Read nande 2 Emyatsi yʼEmigulu 35 Bible Online

2 Emyatsi yʼEmigulu 35 - nande bible

2 Emyatsi yʼEmigulu 35

¹Neryo Yosĩa mwakokotya Erikiruka busana nʼOmwami Mukulu eYerũsalema; mobakera obuhere bwʼErikiruka oko kiro kyʼerĩkũmĩ nʼebini kyʼomukera wʼerĩtsũka.

²Neryo mwatondeka abahererĩ omo myanya yabo, mwasĩkyabo omutima omo mũbĩrĩ wʼenyũmba yʼOmwami Mukulu.

³Neryo mwabwira Abalawĩ abakangĩrĩraya Ĩsraelĩ bosĩ, ababya babũyĩrĩre busana nʼOmwami Mukulu, ati, Mũhĩre erĩsandũko lĩbũyĩrĩre omo nyũmba eyo Solomono mugala wa Dawĩdĩ omwami wa Ĩsraelĩ ahĩmba; simwendisyaswabya nʼomuheke oko bitigo byenyũ. Lino mukolere Nyamuhanga wenyũ, nʼabandu buwe Ĩsraelĩ.

⁴Mũyĩtegekanaye ngʼebĩtũnga byʼabotata wenyũ omwʼigabana lyenyũ, ngʼerisaka lya Dawĩdĩ omwami wa Ĩsraelĩ, kandi ngʼerisaka lya Solomono mugala wuwe.

⁵Muhangane ahabũyĩrĩre ngʼamagabo wʼebĩtũnga byʼabotata-kulu byʼabagala benyũ abana bʼabandu, ngʼAbalawĩ erigaba obuli kĩtũnga kya tata.

⁶Mukere esyonyama syʼErikiruka, kandi muyihigule, mũtegekanaye busana nʼabagala benyũ erikola ngʼekĩnywa kyʼOmwami Mukulu omo byala bya Musa.

⁷Neryo Yosĩa mwaha abandu ebyana byʼesyombũlĩ nʼebyʼesyombene-hene bĩkalũa omo kihangulo, ebyosĩ busana nʼamahere wʼErikiruka, oko bosĩ ababyaho, eriganza lyabyo ni elfu makũmĩ asatu (30,000), nʼesyonume syʼesyonde elfu ĩsatu (3,000), esĩ syalũa omo bindu byʼOmwami.

⁸Nʼabakulu buwe mobaha abandu nʼabahererĩ, nʼAbalawĩ olũsũnzo lwʼeriyitswa. Hĩlkĩa na Zekarĩa, na Yehĩelĩ, abatabalĩ bʼenyũmba ya Nyamuhanga, mobaha abahererĩ ebyana byʼesyombũlĩ busana nʼamahere wʼErikiruka elfu ĩbĩrĩ nʼamagana ndatu (2,600), nʼesyonume syʼesyonde magana asatu (300).

⁹Konanĩa nibya, na Semaya na Netanelĩ abagala babo, na Hasabĩa, na Yeĩelĩ na Yozabadĩ, abakulu bʼAbalawĩ, mobaha Abalawĩ, oko bihangulo elfu ĩtanu (5,000), nʼesyonume syʼesyonde magana atanu (500) busana nʼamahere wʼErikiruka.

¹⁰Litya omũbĩrĩ kwʼategekanĩbawa atya, nʼabahererĩ mobahangana omo myanya yabo, nʼAbalawĩ omo milondo yabo, ngʼerihana lyʼOmwami.

¹¹Neryo mobakera esyonyama syʼErikiruka, nʼabahererĩ omugulu batsatsanga omusasi ogo bangirira oko byala byabo, Abalawĩ mobabongolasyo.

¹²Neryo mobalũsya amahere wʼerĩokererya, ibatoka erihago ngʼeritondeka lyʼebĩtũnga byʼabotata-kulu byʼabana bʼabandu, eriherera Omwami Mukulu, ngoko kĩsakĩre omo kitabu kya Musa. Kandi mobakola batya oko syonume syʼesyonde.

¹³Mobokya Erikiruka omo muliro ngʼebilayiro ko biri; nʼamahere awabũyĩrĩre mobahũkago omo syonyungu, nʼomo minaga, nʼomo lũkotsyo, mobatwalasyo lũba oko bandu.

¹⁴Nʼenyũma wʼaho mobayĩtegekanĩrya, na busana nʼabahererĩ, kusangwa abahererĩ abagala ba Harũnĩ babya bakahera amahere wʼerĩokererya nʼebĩsabũ erĩhĩka omo kiro; busana nʼekyo, Abalawĩ mobayĩtegekanĩrya na busana nʼabahererĩ abagala ba Harũnĩ.

¹⁵Nʼabĩmbĩ, abagala ba Asafũ, mobabya omo myanya yabo, ngʼerihana lya Dawĩdĩ, na Asafũ, na Hemanĩ, na Yedũtũnĩ omũhangamĩ wʼOmwami; nʼabateya bʼesyongyo oko buli lũkyo sibabya nʼobwaga bwʼerĩlũa oko mũbĩrĩ wabo; kusangwa abagala babo Abalawĩ ĩbabĩrĩtegekanĩa busana nabo.

¹⁶Nʼomũbĩrĩ gosĩ wʼOmwami Mukulu kwʼategekanĩbawa atya ekiro ekyo, erirya Erikiruka, nʼerihera amahere wʼerĩokererya oko kiherero kyʼOmwami Mukulu, ngoko mwami Yosĩa ahamula.

¹⁷Nʼabana ba Ĩsraelĩ ababyaho mobalya Erikiruka oko mugulu oyo, nʼebiro bikulu byʼobundu obute mo kĩhamya, oko biro birinda.

¹⁸Isihalihatabya Erikiruka eriri ngʼeryo omo Ĩsraelĩ erĩtsũka oko biro byʼomũmĩnyererĩ Samwelĩ; kutse sihabya muguma oko bami ba Ĩsraelĩ oyo walya Erikiruka eryo Yosĩa alya, nʼabahererĩ, nʼAbalawĩ, nʼAbayũda bosĩ nʼAbaĩsraelĩ ababyaho, nʼesyondũlanĩ syʼeYerũsalema.

¹⁹Nʼomo mwaka wʼerĩkũmĩ nʼomunani wʼeritabala lya Yosĩa, Erikiruka erĩ molyakokotĩbwa.

²⁰Enyũma Wʼebyosĩ ebĩ, omugulu Yosĩa amabĩkokotya eHekalũ. Neko omwami wʼeMĩsĩrĩ mwahetuka eriyalwa na Karĩkemesĩ oko lũsĩ lwʼeEfũratĩ; na Yosĩa mwahuluka eriyalwa naye.

²¹Nĩkwa Neko mwamutumako abakwenda, ati, Nyiri nʼomwatsi wahi nawe, uwe mwami wa Yũda kwehĩ? Mũnabwĩre sindisyalwa nawe, nĩkwa erilwa nʼekĩtũnga ekyo ngalwa nakyo; na Nyamuhanga, abirinyihamula erianguha. Ũmbaye erĩkakĩrya Nyamuhanga oyuli haguma nage, akasyakũherya.

²²Nĩkwa Yosĩa mwatalĩga eriyikungula, nĩkwa mwayihindula atoke erilwa naye, kandi mwatahulikirira ebĩnywa bya Neko ebyalũa omo buno bwa Nyamuhanga, nĩkwa mwasa erilwira omo bwere bwʼeMĩgĩdo.

²³Nʼabalasĩ bʼobuta mobalasa omwami Yosĩa; nʼomwami mwabwira abagombe buwe, ati, Mũnyĩlũsayeho, kusangwa namahutala kutsibu.

²⁴Neryo abagombe buwe mobamũlũsya omo galĩ, mobamũhĩra omo galĩ yʼakabiri eyo abya awite, mobamuleta eYerũsalema; neryo mwahola, mwatabwa omo masinda wʼabotata-kulu buwe nʼAbayũda bosĩ nʼeYerũsalema mobalira busana na Yosĩa.

²⁵Na Yeremĩa mwalira ekiriro busana na Yosĩa; nʼabĩmbĩ bosĩ abʼobulume nʼabʼobũkalĩ mobahula Yosĩa omo kiriro kyabo erĩhĩka mũnabwĩre. Neryo mobayirakyo mo kilayiro omo Ĩsraelĩ; nakyo kĩsakĩre omo Kiriro.

²⁶Neryo eyindi mĩbĩrĩ ya Yosĩa, nʼemĩbĩrĩ yiwe yowene, ngoko bĩsakĩre omo migambo yʼOmwami Mukulu,

²⁷nʼemĩbĩrĩ yiwe, eyʼerĩmbere nʼeyʼendũlĩ, lebaya, ĩsakaĩre omo kitabu kyʼabami ba Ĩsraelĩ na Yũda.