Read nande 2 Emyatsi yʼEmigulu 6 Bible Online

2 Emyatsi yʼEmigulu 6 - nande bible

2 Emyatsi yʼEmigulu 6

¹Neryo Solomono mwabũga ati, Omwami Mukulu abĩrĩbũga ati asyĩkala omo mwĩrĩmya wʼenyahĩnda.

²Nĩkwa nabĩrĩkũhĩmbĩra enyũmba nyiri, aho wangĩkala kera na kera.

³Nʼomwami mwabindukirabo, mwatsumula endeko yosĩ yʼAbaĩsraelĩ; nʼendeko yosĩ yʼAbaĩsraelĩ mobimana.

⁴Neryo Solomono mwabũga ati, Omwami Mukulu Nyamuhanga wa Ĩsraelĩ apipawe, oyo wabũga omo buno buwe uku tata wage Dawĩdĩ, kandi abĩrĩberereryakyo omo byala biwe, ati,

⁵Erĩtsũka ekiro nalũsaya abandu bage omo kihugo kyʼeMĩsĩrĩ, mondayisoga mũyĩ nʼomuguma omo bihande byosĩ bya Ĩsraelĩ erĩhĩmba mugo enyũmba, mwʼerĩna lyage ritoke eribyaho; kutse mondayisoga mundu nʼomuguma eribya mukulu wʼabandu bage Ĩsraelĩ.

⁶Nĩkwa nabiriyisoga eYerũsalema, erĩna lyage libyeyo, kandi nabiriyisoga Dawĩdĩ eribya mukulu wʼabandu bage Abaĩsraelĩ.

⁷Nĩkwa mokyabya omo mutima wa tata wage Dawĩdĩ erĩhĩmba enyũmba busana nʼerĩna lyʼOmwami Mukulu, Nyamuhanga wa Ĩsraelĩ.

⁸Nĩkwa Omwami Mukulu mwabwira tata wage Dawĩdĩ ati, Kusangwa kyabya omo mutima wawe erĩhĩmba enyũmba busana nʼerĩna lyage, mowayira ndeke kusangwa kyabya omo mutima wawe;

⁹nĩkwa iwe ũtendĩsyahĩmba enyũmba eyo; nĩkwa mugala wawe oyo wasyabuta, iye yo wasyahĩmba enyũmba busana nʼerĩna lyage.

¹⁰Neryo Omwami Mukulu mwaberererya ekĩnywa ekyo abũga; kusangwa nabirihangana omo mwanya wa tata wage Dawĩdĩ, nʼerĩĩkala oko kĩtũmbĩ kyʼobwami kya Ĩsraelĩ, ngoko Mwami Mukulu alaga, kandi nabĩrĩhĩmba enyũmba busana nʼerĩna lyʼOmwami Mukulu, Nyamuhanga wa Ĩsraelĩ.

¹¹Nʼeryo nabĩrhĩra mwʼerĩsandũko, omuli endagane yʼOmwami Mukulu, eyo alagana nʼabana ba Ĩsraelĩ.

¹²Neryo mwahangana embere syʼekiherero kyʼOmwami Mukulu embere wʼendeko yosĩ yʼAbaĩsraelĩ, neryo mwasanza ebyala biwe.

¹³Kusangwa Solomono ĩnĩabĩrĩkokotya ekĩbũgĩro kyʼomulinga, obuli bwakyo bwabya metere 2.30, nʼobugali bwakyo metere 2.30, nʼobuli bwʼendata bwakyo, metere 1.38, iniabirisingikakyo omo kibuga; neryo mwahangana kukyo, mwakũkama oko marwĩ wuwe embere syʼendeko yosĩ yʼAbaĩsraelĩ, neryo mwasumbira ebyala biwe elubula.

¹⁴Neryo mwabũga ati, Uwe Mwami Mukulu Nyamuhanga wa Ĩsraelĩ, sihali Nyamuhanga nga we, omo lubula, kutse muna-kihugo; oyũkategaya endagano nʼobubuya bwʼolwanzo busana nʼabagombe buwe, abakalendera embere syawe nʼomutima wabo gosĩ;

¹⁵oyo Wabĩrĩberererya oko mugombe wawe tata wage Dawĩdĩ ebyo wamulaga; ega, mowabũga omo buno bwawe, neryo wabĩrĩberereryabyo omo byala byawe, ngoko biri mũnabwĩre.

¹⁶Na lino, uwe Mwami Mukulu, Nyamuhanga wa Ĩsraelĩ, ũtegaye ekyo walaga omugombe wawe tata wage Dawĩdĩ, uti, Siwendisyabula ko mundu omo meso wage wʼerĩĩkala oko kĩtũmbĩ kyʼobwami kya Ĩsraelĩ, abana bawe bamateya esyonzira syabo, nʼerirendera omo migambo yage ngoko wabirilendera embere syage.

¹⁷Neryo lino, uwe Mwami Mukulu, Nyamuhanga wa Ĩsraelĩ, ekĩnywa kyawe ekyo, ũberererayekyo, ekyo wabũga nʼomugombe wawe Dawĩdĩ.

¹⁸Nĩkwa Nyamuhanga anganĩkala kwenene haguma nʼabandu muna-kihugo kwehĩ? Lebaya, olubula nʼekyanya kyʼebyanya sibyangatoka erĩkũhĩkana; nʼenyũmba eyĩ nayo ni nge kwʼaho!

¹⁹Nĩkwa Ukenge erisaba lyʼomugombe wawe, nʼeriremba-lemba liwe, uwe Mwami Mukulu, Nyamuhanga wage, erĩowa erilaka nʼerisaba eryo mugombe wawe akasaba embere syawe;

²⁰nʼameso wawe asamalire ebwanga bwʼenyũmba eyĩ omo musibo nʼomo kiro, erĩlolya ebwanga bwʼaho wahula uti wasyahĩraho erĩna lyawe; erihulikirira erisaba eryo mugombe wawe asyasaba erĩlolya hano.

²¹Uhulikirire eriremba-lemba lyʼomugombe wawe, neryo abandu bawe Abaĩsraelĩ, omugulu basyasaba nʼerĩlolya hano; ega, omo bwĩkalo bwawe, elubula, uhulikirire; nʼomugulu ũkowa, ubuyire.

²²Omundu amakola nabi uku mũlĩkyabo, amahĩrwa kwʼekĩlahĩryo, bakamũlahĩrĩrya, neryo amasa nʼerĩlahĩrya embere syʼekiherero kyawe omo nyũmba eyĩ;

²³neryo omo lubula wowe, Ukole, nʼeritswera abagombe bawe, erĩkĩsya ababi, ũsũbaye oko mutwe wuwe emĩbĩrĩ yiwe; nʼeriha erĩbanza oko yutunganene, erimuha ngʼeritunganene riwe.

²⁴Nʼabandu bawe Abaĩsraelĩ bamĩtwa embere syʼesyonzĩgũ, kusangwa babĩrĩkũhalyako, bamabinduka nʼerĩkangya erĩna lyawe, nʼerisaba nʼeriremba-lemba embere syawe omo nyũmba eyĩ;

²⁵neryo omo lubula wowe, ubuyire amalolo wʼabandu bawe Abaĩsraelĩ nʼerĩsũbyabo omo kihugo ekyo wahabo nʼabotata wabo.

²⁶Olubula lwamalĩbana, ihatawa mbũla, kusangwa babĩrĩkũhalyako; bamasaba ĩbanalolĩrye hano, nʼerĩkangya erĩna lyawe, nʼerireka amalolo wabo, omugulu ukasuyirabo:

²⁷neryo omo lubula, wowe, ubuyire amalolo wʼabagombe bawe, nʼawʼabandu bawe Abaĩsraelĩ, omugulu ũkakangĩrĩrayabo enzira yowene eyo bangalolamo; ũwĩsaye embũla oko kihugo kyawe ekyo wabiriha abandu bawe mo ndagano.

²⁸Nʼenzala yamabya omo kihugo, kutse obũkonĩ bwʼakasũsũ, kutse obugoma, kutse ekihondo, kutse esyongĩke, kutse obũngũkũ; nʼesyonzĩgũ syabo syamagoterabo omo kihugo kyʼemĩyĩ yabo; hamabya luholo lwahi kutse ĩrongo lyahi;

²⁹omundo amasabakĩ kutse erihatikanakĩ kutse abandu bawe Abaĩsraelĩ bosĩ, obuli mundu ĩnĩanasĩ oluholo luwe nʼobũlĩge buwe, amasumbira ebyala biwe erĩlolyabyo oko nyũmba eyĩ;

³⁰omo lubula obwĩkalo bwawe, wowe, ubuyire, ulihe obuli mundu ngʼesyonzira siwe syosĩ; nʼomutima wuwe, ũnasĩgo, kusangwa uwe musa, ũnasĩ emitima yʼabandu;

³¹ibatoka erikubaha, nʼerigenda omo syonzira syawe, ebiro ebyo bali omo kihugo ekyo waha abotata wetu.

³²Kandi busana nʼowʼehandi, oyute wʼoko bandu bawe Ĩsraelĩ, omugulu akasa akalũa omo kihugo kyʼehali busana nʼerĩna lyawe likulu, na busana nʼebyala byawe byʼamaka, nʼokuboko kwawe kũyĩsũmbĩre; omugulu basyasa nʼerisaba ĩbanalolĩrye oko nyũmba eyĩ;

³³neryo omo lubula, wowe nʼomo ahʼerĩĩkala lyawe, Ukole ebyosĩ ebyo owʼehandi akakulakira; abandu bosĩ ba muna-kihugo batoke eriminya erĩna lyawe, nʼerikubaha, ngoko abandu bawe Abaĩsraelĩ bakakola, kandi batoke eriminya kwʼenyũmba eyo nabĩrĩhĩmba ikahulawa omo lĩna lyawe.

³⁴Omugulu abandu bawe bakayalwa nʼesyonzĩgũ syabo, omo nzira yahi ukatumabo, kandi bakakusaba ĩbanalolĩrye oko mũyĩ ogo wabiriyisoga, nʼenyũmba eyo nabĩrĩhĩmba busana nʼerĩna lyawe;

³⁵neryo nawe omo lubula wowe erisaba lyabo, nʼeriremba-lemba lyabo, wimire omwatsi wabo.

³⁶Bamakũhalyako, kusangwa sihali omundu oyutekola nabi, nawe ukahitana kubo, nʼerihabo oko nzĩgũ, nabo bakatwalabo mo banyegwa oko kihugo ekiri hali kutse ekiri hakũhĩ;

³⁷nĩkwa bamayibuka omo kihugo ekyo batwalawamo mo banyegwa, bakabinduka, nʼerikulemba-lemba omo kihugo ekyo bahũngĩrawamo, bati, Twabĩrĩhalya, twabirikola obũyĩyĩnĩa, twabirikola nabi;

³⁸bamakusubako nʼomutima wabo gosĩ nʼekĩrĩmũ kyabo kyosĩ omo kihugo ekyo bahũngawamo eyo batwalabo mo banyegwa, bamasaba erĩlolya omo kihugo kyabo ekyo waha abotata-kulu babo, nʼoko mũyĩ ogo wayisoga, nʼerĩlolya oko nyũmba eyo nabĩrĩhĩmba busana nʼerĩna lyawe;

³⁹neryo omo lubula omo bwĩkalo bwawe, wowe erisaba lyabo nʼeriremba-lemba lyabo, ulonderebo omwatsi wabo, ubuyire abandu bawe ababĩrĩkũhalyako.

⁴⁰Na lino uwe Nyamuhanga wage, ngakulemba-lemba, ũkalaye ameso wawe, na utege amatwĩ wawe erĩowa, erisaba erikasabawa hano.

⁴¹Na lino, uwe Mwami Mukulu Nyamuhanga, uhangane wingire, ahʼerihumulira hawe, uwe, nʼerĩsandũko lyʼamaka wawe. Uwe Mwami Mukulu Nyamuhanga, abahererĩ bawe bambalĩbawe omulamo, nʼahabũyĩrĩre bawe batseme omo bibuya.

⁴²Uwe Mwami Mukulu Nyamuhanga, sũlolaye obũsũ bwawe bo handi oko mũhakabĩbwa wawe; Wibuke ebibuya byʼolwanzo lwawe busana nʼomugombe wawe Dawĩdĩ.