Read nande Nehemĩa 4 Bible Online

Nehemĩa 4 - nande bible

Nehemĩa 4

¹Nĩkwa omugulu Sanĩbalatĩ owa ko tũkahĩmba olũhĩmbo, mwahitana kutsibu, nʼerikarama kutsibu, nʼerĩsekererya Abayũda.

²Neryo mwabũga embere syʼabagala babo nʼembere syʼomulondo wʼeSamarĩa, ati, Abayũda aba batsekemene bakakolakĩ kwehĩ? Basyayikongoteralo kwehĩ? Basyahonga amahere kwehĩ? Basyabugiralo kiro kiguma kwehĩ? Basyatoka erĩsũbya mabwe awabiribya kilundo kyʼolũtũtũ, awabirihya kwehĩ?

³Neryo Tobĩa Omũamonĩ abya hakũhĩ naye, neryo mwabũga ati, Nʼekyo bakahĩmba, eboha yamahetukiraho, yasyasambula olũhĩmbo lwabo lwʼamabwe!

⁴Uwe Nyamuhanga wetu, Ũtowe; ngoko tukaponawa! Ũsũbũlĩrayebo oko mitwe yabo ebĩtsũmĩ byabo, uhebo banyegawe omo kihugo kyʼobunyegwa.

⁵Kandi suswike obubi bwabo, kandi amalolo wabo siasangulawe embere syawe; kusangwa babĩrĩtwa emitima yʼabahĩmbĩ.

⁶Litya motwahĩmba olũhĩmbo; nʼolũhĩmbo losĩ molwahĩndanĩbwa haguma erĩhĩka oko luhande lʼobuli bwalo endata; kusangwa bandu babya bawite omutima wʼerikola omũbĩrĩ.

⁷Nĩkwa omugulu Sanĩbalatĩ, na Tobĩa, nʼAbaarabu, nʼAbaamonĩ, nʼAbaasĩdodĩ, babere bowa ambu erĩsũbya olũhĩmbo lwʼe Yerũsalema lũnemũlolya embere, nʼahasambwĩre ĩhanemũlĩbwa, mobahitana kutsibu.

⁸Kandi abosĩ mobaya embĩta haguma eriyalwa nʼeYerũsalema, nʼerireta omwaga.

⁹Nĩkwa ĩtwe motwasaba Nyamuhanga wetu, nʼerĩhĩra abateya omo musibo nʼomo kiro, busana nabo.

¹⁰Neryo Yũda mwabũga ati, Amaka wʼabahekĩ bʼemiheke akahwa, kandi muli ebibaya bingi; kikaleka itutatoka erĩhĩmba olũhĩmbo.

¹¹Nʼesyonzĩgũ syetu mosyabũga siti, Sibendisyaminya, erĩhĩka aho twasyahĩkĩra kubo, nʼerĩĩtabo, nʼerĩtsĩrĩsya omũbĩrĩ.

¹²Neryo omugulu Abayũda ababya bĩkere hakũhĩ nabo bahĩka, mobatubwira ngendo ĩkũmĩ, bati, Basyalũa ehosĩ-hosĩ erilwa netu.

¹³Busana nʼekyo, monahĩra abandu ahʼeyĩkwa kutsibu hʼemyanya eyabya enyũma wʼolũhĩmbo, ahabya obwerere, monahĩraho abandu ngʼebĩtũnga byabo ko biri haguma nʼemĩyalĩ yabo, nʼamatũmo wabo, nʼamata wabo.

¹⁴Neryo monasamalira, monahangana, monabwira bakulu, nʼabatabalĩ, nʼabandu abasĩgala nyiti, Simubahebo; mwibuke Omukama, oyuli mukulu nʼowʼerĩũbahya, mulwire abagala benyũ, nʼabana benyũ, nʼabali benyũ, nʼabakalĩ benyũ, nʼebĩtũnga byenyũ.

¹⁵Neryo omugulu esyonzĩgũ syetu syowa ngoko twabiriminya, kandi ngoko Nyamuhanga abĩrĩtĩngĩtya embĩta yabo, ĩtwe bosĩ motwasuba oko lũhĩmbo; obuli muguma oko mũbĩrĩ wuwe.

¹⁶Neryo erĩtsũka oko mugulu oyo ekihande kyʼabagombe bage mobakola omũbĩrĩ, nʼekihande kyabo mokyahamba matũmo, nʼesyongabo, nʼamata, nʼesyokanzu syʼebyuma byʼamalwa oko bĩkũba byabo, nʼabakulu mobahanganira ekĩtũnga kyosĩ kya Yũda.

¹⁷Abahĩmba erĩsũbya olũhĩmbo nʼabandu abaheka emiheke; obuli mundu mwakola omũbĩrĩ nʼebyala biguma, nʼomo bindi byala mwahamba ebindu biwe byʼamalwa.

¹⁸Nʼabahĩmbĩ, obuli mundu iniambite omũyalĩ wuwe oko ndungu yiwe, ko bahĩmba batya. Nʼoyo wabuha engubi abya hakũhĩ nage.

¹⁹Neryo monabwira abakulu nʼabatabalĩ nʼabandi bandu nyiti, Omũbĩrĩ ni munene kandi ni mungi, netu tugabene oko lũhĩmbo, ogundi hali oko gundi.

²⁰Aho mũkowa omulenge wʼengubi, muyeho, hakũhĩ netu. Nyamuhanga wetu asyatulwira.

²¹Ko twakola tutya omũbĩrĩ; nʼoluhande lwabo mobahamba amatũmo erĩtsũka omo ngyakya-ngyakya erĩhĩka aho esyongũnũnũ syahulukira.

²²Monabwirabo oko mugulu oyo nyiti, Obuli mundu haguma nʼomugombe wuwe bĩkale eYerũsalema, batoke erĩtũteya omo kiro, kandi batoke erikola omũbĩrĩ omo musibo oyo.

²³Neryo ĩngye nʼabagala betu, kutse abagombe bage, kutse abandu bʼobũteya abanyikwama, motũtalũsya esyongimba syetu, obuli mundu mwaya oko lũsĩ ĩnĩahekĩre ebindu biwe byʼamalwa.