Read nande 2 Emyatsi yʼEmigulu 36 Bible Online

2 Emyatsi yʼEmigulu 36 - nande bible

2 Emyatsi yʼEmigulu 36

¹Neryo abandu bʼekihugo mobĩmya Yoahazĩ mugala wa Yosĩa, mobamuyira mo mwami omo mwanya wa tata wuwe eYerũsalema,

²Yoahazĩ abya wʼemyaka makũmĩ abiri nʼeyĩsatu omugulu atsũka eribya mwami, mwatabala eYerũsalema emikera ĩsatu.

³Nʼomwami wʼeMĩsĩrĩ mwamusingula eYerũsalema, mwalĩhĩsya ekĩhugo esyotalanta erĩgana syʼebĩtĩsĩpa nʼetalanta nguma yʼesyamagetsi.

⁴Nʼomwami wʼeMĩsĩrĩ mwayira Elĩakĩmũ mugala wabo mo mwami wʼAbayũda nʼeYerũsalema, mwabindula erĩna liwe mo Yoyakĩmũ. Neryo Neko mwahamba mugala wabo ye Yoahazĩ, mwamutwala eMĩsĩrĩ.

⁵Yoyakĩmũ abya wʼemyaka makũmĩ abiri nʼeyĩtanu omugulu atsũka eribya mwami; neryo mwatabala eYerũsalema emyaka erĩkũmĩ nʼomuguma; mwakola ebibi omo meso wʼOmwami Mukulu Nyamuhanga wuwe.

⁶Na Nebũkadeneza omwami wʼeBabelĩ mwahetuka erilwa naye, neryo mwamuboha omo misege yʼemiringa, erimutwala eBabelĩ.

⁷Nebũkadeneza mwahũnga oko bindu byʼenyũmba yʼOmwami Mukulu eritwalabyo eBabelĩ, mwahĩrabyo omo hekalũ yiwe eBabelĩ.

⁸Nʼeyindi mĩbĩrĩ ya Yoyakĩmũ, nʼesyonye siwe esyo akola, nʼebyabanika nabi ukwʼiye, lebaya, bĩsakĩre omo kitabu kyʼabami ba Ĩsraelĩ na Yũda; na Yoyakĩnũ mugala wuwe mwabya mwami omo mwanya wuwe.

⁹Yoyakĩnũ abya wʼemyaka munani omugulu atsũka eribya mwami, neryo mwatabala eYerũsalema emikera ĩsatu nʼebiro ĩkũmĩ. Kandi mwakola ebibi omo meso wʼOmwami Mukulu.

¹⁰Nʼokwʼihwa lyʼomwaka Omwami Nebũkadeneza mwatuma erimuleta eBabelĩ, haguma nʼebindu byowene byʼenyũmba yʼOmwami Mukulu, neryo mwayira Zedekĩa mugala wabo mo mwami oko Bayũda nʼeYerũsalema.

¹¹Na Zedekĩa abya wʼemyaka makũmĩ abiri nʼomuguma omugulu atsũka eribya mwami; neryo mwatabala eYerũsalema emyaka ĩkũmĩ nʼomuguma.

¹²Neryo mwakola ebibi omo meso wʼOmwami Mukulu Nyamuhanga wuwe; mwatayĩkehya embere syʼOmũmĩnyererĩ Yeremĩa oyũkabũga busana nʼOmwami Mukulu.

¹³Nibya mwahona oko mwami Nebũkadeneza, oyo wamũlahĩrĩsaya uku Nyamuhanga erĩmowa, nĩkwa mwakalya ebĩkya biwe, mwakalya omutima wuwe siabindukire Omwami Mukulu Nyamuhanga wa Ĩsraelĩ.

¹⁴Nibya abakulu bosĩ bʼabahererĩ, nʼabandu mobalegula kutsibu erikwama esyonye syosĩ syʼebihanda; kandi mobatsandya enyũmba yʼOmwami Mukulu eyo ahigula eYerũsalema.

¹⁵NʼOmwami Mukulu Nyamuhanga wʼabotatakulu wabo, mwatumirabo abakwenda buwe, engendo nʼengendo, kusangwa aganyira abandu buwe, nʼaherĩĩkala liwe.

¹⁶Nĩkwa mobasekererya abakwenda ba Nyamuhanga, nʼeripona ebĩnywa biwe, nʼerĩsekererya abamĩnyererĩ buwe, erĩhĩka aho erihitana lyʼOmwami Mukulu lyakala oko bandu buwe, erĩhĩka ahate mulamo.

¹⁷Busana nʼekyo mwaleta kubo omwami wʼAbakaldea, oyo wĩta abalwana babo omo mũyalĩ omo nyũmba yʼahabũyĩrĩre habo, mwataganyira mũlwana kutse omwana-muto, nʼomũsyakulu, kutse oyulwere; mwahĩra bosĩ omo byala biwe.

¹⁸Nʼebindu byosĩ byʼenyũmba ya Nyamuhanga, ebinene binene nʼebikebike, nʼobũsokĩ bwʼenyũmba yʼOmwami Mukulu, nʼobũsokĩ bʼomwami, bo bwʼabakulu buwe, ebyosĩ ebĩ mwaletabyo eBabelĩ.

¹⁹Neryo mobahĩsya enyũmba ya Nyamuhanga, kandi mwasambula ekikunda kyʼeYerũsalema, mobahĩsya amanyũmba awakongotere waho omo muliro, kandi mwaherya ebindu byako bibuya byʼobũgũlĩ bunene byosĩ.

²⁰Nʼababala omũyalĩ mwatwalabo eBabelĩ; nʼabo mobabya bakobe buwe nʼabʼabagala buwe, erĩhĩka oko butabale bʼobwami bwʼePersĩa.

²¹Erĩberererya ekĩnywa kyʼOmwami Mukulu omo buno bwa Yeremĩa, erĩhĩka aho ekihugo kyasyatsemera esyo Sabato syakyo; kusangwa omugulu kyabya kĩma mokyateya eSabato, erĩberererya emyaka makũmĩ alinda.

²²Neryo oko mwaka wʼerĩtsũka wa Kĩro omwami wʼePersĩa, ekĩnywa kyʼOmwami Mukulu omo buno bwa Yeremĩa kitoke eribererera, Omwami Mukulu mwatsũmbũkya omutima wa Kĩro omwami wʼePersĩa, atũlego omo bwami buwe bosĩ, nʼerisakakyo nibya, ati,

²³Kĩro omwami wʼePersĩa akabũga ati, Omwami Mukulu, Nyamuhanga wʼelubula abirimba amami gosĩ wʼekihugo, naye abirinyilayira erĩmũhĩmbĩra enyũmba eYerũsalema owali eYũda. Neryo Omundundi oyuli omo katĩkatĩ kenyũ, ĩnywe bandu buwe bosĩ, Omwami Mukulu Namuhanga wuwe abye naye, neryo ahetukireyo!