Read nande 2 Emyatsi yʼEmigulu 5 Bible Online

2 Emyatsi yʼEmigulu 5 - nande bible

2 Emyatsi yʼEmigulu 5

¹Neryo omũbĩrĩ gosĩ ogo Solomono akola busana nʼenyũmba yʼOmwami Mukulu kwʼahwa atya. Neryo Solomono mwĩngĩrya ebindu ebyo tata wuwe Dawĩdĩ ahigula, ebĩtsĩpa nʼesyamagetsi, nʼebindu byosĩ, mwahĩrabyo omo mbĩso yʼenyũmba ya Nyamuhanga.

²Neryo Solomono mwahĩndanĩa abakulu bʼAbaĩsraelĩ eYerũsalema nʼabakulu bosĩ bʼebihanda nʼabasondolĩ bʼebĩtũnga byʼabotata byʼabana ba Ĩsraelĩ, erireta erĩsandũko lyʼerilagana lyʼOmwami Mukulu erĩlũa omo mũyĩ wa Dawĩdĩ, eSĩonĩ.

³Nʼabandu bosĩ ba Ĩsraelĩ mobayĩhĩndanĩa oko mwami oko kiro kikulu ekyo kyʼomukera wʼakalinda.

⁴Nʼabakulu bosĩ ba Ĩsraelĩ mobasa; nʼAbalawĩ mobaheka erĩsandũko;

⁵mobaleta erĩsandũko, nʼeHema yʼerĩhĩndanamo, nʼebindu byosĩ bĩbũyĩrĩre ebyabya omo Hema; abahererĩ Balawĩ bo baletabyo.

⁶Nʼomwami Solomono nʼendeko yosĩ yʼAbaĩsraelĩ abahĩndana kwiye, babya embere syʼerĩsandũko, ibakahonga esyombũlĩ nʼesyonde esitetoka eriganzwa kutse eriganzika busana nʼobungi.

⁷Nʼabahererĩ mobĩngĩrya erĩsandũko lyʼerilagana lyʼOmwami Mukulu aho walyo ahabũyĩrĩre hʼomwisi wʼenyũmba, aho habũyĩrĩre kutsibu, eyĩkwa oko bĩpũpa byʼamakerũbĩ.

⁸Kusangwa amakerũbĩ mwasanza ebĩpũpa byago endata kwʼaho ahʼerĩsandũko, nʼamakerũbĩ mwaswika erĩsandũko nʼemigamba yalyo aho endata.

⁹Nʼemigamba yabya miri, kyaleka amasongera wʼemigamba inialolwako ahali erĩsandũko embere syʼahabũyĩrĩre hʼomwisi; nĩkwa mwatalolwako eyĩhya; nayo ineho nʼerĩhĩka mũnabwĩre.

¹⁰Omwisi wʼerĩsandũko sihabya kindu bye nʼebisayi bibiri ebyo Musa ahĩraho eHorebũ omugulu Omwami Mukulu alagana endagano nʼabana ba Ĩsraelĩ, omugulu balũa eMĩsĩrĩ.

¹¹Neryo omugulu abahererĩ balũa ahabũyĩrĩre (kusangwa abahererĩ bosĩ ababyaho ibabiriyihigula, butsira eritsomana erigabana lyabo);

¹²kandi Abalawĩ bosĩ ababya bĩmbĩ, ye Asafũ, na Hemanĩ, na Yedũtũnĩ, nʼabagala, nʼabagala babo, ibambite ekĩtanĩ kibuya, haguma nʼamasengo nʼesyonzenze, nʼebinanga, mobimana oko luhande lwʼendata lwʼekiherero, nʼabahererĩ erĩgana nʼamakũmĩ abiri haguma nʼabakabuha esyongubi;

¹³neryo omugulu ababũhĩ bʼesyongubi nʼabĩmbĩ babya ngʼomuguma, erĩbũgya omulenge wʼerĩowĩbwa wʼeripipa nʼeriha Omwami Mukulu ewasĩngya; nʼomugulu basumba emirenge yabo haguma nʼesyongubi nʼamasengo nʼebindu byʼeriimba, omugulu bapipa Omwami Mukulu bati, Kusangwa ni mubuya; kusangwa obubuya buwe bʼolwanzo bukabyaho kera na kera; neryo oko mugulu oyo enyũmba yʼOmwami Mukulu moyũsũla nʼekĩtũ.

¹⁴Busana nʼekyo abahererĩ mobatatoka erihangana erikola omũbĩrĩ busana nʼekĩtũ ekyo; kusangwa olukengerwa lwʼOmwami Mukulu molũsũlya enyũmba ya Nyamuhanga.