Read nande Ezera 8 Bible Online

Ezera 8 - nande bible

Ezera 8

¹Aba ba bakulu bʼebĩtũnga byʼabotata wabo, nʼesĩ sye syondengo syʼabahetuka haguma nage erĩlũa eBabelĩ, omwʼitabala lyʼOmwami Artasasta:

²Oko bagala ba Fĩnehasĩ, ye Gerĩsonĩ. Nʼoko bagala ba Ĩtamarĩ, ye Danĩelĩ. Nʼoko bagala ba Dawĩdĩ, ye Hatũsĩ.

³Oko bagala ba Sekanĩa, oko bagala ba Parosĩ, ye Zakarĩa; na haguma naye mohaganzwa omo ndengo syʼabalume, ĩgana nʼamakũmĩ atanu (150).

⁴Oko bagala ba Pahatĩ-Moabũ, ye Elĩehonaĩ mugala wa Zerahĩa; kandi haguma naye abalume magana abiri (200).

⁵Oko bagala ba Sekanĩa, mugala wa Yahazĩelĩ; na haguma naye abalume magana asatu (300).

⁶Nʼoko bagala ba Adĩnĩ, ye Ebedĩ mugala wa Yonatana; na haguma naye abalume makũmĩ atanu (50).

⁷Nʼoko bagala ba Elamũ, ye Ĩsaya mugala wa Atalia; na haguma naye abalume makũmĩ alinda (70).

⁸Nʼoko bagala ba Sefatĩa, ye Zebadĩa mugala wa Mĩkaelĩ; na haguma naye abalume makũmĩ munani (80).

⁹Oko bagala ba Yoabũ, ye Obadia mugala wa Yehĩelĩ; na haguma naye abalume magana abiri nʼerĩkũmĩ nʼomunani (218).

¹⁰Nʼoko bagala ba Selomĩtĩ, mugala wa Yosĩfia; na haguma naye abalume erĩgana nʼamakũmĩ ndatu (160).

¹¹Nʼoko bagala ba Bebaĩ, ye Zekarĩa mugala wa Bebaĩ; na haguma naye abalume makũmĩ abiri nʼomunani (28).

¹²Nʼoko bagala ba Azĩgadĩ, ye Yohananĩ mugala wa Hakatanĩ; na haguma naye abalume erĩgana nʼerĩkũmĩ (110).

¹³Nʼoko bagala ba Adonĩkamũ, ababya bʼendũlĩ; nʼamena wabo waya: Elĩfeletĩ, na Yeũelĩ, na Semaya; na haguma nabo Abalume makũmĩ ndatu (60).

¹⁴Nʼoko bagala ba Bĩgĩvaĩ, ye Ũtaĩ, na Zabũdĩ: na haguma nabo abalume makũmĩ alinda (70).

¹⁵Neryo monahĩndanĩabo haguma oko lũsĩ olukaya eAhaba; nʼaho motwalalirira ho biro bisatu; monalebya abandu, nʼabahererĩ, mondabana nʼomuguma wʼabagala ba Lawĩ.

¹⁶Neryo monatumira uku Elĩezerĩ, nʼuku Arĩelĩ, nʼuku Semaya, nʼuku Elnatana, nʼuku Yarĩbũ, nʼuku Elnatana, nʼuku Natana, nʼuku Zakarĩa, nʼuku Mesũlamũ, abandu bakulu; busana na Yoarĩbũ nibya, nʼuku Elnatana ababya bakangĩrĩrya.

¹⁷Neryo monatumabo uku Ĩdo omukulu wʼaho Kasĩfĩa; monabwirabo ebyo basyabwira Ĩdo nʼabagala babo abagombe bʼeHekalũ, aho eKasĩfia, batuletere abakolĩ busana nʼenyũmba ya Nyamuhanga wetu.

¹⁸Kandi ngʼebyala bibuya bya Nyamuhanga wetu endata kwĩtwe mobatuletera omundu wʼeriyilandako, wʼoko bagala ba Malĩ, mugala wa Lawĩ, mugala wa Ĩsraelĩ; na Serebĩa, haguma nʼabagala buwe nʼabagala babo, erĩkũmĩ nʼomunani.

¹⁹Na Hasabĩa haguma naye ye Ĩsaya wʼoko bagala ba Merarĩ, abagala babo nʼabagala buwe, makũmĩ abiri (20).

²⁰Nʼoko bagombe bʼeHekalũ, abo Dawĩdĩ nʼabanya-mwami baha busana nʼomũbĩrĩ wʼAbalawĩ, abagombe bʼeHekalũ magana abiri nʼamakũmĩ abiri (220); abosĩ ba kubo mobahulwa omo mena.

²¹Neryo monahĩra eritsira kalyo aho, oko lũsĩ Ahava, itwatoka erĩyĩkehya embere sya Nyamuhanga wetu, nʼerĩmũsondya kwʼenzira itunganene busana netu, na busana nʼabana betu, na busana nʼebindu byetu byosĩ.

²²Kusangwa monabya nʼesĩsonĩ erĩbũlya omwami yʼekĩtũto kyʼabalawĩ nʼabandu abali oko syosabayĩrĩ erĩtũwatĩkya erilwa nʼenzĩgũ omo nzira, kusangwa twabya itwabiribwira omwami tuti, Ebyala bya Nyamuhanga wetu biri oko bosĩ abakamũsonda-sondaya, eribana ekibuya; nĩkwa Obũtokĩ buwe nʼerihitana liwe bikalwa nʼabosĩ abakamũsĩganaya.

²³Neryo motwatsira akalyo nʼerisaba Nyamuhanga wetu busana nʼekĩ, naye mwahulikirira erilaka lyetu.

²⁴Neryo monasolola abakulu bʼabahererĩ erĩkũmĩ nʼababiri, na Serebĩa na Hasabĩa nibya, na haguma nabo abagala babo erĩkũmĩ,

²⁵kandi, monalengerabo ebĩtsĩpa nʼesyamagetsi, nʼebindu byʼebihembo busana nʼenyũmba ya Nyamuhanga wetu, ebyo mwami nʼabahanĩ buwe, nʼabakulu buwe, nʼAbaĩsraelĩ bosĩ, ababyaho, babana.

²⁶Neryo monalengerabo omo kĩlo erĩhĩrasyo omo byala byabo, esyotalanta syʼebĩtsĩpa magana ndatu nʼamakũmĩ atanu (650), nʼebibindi byʼebĩtsĩpa byʼesyotalanta erĩgana (100), nʼesyamagetsi esyotalanta erĩgana (100);

²⁷nʼebibindi byʼesyamagetsi makũmĩ abiri (20), ebyʼedarĩkĩ elfu nguma, nʼebibindi bibiri byʼomulinga owakakangaba-sanaya, byʼobũgũlĩ ngʼesyamagetsi.

²⁸Monabwirabo nyiti, Ĩnywe muli babũyĩrĩre busana nʼOmwami Mukulu, nʼebibindi ebyo bĩbũyĩrĩre, nʼebĩtsĩpa nʼesyamagetsi nĩ ʼhitya busana nʼolwanzo oko Mwami Mukulu, Nyamuhanga wʼabotata wetu.

²⁹Mũtegaye, mubikebyo erĩhĩka aho mwasyalengerabyo embere syʼabakulu bʼabahererĩ nʼAbalawĩ, nʼabakulu bʼebĩtũnga byʼabotata ba Ĩsraelĩ, eYerũsalema, omo byumba byʼenyũmba yʼOmwami Mukulu.

³⁰Neryo abahererĩ nʼAbalawĩ mobangirira obũlĩtohe bwʼebĩtsĩpa nʼobwʼesyamagetsi, nʼebibindi, eriretabyo eYerũsalema omo nyũmba ya Nyamuhanga wetu.

³¹Neryo motwalũa oko lũsĩ Ahava oko kiro kyʼerĩkũmĩ nʼebibiri kyʼomukera wʼerĩtsũka, eriya eYerũsalema; nʼebyala bya Nyamuhanga wetu byabya ũkwʼĩtwe, naye mwatũlamya omo byala byʼenzĩgũ nʼabakatũlĩmbĩraya omo nzira.

³²Neryo motwahĩka eYerũsalema, motwĩkalaho biro bisatu.

³³Nʼoko kiro kyʼakani ebĩtsĩpa nʼesyamagetsi nʼebibindi mobyalengerwa omo kĩlo omo nyũmba ya Nyamuhanga wetu erĩhĩrwa omo byala bya Meremotĩ mugala wa Ũrĩa omũhererĩ, na Eleazarĩ mugala wa Fĩnehasĩ abya haguma naye; nʼAbalawĩ Yozabadĩ mugala wa Yesũa, na Noadĩa mugala wa Bĩnũĩ, babya haguma nabo.

³⁴Ebyosĩ mobyaganzwa, nʼebyosĩ mobyahĩrwa omo kĩlo; nʼobũlĩto bosĩ omo kĩlo mobwasakwa oko mugulu oyo.

³⁵Neryo abanyegawa, abalũa eyo bahũngĩrawa, mobahongera Nyamuhanga wa Ĩsraelĩ amahere wʼerĩokererya, esyonume erĩkũmĩ nʼesĩbĩrĩ (12) busana nʼAbaĩsraelĩ bosĩ, nʼesyombangale makũmĩ mwenda nʼendatu (96), nʼebyana byʼesyombũlĩ makũmĩ alinda nʼebirinda (77), nʼesyombaya erĩkũmĩ nʼesĩbĩrĩ (12) busana nʼobuhere bwʼamalolo; ebyosĩ ebĩ byabya buhere bwʼerĩokererya oko Mwami Mukulu.

³⁶Neryo mobaha ekihamulo kyʼOmwami oko batabalĩ bʼomwami nʼoko bahanganĩrĩ bʼeyisirya wʼolũsĩ Efũratĩ, kandi mobawatĩkya abandu nʼenyũmba ya Nyamuhanga.