Read nande Nehemĩa 6 Bible Online

Nehemĩa 6 - nande bible

Nehemĩa 6

¹Neryo omugulu babwira Sanĩbalatĩ na Tobĩa, na Gesemũ Omuarabu nʼabandi oko syonzĩgũ syetu, ngoko nabĩrĩhĩmba olũhĩmbo, isihakiri ahasambukere mulo nʼomo mugulu oyo isindinasingika esyonyũyĩ syʼomo syongyo.

²Neryo Sanĩbalatĩ na Gesemũ mobanyitumako, bati, Wase tũhĩndane omo mũyĩ muguma omo bwerere bwʼeOno. Nĩkwa baganĩraya erinyiyira nabi.

³Nage monatuma kubo kwʼabakwenda, nyiti, Ngakola omũbĩrĩ munene, kikaleka indatoka eriandagalira ewenyũ, busana nakĩ akasyabũlegeta oko mugulu ngasĩgago, nʼeribandagalirako kwehĩ?

⁴Nabo mobanyitumako engendo ĩnĩ omo mũsĩndo oyũ; nage monasũbĩryabo ngʼebĩnywa ebyo.

⁵Neryo Sanĩbalatĩ mwatuma omugombe wuwe kwĩngye omo mũsĩndo oyo engendo yʼakatanu nʼebarua omo byala biwe ĩsĩyĩbohĩre.

⁶Omwisi wayo yasakawa iti, Engulu yabĩrĩkanĩbwa omo bihanda, na Gesemũ akabũga, ati uwe nʼAbayũda mũkaganĩraya erihona; busana nʼomwatsi oyũ ũkahĩmba olũhĩmbo; kandi ambu nawe ukasonda eribya mwami wabo.

⁷Kandi wabĩrĩhĩra abamĩnyererĩ nibya erĩtũla omwatsi wawe eYerũsalema uti, Hali mwami eYũda; neryo engulu eyo yasyahĩka oko mwami omo bĩnywa ebĩ. Neryo wase lino, tũkanaye haguma.

⁸Neryo monamutumako, nyiti, Sihehatakoleka myatsi ngʼeyĩ ũkabũga, nĩkwa ũkalengekanayayo omo mutima wawe.

⁹Kusangwa abosĩ babya bakasonda erĩtũbahĩsya bati, Ebyala byabo byasyoloba omo mũbĩrĩ, isiangakoleka. Nĩkwa lino uwe Nyamuhanga, uhe ebyala byage byʼakagala.

¹⁰Neryo monaya omo nyũmba ya Semaya mugala wa Delaya mugala wa Mehetabelĩ, oyo wabya alwere eka. Naye mwabũga ati, Tũhĩndane haguma omo nyũmba ya Nyamuhanga, omo Hekalũ, neryo tukinge esyonyũyĩ syʼeHekalũ; kusangwa bakandiasa ĩbakwĩta; ega, bakandiasa omo kiro erĩkwĩta.

¹¹Nage monabũga nyiti, Omundu oyuli nga ngye anganatibita kwehĩ? Nindi, oyo wangabya nga ngye, oyo wangaya omo Hekalũ erĩlamya engebe yiwe kwehĩ? Sindiendingira.

¹²Neryo monaminya, ngoko Nyamuhanga mwatamutuma; nĩkwa mwaminyerera atya ati akanyĩta; na Tobĩa na Sanĩbalatĩ ĩbabĩrĩmũkondesya.

¹³Kusangwa mobamũkondesya bati nyubahe, nʼerikola litya, nʼerĩhalya, batoke eribana omwatsi wʼengulu nyibi, ibatoka erinyitsuma.

¹⁴Uwe Nyamuhanga wage, Wibuke Tobĩa, na Sanĩbalatĩ omo mĩbĩrĩ yabo eyĩ, nʼomũmĩnyererĩ wʼobũkalĩ ye Noadĩa nibya, nʼabandi nʼabʼoko bamĩnyererĩ, abasonda erĩnyũbahya.

¹⁵Neryo litya olũhĩmbo molwahwa oko kiro kyʼamakũmĩ abiri nʼebitanu kyʼomukera wʼeElũlĩ, omo biro makũmĩ atanu nʼebibiri.

¹⁶Neryo omugulu esyonzĩgũ syetu syosĩ syowago, ebihanda byosĩ ebyatũtĩmbako mobyubaha, mobawa omo meso wabo; kusangwa mobalebya ngoko mũbĩrĩ oyũ akolawa na Nyamuhanga wetu.

¹⁷Kandi omo biro ebyo abakulu bʼAbayũda mobatuma esyobarua nyingi uku Tobĩa, nʼesyobarua sya Tobĩa mosyahĩka kubo.

¹⁸Kusangwa habya bangi eYũda abamũlahĩrĩraya, kusangwa abya ĩse-byala wa Sekanĩa mugala wa Ara; nʼomugala wuwe Yehohananĩ ĩnĩabĩrĩhĩkya mwali wa Mesũlamũ mugala wa Berekĩa.

¹⁹Nibya mobahula emĩbĩrĩ yiwe mibuya embere syage, nʼerĩmũtũlĩra ebĩnywa byage. Neryo Tobĩa mwatuma esyobarua syʼerĩnyũbahya.