Read nande 2 Emyatsi yʼEmigulu 9 Bible Online

2 Emyatsi yʼEmigulu 9 - nande bible

2 Emyatsi yʼEmigulu 9

¹Neryo omugulu omwami-kalĩ wʼeSeba owa engulu ya Solomono, mwasa eYerũsalema erirenga uku Solomono omwʼĩbũlya erĩkalĩre. Abya nʼekikumulo kinene kyʼabandu nʼesyongamia esyaheka ebikakumba ndeke, nʼesyamagetsi nene kutsibu, nʼamabwe wʼobũgũlĩ bunene; nʼomugulu ahĩka uku Solomono, mwakanĩa naye ebyosĩ ebyabya omo mutima wuwe.

²Neryo Solomono mwamũkũmbũlĩra ebyosĩ abũlaya; mohatabya mwatsi owabĩsamĩre ogo Solomono ataluka erimubwira.

³Nʼomugulu omwami-kalĩ wʼeSeba alangira amenge wa Solomono, nʼenyũmba eyo ahĩmba,

⁴nʼebyalya ebyʼoko mesa yiwe, nʼerĩĩkala lyʼabagombe buwe, nʼemibere yʼabahanganĩrĩ buwe, nʼesyongimba syabo, nʼabahekĩ bʼolũtehĩ luwe, nibya nʼesyongimba syabo, nʼekisambiro kiwe asambako akaya omo nyũmba yʼOmwami Mukulu; omutima wuwe mwabumbubana.

⁵Neryo mwabwira omwami ati, Kwesĩ ni kwenene, esyongulu esyo nowĩra omo kihugo kyage, esyʼemyatsi yawe, nʼamenge wawe.

⁶Nĩkwa mondalĩga ebĩnywa byabo, erĩhĩka aho nasira nʼerilangira nʼameso wage. Neryo, lebaya, mondabwirwa nʼekihande kyʼobukulu bwʼamenge wawe. Ũlabĩre esyongulu esyo nowa.

⁷Abandu bawe ni bʼobutseme, nʼobutseme buli oko bagombe bawe aba, abakahangana ebiro byosĩ embere syawe, nʼerĩowa amenge wawe.

⁸Omwami Mukulu Nyamuhanga wawe apipawe oyukakutsemera, erĩkũhĩra oko kĩtũmbĩ kiwe kyʼobwami, eribya mwami busana nʼOmwami Mukulu Nyamuhanga wawe; kusangwa Nyamuhanga wawe mwanza Ĩsraelĩ, erĩhanganĩabo kera na kera, kyaleka iniakuyira mo mwami wabo, erikola erĩbanza nʼekitunganene.

⁹Neryo mwaha omwami esyotalanta syʼesyamagetsi erĩgana nʼamakũmĩ abiri (120), nʼebikakumba ndeke nʼamabwe wʼobũgũlĩ bunene, kutse sihabya ebikakumba ndeke-ndeke bingi-bingi ebiri ngʼebyo omwami-kalĩ wʼeSeba aha omwami Solomono.

¹⁰Nʼabagombe ba Hĩramũ nibya, nʼabagombe ba Solomono abalũsaya esyamagetsi eOfĩrĩ mobaleta emiti yʼemĩsandalĩ nʼamabwe wʼobũgũli bunene.

¹¹Nʼomwami mwakokotya omo miti eyo yʼemĩsandalĩ mwʼebisambiro byʼenyũmba yʼOmwami Mukulu, na busana nʼenyũmba yʼOmwami, nʼesyonanga, nʼesyonzenze busana nʼabĩmbĩ; kandi isihehatalolwako erĩmbere esiri ngʼesĩ omo kihugo kya Yũda.

¹²Nʼomwami Solomono mwaha omwami-kalĩ wʼeSeba ebyosĩ abya anzĩre, nʼobuli kindu abũlaya, kwilaba ebyo aletera omwami. Neryo mwasubula, mwaya omo kihugo kiwe, iye nʼabagombe buwe.

¹³Neryo obũlĩto bwʼesyamagetsi esyahĩka uku Solomono oko mwaka muguma bwabya esyotalanta magana ndatu nʼamakũmĩ ndatu nʼendatu (666) syʼesyamagetsi,

¹⁴ebyo abatũndya nʼabagũlya baleta biteko; kandi abami bosĩ bʼeArabĩa nʼabakulu bʼekihugo mobaletera Solomono esyamagetsi nʼebĩtsĩpa.

¹⁵Nʼomwami Solomono mwakokotya esyongabo magana abiri (200) syʼesyamagetsi esĩhesĩre; omo ngabo nguma imukaya esyosekelĩ magana ndatu syʼesyamagetsi esĩhesĩre.

¹⁶Kandi mwakokotya esyongabo nyike-nyike (300) amagana asatu syʼesyamagetsi esĩhesĩre; akangabo kaguma imukaya esyosekelĩ magana asatu syʼesyamagetsi; nʼomwami mwabikasyo omo nyũmba yʼomo mũsĩtũ wʼeLebanonĩ.

¹⁷Kandi nʼomwami mwakokotya ekĩtũmbĩ kyʼobwami kinene omo meno wʼesyonzogũ, neryo mwabamba kukyo kwʼesyamagetsi esĩtũkwĩre.

¹⁸Mohabya erĩhĩka oko kĩtũmbĩ kyʼOmwami ekyo ebisambiro ndatu, haguma nʼekĩtũmbĩ kyʼebisando kyʼesyamagetsi ekibohere oko kĩtũmbĩ kyʼobwami ekyo, nʼebikokola oko syombande ĩbĩrĩ hakũhĩ nʼaherĩĩkala nʼesyondale ĩbĩrĩ isihangene hakũhĩ nʼebikokola.

¹⁹Nʼesyondale erĩkũmĩ nʼesĩbĩrĩ isihangene oko lundi luhande nʼoko lundi luhande oko bisambiro ndatu; mohatakokotĩbwa kindi ekĩsosĩrekyo omo bundi bwami.

²⁰Nʼesyondehĩ syosĩ syʼOmwami Solomono esyʼerĩpũlyamo syabya syʼesyʼamagetsi, nʼesyonyungu syosĩ syʼomo nyũmba yʼomo mũsĩtũ wʼeLebanonĩ syabya syʼesyamagetsi esĩtũkwĩre; ebĩtsĩpa mobitaganzwa nga kindu omo biro bya Solomono.

²¹Kusangwa omwami abya nʼamato awaya eTarsĩsĩ haguma nʼabagombe ba Hĩramũ; obuli myaka ĩsatu amato wʼeTarsĩsĩ iniakasa, akaleta esyamagetsi, nʼebĩtsĩpa, nʼameno wʼesyonzogũ, nʼesyongima nʼesyonyonyũ syʼeTaũsĩ.

²²Litya omwami Solomono mwalengya abami bosĩ bʼekihugo omo bindu nʼamenge.

²³Neryo abami bosĩ bʼekihugo mobasonda-sondya eribya ahali Solomono, erĩowa amenge wuwe, ago Nyamuhanga ahĩra omo mutima wuwe.

²⁴Nabo obuli mundu mwaleta omuhako wuwe, ebindu byʼebĩtsĩpa, nʼebindu byʼesyamagetsi, nʼesyongimba, nʼebindu byʼamalwa, nʼebikabeha ndeke, nʼesyosabayĩrĩ, nʼesyonyumbu, obuli mwaka mobaleta ebingaho.

²⁵Na Solomono abya nʼebitalikirire byʼesyosabayĩrĩ nʼesyogalĩ elfu ĩnĩ (4,000), nʼabakagenda oko syosabayĩrĩ elfu ĩkũmĩ nʼĩbĩrĩ (12,000), neryo mwahĩrabyo omo mĩyĩ yʼesyogalĩ, kandi haguma nʼomwami eYerũsalema.

²⁶Kandi abya mũtabalĩ oko bami bosĩ erĩtsũka oko lũsĩ lwʼeEfũratĩ nʼerĩhĩka oko kihugo kyʼAbafĩlĩstĩnĩ, nʼerĩhĩka oko mutano wʼeMĩsĩrĩ.

²⁷Nʼomwami mwayira ebĩtsĩpa eribya bingi ngʼamabwe eYerũsalema, nʼemĩerezĩ mwayirayo eribya ngʼemiti yʼemĩsabũeyiri omwʼirungu, busana nʼobungi bwayo.

²⁸Babya bakaletera Solomono esyosabayĩrĩ sĩkalũa eMĩsĩrĩ, nʼerĩlũa omo bihugo byosĩ.

²⁹Neryo eyindi mĩbĩrĩ ya Solomono, eyʼerĩmbere nʼeyʼenyũma, sĩyĩsakĩre, omo bĩnywa byʼomũmĩnyererĩ Natana, nʼomwʼiminyerera lya Ahĩya Omũsĩlonĩ, nʼomo syonzolĩ Ĩdo mũhanĩ, busana na Yeroboamũ mugala wa Nebatĩ?

³⁰Na Solomono mwatabala eYerũsalema emyaka makũmĩ ani oko Baĩsraelĩ bosĩ.

³¹Na Solomono mweya abotata-kulu buwe, mwatabwa omo mũyĩ wa tata wuwe Dawĩdĩ; na Rehoboamũ mugala wuwe mwatabala omo mwanya wuwe.