Read nande 2 Emyatsi yʼEmigulu 7 Bible Online

2 Emyatsi yʼEmigulu 7 - nande bible

2 Emyatsi yʼEmigulu 7

¹Neryo Solomono abere abibuga erisaba, omuliro mwalũa elubula mwahĩsya obuhere bwʼerĩokererya, nʼesyohongo; nʼolukengerwa lʼOmwami Mukulu molũsũlya enyũmba.

²Nʼabahererĩ mobatatoka eriingira omo nyũmba yʼOmwami Mukulu, kusangwa olukengerwa lʼOmwami Mukulu molũsũlya enyũmba yʼOmwami Mukulu.

³Nʼabana ba Ĩsraelĩ bosĩ mobalangira omugulu omuliro andagala, nʼolukengerwa lʼOmwami Mukulu molwabya oko nyũmba; nabo mobũnamĩrya amũsũ wabo oko kitaka ahasanzĩre amabwe, mobaramya, nʼeriha ewasĩngya oko Mwamĩ Mukulu, bati, Kusangwa iye ni mwenge; kusangwa ebibuya biwe byʼolwanzo ni bya kera na kera.

⁴Neryo Solomono nʼabandu bosĩ mobahera amahere embere syʼOmwami Mukulu.

⁵Nʼomwami Solomono mwahera obuhere bwʼesyonde elfu makũmĩ abiri nʼĩbĩrĩ (22,000), nʼesyombũlĩ elfu erĩgana nʼamakũmĩ abiri (120,000). Nʼomwami nʼabandu bosĩ ko bahigula enyũmba ya Nyamuhanga yo batya.

⁶Nʼabahererĩ mobahangana, oko mĩbĩrĩ yabo kwʼiri; Abalawĩ nibya omo bindu byʼeriimbira Omwami Mukulu, ebyo mwami Dawĩdĩ akokotaya eriha ewasĩngya oko Mwami Mukulu mubyo, kusangwa ebibuya biwe byʼolwanzo ni bya kera na kera, omugulu Dawĩdĩ apipa omo mũbĩrĩ wabo; nʼabahererĩ mobabuha esyongubi embere syabo; nʼAbaĩsraelĩ bosĩ mobahangana.

⁷Kandi Solomono mwahigula ekibuga omo katĩkatĩ aho habya embere wʼenyũmba yʼOmwami Mukulu; kusangwa aho aherera mahere wʼerĩokererya, nʼamagũta wʼamahere wʼobuholo, kusangwa ekiherero kyʼomulinga ekyo Solomono akokotaya mokitatoka eritolera amahere wʼerĩokererya, nʼamahere wʼeyĩsyano nʼamagũta.

⁸Solomono kwʼategaya atya ebiro bikulu birinda byʼamahema oko mugulu oyo, nʼAbaĩsraelĩ bosĩ haguma naye, endeko nene kutsibu, erĩtsũka aho bakingirira eHamatĩ nʼerĩhĩka oko kũsĩ kʼeMĩsĩrĩ.

⁹Nʼoko kiro kyʼomunani mobahĩra erĩhĩndana lyʼeriusa; kusangwa mobateya erihigula lyʼekiherero ebiro birinda, nʼebiro bikulu byʼamahema ebiro birinda.

¹⁰Nʼoko kiro kyʼamakũmĩ abiri nʼebisatu oko mukera wʼakalinda, mwakũlũkya abandu eriya ewabo, ĩbatsemĩre nʼeritsanga lyʼomutima busana nʼebibuya ebyo Mwami, Mukulu akangaya Dawĩdĩ, na Solomono, nʼabandu buwe Abaĩsraelĩ.

¹¹Solomono kwʼabuga atya enyũmba yʼOmwami Mukulu, nʼenyũmba yʼOmwami, nʼebyosĩ ebyahĩka omo mutima wa Solomono akole omo nyũmba yʼOmwami Mukulu nʼomo nyũmba yiwe-yiwe, mwabugabyo omo mũyĩsa.

¹²Kandi Omwami Mukulu mwahulukira Solomono omo kiro, mwamubwira ati, Nabĩrĩowa erisaba lyawe, nabiriyisoga hano busana nage eribya nyũmba yʼobuhere.

¹³Namalĩba olubula ihatabya mbũla, kutse namahamula esyongĩke erirya ekihugo, kutse namatuma obũkonĩ bwʼakasũsũ omo katĩkatĩ kʼabandu bage;

¹⁴abandu bage abakahulawa omo lĩna lyage, bamayĩkehya, nʼerĩsaba, nʼerĩsonda-sondya obũsũ bwage, nʼeribinduka oko syonzira syabo nyibi; neryo omo lubula, nasyowa nʼeribuyira ebibi byabo, nʼerĩlamya ekihugo kyabo.

¹⁵Na lino ameso wage asyakala, nʼamatwĩ wage asyowa erisaba erikasabirawa hano.

¹⁶Kusangwa lino nabiriyisoga nʼerihigula enyũmba eyĩ, erĩna lyage litoke eribyaho kera na kera; nʼameso wage nʼomutima wage byasyabyaho ebiro byosĩ.

¹⁷Nĩkwa uwe, wamalendera embere syage ngoko tata wawe Dawĩdĩ alendera, nʼerikola ngʼebyosĩ nabirikuhana, nʼerĩteya ebihano byage nʼebilayiro byage.

¹⁸Neryo nasyasĩkya ekĩtũmbĩ kyʼobwami bwawe, ngoko nalangana na tata wawe Dawĩdĩ, nyiti, Siwendisyabula ko mundu wʼeribya mũtabalĩ wʼAbaĩsraelĩ.

¹⁹Nĩkwa mwamakebera handi, nʼerĩsĩga emigambo yage, nʼebihano byage, ebyo nabĩrĩhĩra embere syenyũ mukayakolera esindi nyamuhanga, nʼerĩramyasyo;

²⁰neryo nasyabakula nʼemĩrĩhĩ haguma omo kihugo kyage ekyo nabiribaha; nʼenyũmba eyo nabirihigula busana nʼerĩna lyage, nasyagusago erĩlũa omo meso wage, kandi nasyayirayo eribya mũsyo nʼekyʼerisekwa omo katĩkatĩ kʼabandu bosĩ.

²¹Nʼenyũmba eyo, eyahamĩbawa, obuli mundu oyukalaba kuyo asyasweka, ĩnĩabũga ati, Busana nakĩ Omwami Mukulu abirikola atya oko kihugo ekĩ nʼenyũmba eyĩ kwehĩ?

²²Nabo basyasũbĩrya bati, Kusangwa basĩga Omwami Mukulu, Nyamuhanga wʼabotata-kulu wabo, oyo walũsayabo omo kihugo kyʼeMĩsĩrĩ, ibabirimakirira esindi nyamuhanga, nʼerĩramyasyo, nʼerikolerasyo; busana nʼekyo abirireta kubo kweʼekibi kyosĩ ekĩ.