Read nande Nehemĩa 1 Bible Online

Nehemĩa 1 - nande bible

Nehemĩa 1

¹Ebĩnywa bya Nehemĩa mugala wa Hakalĩa. Neryo oko mukera wʼeKĩsĩlewũ, oko mwaka wʼamakũmĩ abiri, omugulu nabya eSũsa, ekikali kyʼOmwami.

²Neryo Hananĩ omuguma wʼoko bagala betu mwasa, iye nʼabandi balume bakalũa eYũda; neryo, monabũlyabo emyatsi yʼAbayũda abatibita nʼeribala, erĩhũngwa, nʼomwatsi wʼeYerũsalema.

³Nabo mobambwira bati, Ababala erĩhũngwa eyo omo kihugo, bali omo maligo manene nʼeritsumwa; nʼolũhĩmbo lwʼeYerũsalema lwabirisambulwa, nʼesyongyo syako syabĩrĩhĩsĩbwa omo muliro.

⁴Neryo omugulu nowa ebĩnywa ebĩ, monĩkala ahisi nʼerĩtogongya emĩsonĩa, nʼeririra, oko biro ebyo; monatsira kalyo nʼerisaba embere sya Nyamuhanga wʼelubula.

⁵Neryo monabũga nyiti, Ngakulemba, uwe Mwami Mukulu, Nyamuhanga wʼelubula, Nyamuhanga Mukulu, nʼowʼerĩswekya, oyũkaberereraya endagano nʼekibuya kyʼolwanzo oko bandu bakamwanza nʼerĩteya ebihano biwe.

⁶Utege okũtũ kwawe, nʼameso wawe ahagukale, iwatoka erĩowa erisaba lyʼomugombe wawe, eryo ngasaba embere syawe oko mugulu oyũ, omo musibo nʼomo kiro, busana nʼabana ba Ĩsraelĩ abagombe bawe, omugulu ngabikula amalolo wʼabana ba Ĩsraelĩ, ago twakũhalĩraya. Ega, ĩngye nʼekĩtũnga kya tata wage twabĩrĩhalya.

⁷Twabirikola nye nyingi ukʼuwe, sĩtwetateya ebihano byawe, kutse emigambo yawe, kutse ebilayiro byawe, ebyo wahana omugombe wawe Musa.

⁸Ngakulemba, Wibuke ekĩnywa ekyo wahana omugombe wawe Musa, uti, Mwamanyĩsĩganĩa, nasyabapanzapanza omo bihanda.

⁹Nĩkwa mwamasuba ũkwʼĩngye, nʼerĩteya ebihano byage nʼerikolabyo, nomo mwangabya imwabiripanzwa nʼeribya oko syondũlĩ syʼekyanya, nĩkwa nasyabahĩndanĩa erĩlũayo, nasyabaleta aho nayisoga erĩĩkalyaho erĩna lyage.

¹⁰Neryo aba ni bagombe bawe nʼabandu bawe, abo watongolaya omo bũtokĩ bwawe bunene, nʼomo byala byawe byʼamaka.

¹¹Ngakulemba uwe Mukama, lino okũtũ kwawe utegeko busana nʼerisaba lyʼomugombe wawe, nʼokwʼisaba lyʼabagombe bawe, abatsemĩre erikenga erĩna lyawe, kandi ngakusaba ũtokesaye omugombe wawe mũnabwĩre, kandi umuhe olukogo omo meso wʼomundu oyũ. Nĩkwa ĩngye nabya mũtengĩ busana nʼomwami.