Read nande Ezera 4 Bible Online

Ezera 4 - nande bible

Ezera 4

¹Neryo omugulu esyonzĩgũ sya Yũda na Benyamĩna syowa ngoko bana bʼobunyegwa bamahĩmba eHekalũ busana nʼOmwami Mukulu, Nyamuhanga wa Ĩsraelĩ.

²Mobasegera hakũhĩ na Zerũbabelĩ, nʼabakulu bʼebĩtũnga byʼabotata, mobabwirabo bati, Mũtũlĩgĩre erĩhĩmba haguma nenyũ; kusangwa tukasonda-sonda Nyamuhanga wenyũ, nga nywe; netu twabya tukamuhongera erĩtsũka oko biro bya Esarĩ-hadonĩ omwami wʼeAsũrĩa, oyo watuleta eno.

³Nĩkwa Zerũbabelĩ, na Yesũa, nʼabandi bʼoko bakulu bʼebĩtũnga byʼabotata ba Ĩsraelĩ, mobabwirabo bati, Sĩtũlĩre nenyũ ekihango erĩhĩmba enyũmba busana na Nyamuhanga wetu; nĩkwa ĩtwebene-bene haguma twasyahĩmbĩra Omwami Mukulu, Nyamuhanga wa Ĩsraelĩ ngoko mwami Kĩro, omwami wʼePersĩa atutegeka.

⁴Neryo abandu bʼekihugo mobolobya ebyala byʼabandu ba Yũda, mobũbahyabo bakahĩmba.

⁵Mobenderabo abahanĩ erilwa nabo, bakakĩrĩrayabo omwʼĩsũnzĩkanĩa lyabo omo biro byosĩ bya Kĩro omwami wʼePersĩa, erĩhĩka oko butabale bwa Darĩo omwami wʼePersĩa.

⁶Nʼomo butabale bwa Ahasũero omo nzũko yʼobutabale buwe, mobasaka ebarua yʼeritsongera esyondũlanĩ syʼeYũda nʼeYerũsalema.

⁷Nʼoko biro bya Artasasta, ye Bĩsĩlamũ, na Mĩtĩredatĩ, na Tabeelĩ, nʼabandi nʼabalĩkyabo, mobasakira Artasasta omwami wʼePersĩa; nʼerisaka lyʼebarua lyasakawa omo Kĩsũrĩa; moyatondekwa omo Kĩsũrĩa.

⁸Kandi Rehũmũ omũtabalĩ, na Sĩmĩsayĩ omũhandĩkĩ mobasaka ebarua eribambira eYerũsalema oko mwami Artasasta batya.

⁹Neryo omũtabalĩ Rehũmũ na Sĩmĩsayĩ omũhandĩkĩ, nʼabandi balĩkyabo, abatswerĩ, nʼabandi batabalĩ bake-bake, nʼabakulu, nʼabahandĩkĩ, nʼAbaarakevĩ, nʼAbababelĩ, nʼabandu bʼeSũsa, ba bandu ba Elemũ,

¹⁰nʼebindi bihanda ebyo Osĩnaparĩ, wʼomukulu nʼowʼerĩsĩkĩbwa, aleta nʼerĩhĩra omo mũyĩ wʼeSamarĩa, nʼomo kindi kihugo eyisirya oko lũsĩ lwʼeEfurata.

¹¹Neryo ekĩ kye kĩsosekanĩo kyʼebarua eyo batuma oko mwami Artasasta bati, Ĩtwe abagombe bawe abandu bʼeyisirya oko lũsĩ lwʼeEfurata tuti,

¹²Kiminyikale oko mwami, ngoko Abayũda balũa ukʼuwe babĩrĩtũhĩkako eYerũsalema; kandi bakahĩmba omũyĩ mubi nʼowʼerihona, kandi bakasonda eribuga esyombĩmbo, nʼerĩsũbya ebibanza.

¹³Neryo kiminyikale lino oko mwami, tuti omũyĩ oyũ amaswahĩmbwa, nʼesyombĩmbo syamahĩmbwa, sibendisyaliha omusolo, kutse engemu, kutse omuhako wʼenzira, neryo endũndĩ yʼabami yasyakeha.

¹⁴Nĩkwa kusangwa tukakolera ekikali kyʼOmwami, neryo siritolere tukalangira omwami akahemuka, busana nʼekyo twabirituma omwatsi wʼerĩmĩnyĩsya omwami.

¹⁵Tuti basondaye omo kitabu kyʼemyatsi yʼabotata wabo; neryo wasyalebya omo kitabu kyʼemyatsi nʼeriminya omũyĩ oyũ kwʼali mũyĩ wʼerihona nʼerilneta obũlĩge oko bami nʼoko bihugo, kandi ngoko batula bakayira omwaga go mugo na kera; busana nʼomwatsi oyũ omũyĩ oyũ mwayirwa mo mulala.

¹⁶Tũkamĩnyĩsaya omwami tuti omũyĩ oyũ amahĩmbwa, nʼesyombĩmbo syamahwa, busana nʼekyo, siwendisyabana bũsokĩ eyisirya wʼolũsĩ Efũratĩ.

¹⁷Neryo omwami mwatuma erĩsũbĩrya omũtabalĩ ye Rehemũ, nʼoko mũhandĩkĩ ye Sĩmũsaĩ, nʼoko bandi balĩkyabo abĩkere eSamarĩa nʼabali ehandi omo kihugo eyisirya wʼolũsĩ Efũratĩ, ati, Obuholo. Kandi,

¹⁸ebarua eyo mwatutumira yabirisomwa ndeke embere syage.

¹⁹Nage nabirihamula, kandi babĩrĩsondya, neryo kyamabanika ngoko mũyĩ oyũ oko mugulu wa kera abirilwa nʼabami, kandi omwaga nʼerihona mobyakolwa mugo.

²⁰Kandi abami bʼamaka babiritabala oko Yerũsalema, ibakatabala oko bihugo byosĩ eyisirya wʼolũsĩ lwʼeEfũratĩ; kandi mobalihwa omusolo, nʼomuhako, nʼengemu yʼenzira.

²¹Lino muhamule erĩtsĩrĩsya abandu aba okwʼikola omũbĩrĩ, nʼomũyĩ oyũ sĩahĩmbawe, erĩhĩka aho nasyahamulira omwatsi.

²²Nʼakandi muyitsinge omo mwatsi oyũ, omwaga akasyakanya nʼabami bakasyakwa.

²³Neryo omugulu ekĩsosekanĩo kyʼebarua yʼOmwami Artasasta kyasomawa embere sya Rehemũ, na Sĩmũsaĩ mũhandĩkĩ, nʼabalĩkyabo, mobanguha eriya eYerũsalema oko Bayũda, nʼerĩtsĩrĩsyabo nʼamaka nʼerilwa.

²⁴Neryo omũbĩrĩ wʼenyũmba ya Nyamuhanga eyiri eYerũsalema mũmbya; kandi mũmbya erĩhĩka oko mwaka wʼakabiri wʼeritabala lya Darĩo omwami wʼePersĩa.