Read nande Ezera 3 Bible Online

Ezera 3 - nande bible

Ezera 3

¹Neryo omugulu omukera wʼakalinda ahĩka, nʼabana ba Ĩsraelĩ babere babibya omo mĩyĩ, abandu mobayĩhĩndanĩa ngʼomundu muguma eYerũsalema.

²Neryo Yesũa mugala wa Yozadakĩ mwahangana, nʼabagala babo abahererĩ, na Zerũbabelĩ mugala wa Salatĩele, nʼabagala babo, mobahĩmba ekiherero kya Nyamuhanga wa Ĩsraelĩ, eriherera kukyo amahere wʼerĩokererya, ngoko kĩsakĩre omo bihano bya Musa omundu wa Nyamuhanga.

³Neryo mobasingika ekiherero oko kibanza kyakyo; kusangwa babya nʼobuba bunene bwʼebihanda byʼebihugo; neryo mobahongera Omwami Mukulu amahere wʼerĩokererya kukyo, awʼerĩokererya engyakya nʼomwʼĩgolo-golo.

⁴Kandi mobateya ebiro bikulu byʼehitalikirire, ngoko bĩsakĩre, nʼamahere wʼerĩokererya wʼobuli kiro omo miganzo yago, ngoko byahamulawa, ngʼomũbĩrĩ wʼobuli kiro asonda.

⁵Nʼenyũma wʼaho mohabya obuhere bwʼerĩokererya bwʼemigulu yosĩ, nʼamahere wʼemikera mihya-mihya, nʼebiro bikulu byosĩ ebyahamulawa byʼOmwami Mukulu ebyahigulawa, nʼakandi obuhere bʼobuli mundu oyo wanza mwahĩtya olũsũnzo lwʼolwanzo oko Mwami Mukulu.

⁶Erĩtsũka oko kiro kyʼerĩtsũka omukera wʼakalinda mobatsũka erihongera Omwami Mukulu amahere wʼerĩokererya; nĩkwa ekibanza kyʼeHekalũ isikyekyahalwa.

⁷Mobaha abahĩmbĩ nʼababatsĩ esyofranka nibya; nʼakalyo, bʼebyʼerĩpũlya, nʼamagũta, oko Basĩdonĩ, nʼoko Batĩro, erireta emiti yʼemĩerezĩ ĩkalũa eLebanonĩ erĩhĩka oko ngetsi, eYopa, ngʼolulengo lwʼerihamula lya Kĩro, omwami wʼePersĩa.

⁸Neryo oko mwaka wʼakabiri wʼerĩhĩka lyabo oko nyũmba ya Nyamuhanga eYerũsalema, oko mukera wʼakabiri, Zerũbabelĩ mugala wa Salatĩelĩ, na Yesũa mugala wa Yozadakĩ, nʼabasĩgalira bʼabagala babo abahererĩ, nʼAbalawĩ, nʼabosĩ abalũa omo bunyegwa bakahĩka eYerũsalema, mobatsũka omũbĩrĩ mobahĩra Abalawĩ, abʼemyaka makũmĩ abiri na kwilaba aho, erihanganira omũbĩrĩ wʼenyũmba yʼOmwami Mukulu.

⁹Neryo mohahangana Yesũa haguma nʼabagala buwe nʼabagala babo, Kadmĩelĩ nʼabagala buwe, abagala ba Yũda, abosĩ haguma erihanganira abakolĩ bʼomũbĩrĩ omo nyũmba ya Nyamuhanga; abagala ba Henadadĩ, haguma nʼabagala buwe nʼabagala babo Abalawĩ.

¹⁰Neryo omugulu abahĩmbĩ bahĩra ekibanza kyʼeHekalũ yʼOmwami Mukulu, mobahĩra abahererĩ ibanambite ebyambalo byabo haguma nʼesyongubi, nʼAbalawĩ abagala ba Asafũ haguma nʼamasengo, eripipa Omwami Mukulu, ngʼerihana lya Dawĩdĩ omwami wʼeĨsraelĩ.

¹¹Nabo mobimbirana nʼeripipa nʼeriha ewasĩngya oko Mwami Mukulu, bati, Kusangwa ni mubuya, kusangwa olwanzo lubuya luwe ni lwa kera na kera busana na Ĩsraelĩ. Nʼabandu bosĩ mobakandalya omo mulenge munene, omugulu bapipa Omwami Mukulu, kusangwa ekibanza kyʼenyũmba yʼOmwami Mukulu kyamabĩhĩrwaho.

¹²Nĩkwa abahererĩ bangi nʼAbalawĩ nʼabakulu bʼebĩtũnga byʼabotata, abasyakulu abalola oko nyũmba yʼerĩmbere, omugulu ekibanza kyʼenyũmba eyĩ kyahalawa embere syʼameso wabo, mobalira nʼomulenge munene; nʼabangi mobakandalya kutsibu nʼobutseme.

¹³Neryo abandu mobatatoka eriminyerera omulenge wʼobogo bʼobutseme nʼomulenge wʼabandu abakalira; kusangwa abandu mobũta obogo, bunene, nʼomulenge oyo mogũbwa ehali.