Read nande Ezera 5 Bible Online

Ezera 5 - nande bible

Ezera 5

¹Neryo abamĩnyererĩ, ye Hagaĩ omũmĩnyererĩ, na Zakarĩa mugala wa Ĩdo, mobaminyerera oko Bayũda ababya eYũda nʼeYerũsalema. Mobaminyerera kubo omo lĩna lya Nyamuhanga wa Ĩsraelĩ oyo wabya mukulu wabo.

²Neryo Zerũbabelĩ mugala wa Salatĩele, na Yesũa mugala wa Yozadakĩ, mobahangana nʼerĩtsũka erĩhĩmba enyũmba ya Nyamuhanga eYerũsalema; nʼabamĩnyererĩ ba Nyamuhanga babya haguma nabo erĩwatĩkyabo.

³Oko mugulu oyo Tatenaĩ, omũtabalĩ eyisirya wʼolũsĩ Efũratĩ, na Setarĩbozenaĩ, nʼabalĩkyabo, mobasa kubo, mobabũlyabo bati, Nindi wabahamula erĩhĩmba enyũmba eyĩ, nʼeribuga olũhĩmbo olũ kwehĩ?

⁴Neryo motwabwirabo amena wʼabandu abakahĩmba enyũmba eyĩ.

⁵Nĩkwa erĩso lya Nyamuhanga wabo lyabya oko bakulu bʼAbayũda, mobatetatsĩrĩsyabo, erĩhĩka aho mwatsi oyo asyahĩkĩra uku Darĩo, neryo erĩsũbĩrya lyasyasũbũlĩbwa omo barua busana nago.

⁶Ekĩsosekanĩo kyʼebarua eyo Tatenaĩ omũtabalĩ mukulu wʼeyisirya wʼolũsĩ Efũratĩ, na Setarĩ-bozenaĩ nʼabalĩkyabo abakulu, ababya eyisirya oko lũsĩ Efũratĩ, mobatuma oko mwami Darĩo.

⁷Mobamutumira ebarua, omwisi wayo ĩyĩhandĩkĩrwe yitya; Uku Darĩo omwami, Obuholo bosĩ.

⁸Kiminyikale oko mwami, ngoko twingira omo kihugo kyʼeYũda, oko nyũmba ya Nyamuhanga Mukulu, eyahĩmbawa omo mabwe manene manene, nʼemiti ĩhĩrĩrwe omo syombĩmbo; nʼomũbĩrĩ oyũ anemugenda-genda nʼomũhwa nʼeribana omũyĩsa omo byala byabo.

⁹Neryo motwabũlya abakulu abo, nʼerĩbũlyabo tuti, Nindi wabiribahamula erĩhĩmba enyũmba eyĩ, nʼeribuga olũhĩmbo olũ kwehĩ?

¹⁰Motwabũlya amena wabo nĩbya, erĩkũmĩnyĩsya, itwatoka erisaka amena wʼabandu ababya bakulu babo.

¹¹Nabo mobatũsũbĩrya bati, Ĩtwe tuli bagombe ba Nyamuhanga wʼelubula nʼekihugo, netu tũkahĩmba eHekalũ eyahĩmbawa emyaka yingaha kera eHekalũ eyĩ, omwami mukulu wa Ĩsraelĩ mwahĩmbayo nʼeribugayo.

¹²Nĩkwa kusangwa abotata wetu bahĩtanaya Nyamuhanga wʼelubula, Nyamuhanga mwahabo omo byala bya Nebũkadeneza omwami wʼeBabelĩ, Omukaldea, oyo waheraya eHekalũ eyĩ, nʼerĩhũnga abandu abo eritwalabo eBabelĩ.

¹³Nĩkwa omo mwaka wʼerĩtsũka wa Kĩro, omwami wʼeBabelĩ, omwami Kĩro mwahamula erĩhĩmba enyũmba eyĩ ya Nyamuhanga.

¹⁴Kandi ebindu byʼesyamagetsi nʼebyʼebĩtsĩpa byʼenyũmba ya Nyamuhanga ebyo Nebũkadeneza alũsaya omo Hekalũ eyabya eYerũsalema, nʼeriretabyo omo Hekalũ yʼeBabelĩ, bye nʼebyo mwami Kĩro alũsaya omo Hekalũ yʼeBabelĩ, mobyahabwa oko mundu erĩna liwe Sesĩbazarĩ, oyo Kĩro ahĩra mo mũtabalĩ.

¹⁵Neryo mwamubwira ati, Ĩmaya ebindu ebĩ, ugende ũhĩrebyo omo Hekalũ eyiri eYerũsalema, nʼenyũmba ya Nyamuhanga ĩhĩmbawe aho yanabya.

¹⁶Neryo Sesĩbazarĩ oyo mwasa, mwahĩra ebibanza byʼenyũmba ya Nyamuhanga eyiri eYerũsalema; nʼerĩtsũka oko mugulu oyo nʼerĩhĩka na lino ĩkĩnahĩmbawa, na lino siritahwa.

¹⁷Neryo lino kyamatsemesya omwami, mũsondĩbawe omo nyũmba yʼembĩso yʼOmwami, eyiri eBabelĩ, nga nina kwenene, omwami Kĩro nga mwahamula erĩhĩmba enyũmba eyĩ ya Nyamuhanga eYerũsalema; kandi omwami atutumire ekĩkamũtsemesaya omo mwatsi oyũ.