩlkĩa, na Ahĩkamũ mugala wa Safanĩ, na Abũdonĩ, mugala wa Mĩka, nʼomũhandĩkĩ Safanĩ, na Asaya omugombe wʼOmwami ati,

²¹Mugende, mũbũlaye Omwami Mukulu busana nage, na busana nʼabo basĩgala eĨsraelĩ, nʼeYũda, busana nʼebĩnywa byʼekitabu ekyabanika; kusangwa erihitana lyʼOmwami Mukulu nĩ rĩnene eryamũtũlĩrwa ũkwʼĩtwe, kusangwa abotata wetu mobatateya ekĩnywa kyʼOmwami Mukulu erikola ngʼebyosĩ ebĩsakĩre omo kitabu ekĩ.

²²Neryo Hĩlkĩa nʼabo mwami alayira, mobaya eyiri Hũlda omũkalĩ mũmĩnyererĩ, omũkalĩ wa Salumu mugala wa Tohatĩ, mugala wa Hasĩra, omũteya wʼesyongimba naye abya ĩkere eYerũsalema omo ngonde yʼakabiri; nabo mobamubwira omwatsi oyũ.

²³Naye mwabwirabo ati, Omwami Mukulu Nyamuhanga wa Ĩsraelĩ akabũga ati, Mubwire omundu oyo wabatuma kwĩngye muti,

²⁴Omwami Mukulu akabũga ati, Mũlebaye, nasyaleta ekibi kyo hano, na busana nʼesyondũlanĩ syʼaho, ebĩtsũmĩ byosĩ ebĩsakĩre omo kitabu ekyo balyasomera embere syʼOmwami wa Yũda.

²⁵Kusangwa babĩrĩnyĩsĩganĩa, nʼerĩhĩsya obukwa oko Sindi nyamuhanga, batoke erĩnyĩhĩtanĩa omo mĩbĩrĩ yosĩ yʼebyala byabo; busana nʼekyo erihitana lyage lĩkũtũlĩrawa hano, nalyo sĩryendĩsyalĩmĩbwa.

²⁶Nĩkwa omwami wa Yũda oyo wabatuma erĩbũlya Omwami Mukulu, mwasyamubwira muti, Omwami Mukulu Nyamuhanga wa Ĩsraelĩ akabũga ati, Busana nʼebĩnywa ebyo wabĩrĩowa,

²⁷kusangwa omutima wawe abya olobĩre, nawe wabĩrĩyĩkehya embere sya Nyamuhanga, omugulu wowa ebĩnywa biwe busana na hano, na busana nʼesyondũlanĩ syʼaho, kandi wabĩrĩyĩkehya embere syage, nʼeritulanga esyongimba syawe, nʼeririra embere syage; Omwami Mukulu ati, Nabĩrĩkowa kwenene.

²⁸Lebaya nasyaleka ĩweya abotata-kulu bawe, nawe wasyahĩrwa omwʼisinda yawe mo buholo, kutse nʼameso wawe siendisyalangira ekibi kyosĩ ekyo nasyaleta busana na hano, na busana nʼesyondũlanĩ syʼaho. Neryo mobaswaleta engulu eyo oko mwami.

²⁹Neryo omwami mwatuma nʼerĩhĩndanĩa haguma abakulu bosĩ bʼAbayũda nʼeYerũsalema.

³⁰Nʼomwami mwahetukira oko nyũmba yʼOmwami Mukulu, nʼabandu bosĩ bʼAbayũda nʼesyondũlanĩ syʼeYerũsalema, abahererĩ, nʼAbalawĩ, nʼabandu bosĩ abakulu nʼabake-bake; neryo mwasomera omo matwĩ wabo ebĩnywa byosĩ byʼekitabu kyʼendagano ekyabanika omo nyũmba yʼOmwami Mukulu.

³¹Nʼomwami mwahangana aho wuwe, mwayira endagano embere syʼOmwami Mukulu, erikwama Omwami Mukulu, nʼerĩteya ebihano biwe, nʼerĩtũlago liwe, nʼemigambo yiwe, omo mutima wuwe gosĩ, nʼekĩrĩmũ kiwe kyosĩ, erikola ebĩnywa byʼendagano ebyasakawa omo kitabu ekĩ.

³²Kandi mwahatikana abosĩ ababanika eYerũsalema nʼewa Benyamĩna eriimana haguma naye. Nʼesyondũlanĩ syosĩ syʼeYerũsalema mobakola ngʼendagano ya Nyamuhanga kwʼiri, Nyamuhanga wʼabotata wabo.

³³Neryo Yosĩa mwalũsya esyonye syosĩ omo bihugo byosĩ ebyabya byʼabana ba Ĩsraelĩ. Kandi mwakolesya abosĩ ababyaho eĨsraelĩ, bakolere Omwami Mukulu Nyamuhanga wabo. Omo biro biwe byosĩ mobataleka erikwama Omwami Mukulu Nyamuhanga wʼabotata-kulu wabo.