Read nande Ezera 7 Bible Online

Ezera 7 - nande bible

Ezera 7

¹Neryo enyũma wʼemyatsi eyĩ, omo butabale bʼomwami Artasasta wʼePersĩa, Ezera mugala wa Seraya, mugala wa Azaria, mugala wa Hĩlĩkĩa,

²mugala wa Salumu, mugala wa Zadokĩ, mugala wa Ahĩtũbũ,

³mugala wa Amarĩa, mugala wa Azaria, mugala wa Meraotĩ,

⁴mugala wa Zerahĩa, mugala wa Ũzĩ, mugala wa Bũkĩ,

⁵mugala wa Abĩsũa, mugala wa Fĩnehasĩ, mugala wa Eleazarĩ, mugala wa Harũnĩ, omũhererĩ mukulu;

⁶Ezera oyũ mwahetuka akalũa eBabelĩ. Naye abya mũhandĩkĩ omunyima omo migambo ya Musa, eyo Mwami Mukulu wa Ĩsraelĩ ahabo. Neryo omwami mwamuha ebyosĩ ebyo asaba, kusangwa ebyala byʼOmwami Mukulu, Nyamuhanga wuwe byamubyako.

⁷Kandi abandi bʼoko bana ba Ĩsraelĩ nʼoko bahererĩ, nʼoko Balawĩ, nʼoko bĩmbĩ, nʼabateya bʼesyongyo, nʼabagombe bʼeHekalũ, mobahetukira eYerũsalema, oko mwaka wʼakalinda wʼOmwami Artasasta.

⁸Neryo Ezera mwasa oko Yerũsalema oko mukera wʼakatanu, owabya mwaka wʼakalinda wʼOmwami.

⁹Kusangwa oko kiro kyʼerĩtsũka kyʼomukera wʼerĩtsũka, Ezera mwatsũka erihetuka akalũa eBabelĩ; nʼoko kiro kyʼerĩtsũka kyʼomukera wʼakatanu mwahĩka eYerũsalema busana nʼebyala bibuya bya Nyamuhanga wuwe ebyamubyako.

¹⁰Kusangwa Ezera ĩnĩabĩrĩhĩra omutima wuwe eriiga emigambo yʼOmwami Mukulu, nʼerikolayo, nʼerĩkangĩrĩrya omo Ĩsraelĩ emigambo yiwe nʼebilayiro biwe.

¹¹Neryo ekĩ nĩ kĩsosekanĩo kyʼebarua eyo mwami Artasasta aha Ezera omũhererĩ, omũhandĩkĩ, oyo wiga ebĩnywa byʼebihano byʼOmwami Mukulu, nʼemigambo yiwe uku Ĩsraelĩ.

¹²Iti, Ĩngye, Artasasta, omwami wʼabami, uku Ezera omũhererĩ, omũhandĩkĩ wʼemigambo ya Nyamuhanga wʼelubula, wabũkĩre ndeke!

¹³Namahamula, nyiti, Abosĩ bʼoko bandu ba Ĩsraelĩ, nʼabahererĩ babo nʼAbalawĩ, omo bwami bwage, abanzĩre ĩbobene eriya eYerũsalema, bagende nawe.

¹⁴Kusangwa omwami nʼabahanĩ buwe balinda, bakakutuma erĩbũlya busana nʼeYũda nʼeYerũsalema, ngʼemigambo ya Nyamuhanga wawe, eyiri omo byala byawe,

¹⁵uheke ebĩtsĩpa nʼesyamagetsi, ebyo mwami nʼabahanĩ buwe babiriha omwʼĩyĩsũnza lyabo uku Nyamuhanga wa Ĩsraelĩ oyuwite obwĩkalo buwe eYerũsalema,

¹⁶nʼebĩtsĩpa nʼesyamagetsi nʼebyosĩ ebyo Wasyabana omo kihugo kyosĩ kyʼeBabelĩ, haguma nʼerĩhĩtya lyʼerĩyĩsũnza lyʼabandu, nʼeryʼabahererĩ, bakaha nʼerĩyĩsũnza busana nʼenyũmba ya Nyamuhanga wabo eyiri eYerũsalema.

¹⁷Busana nʼekyo wasyagula nʼomũhwa gosĩ omo syofranka esĩ, esyonume, nʼesyombangale, nʼebyana byʼesyombũlĩ, haguma nʼamahere wabo wʼeyĩsyano, namahere wabo wʼerĩpũlya, nʼerihongerabyo oko kiherero kyʼenyũmba ya Nyamuhanga wenyũ eyiri eYerũsalema.

¹⁸Nʼekindu kyahi ekyo ũkasĩma nʼabagala benyũ bakasĩma erikola umwʼebyo ebĩsakĩre byʼebĩtsĩpa nʼesyamagetsi, mukikole ngʼerisonda lya Nyamuhanga wenyũ.

¹⁹Nʼebindu ebyo wahabawa busana nʼomũbĩrĩ wʼenyũmba ya Nyamuhanga wawe, ebyosĩ uhebyo Nyamuhanga eYerũsalema.

²⁰Nʼekĩndũkĩ ekyo kyasyabya bwaga busana nʼenyũmba ya Nyamuhanga wawe, ekyo wasyaliha, ũkĩlũsaye omo nyũmba yʼembĩso yʼOmwami.

²¹Nage, ĩngye mwami Artasasta, ngahĩra erihamula oko bateya bosĩ bʼebindu abali eyisirya wʼolũsĩ Efũratĩ, nyiti ekĩndũkĩ ekyo mũhererĩ Ezera, omũhandĩkĩ wʼemigambo ya Nyamuhanga wʼelubula, ebyo asyabatswa, bikolawe nʼomũhwa gosĩ,

²²kutse bĩnahĩke uku talanta ĩgana syʼebĩtsĩpa, nʼebĩrengĩ erĩgana byʼengano, nʼebĩrengĩ erĩgana byʼebĩnyũ, nʼesyondehĩ erĩgana syʼamagũta, nʼomũnyũ owate ko lulengo.

²³Ekĩndũkĩ ekyo Nyamuhanga wʼelubula akahana, kikolawe ndeke-ndeke busana nʼenyũmba ya Nyamuhanga wʼelubula, hakasyabya erihitana oko bwami bʼomwami nʼabagala buwe.

²⁴Nibya tũkabamĩnyĩsaya tuti sĩrĩhamwĩre erĩsolesya abahererĩ, nʼAbalawĩ, nʼabĩmbĩ, nʼabateya bʼesyongyo, nʼabagombe bʼeHekalũ, kutse abagombe bʼenyũmba eyĩ ya Nyamuhanga, kutse engemu, kutse omusolo wʼenzira.

²⁵Nawe Ezera, omo menge wa Nyamuhanga wawe awali omo byala byawe ũhĩre abatwĩ bʼesyombanza nʼabatswerĩ, abangatswera abandu bosĩ abali eyisirya wʼolũsĩ Efũratĩ, abosĩ abasĩ emigambo ya Nyamuhanga wawe; kandi mũkangĩrĩraye oyũtasĩyo.

²⁶Nʼobuli mundu oyukagana erikola emigambo ya Nyamuhanga wawe, nʼemigambo yʼOmwami, atswerawe nʼomũhwa gosĩ, kyamabya ni luholo kutse erihigwa, kũtse erĩĩmya ebindu biwe, kutse omũlĩkĩ.

²⁷Omwami Mukulu, Nyamuhanga wʼabotata wetu apipawe, oyo wabĩrĩhĩra omwatsi ngʼoyũ omo mutima wʼOmwami, erisitika enyũmba yʼOmwami Mukulu eyiri eYerũsalema;

²⁸oyo wanyĩkanganaya obubuya bʼolwanzo embere syʼOmwami, nʼabahanĩ buwe, nʼembere syʼabanya-mwami bʼamaka bʼomwami. Nage monabana amaka busana nʼebyala byʼOmwami Mukulu Nyamuhanga wage endata wage, nage monahĩndanĩa abandu bakulu omo Ĩsraelĩ bahetuke haguma nage eYerũsalema.