Read nande Esĩterĩ 4 Bible Online

Esĩterĩ 4 - nande bible

Esĩterĩ 4

¹Neryo omugulu Mordekayĩ aminya ebyosĩ ebyakolawa, Mordekayĩ mwatulanga esyongimba siwe, mwambala emisarandwe nʼerĩyĩhĩrako erĩbũ, neryo mwaya omo katĩkatĩ kʼomũyĩ, mwalira nʼomulenge munene nʼekiriro kinene.

²Neryo mwahĩka embere wʼolũkyo lwʼOmwami; kusangwa isihali mundu wangatoka eriingira omo lũkyo lʼOmwami inianambite emisarandwe.

³Nʼomo buli kihugo eyo ekihano kyʼOmwami nʼerihamula liwe byahĩka, mohabya ekiriro kinene omo katĩkatĩ kʼAbayũda, nʼeritsira akalyo nʼerĩsekemũka nʼeririra; nʼabangi mobagotsera oko misarandwe nʼeriyihakako erĩbũ.

⁴Nʼabana-bato ba Esĩterĩ nʼabateya bʼenyũmba yiwe mobasa nʼerimubwirago; neryo omugole wʼOmwami mwagalwa kutsibu; neryo mwatuma esyongimba syʼerĩambalya Mordekayĩ nʼerĩmũlũsya kwʼemisarandwe yiwe; nĩkwa mwatalĩgasyo.

⁵Neryo Esĩterĩ mwabirikira Hatakĩ, omuguma wʼoko bateya bʼenyũmba yʼOmwami oyo ahĩra erimukolera, neryo mwamuhana eriya ahali Mordekayĩ, eriminya emyatsi eyĩ, nʼekikaleka nga nĩkĩ.

⁶Neryo Hatakĩ mwahuluka eriya ahali Mordekayĩ omo kibuga kigali kyʼomũyĩ, ekyabya embere wʼolũkyo lʼOmwami.

⁷Neryo Mordekayĩ mwamubwira ebyosĩ ebyamũhĩkako, nʼeriganza lyʼebĩtsĩpa ebyo Hamanĩ alaga eririha oko mbĩso yʼOmwami busana nʼerĩĩta Abayũda.

⁸Kandi mwamuha ekĩsosekanĩo kyʼamasako wʼekihamulo ekyo kyahĩrawa eSũsa busana nʼerĩherya Abayũda, akangayekyo Esĩterĩ, nʼerimubwira, nʼerimuhana agende eyiri omwami nʼerimulemba-lemba, nʼerĩmũbũlya busana nʼabandu ba Esĩterĩ.

⁹Neryo Hatakĩ mwasa mwabwira Esĩterĩ ebĩnywa bya Mordekayĩ.

¹⁰Neryo Esĩterĩ mwakanĩa haguma na Hatakĩ, mwamuha obukwenda busana na Mordekayĩ ati,

¹¹Abagombe bosĩ bʼomwami, nʼabandu bʼomo bihugo byʼOmwami, banasĩ, ngoko obuli mundu, omulume kutse omũkalĩ, oyo wasyahĩka eyiri omwami omo kibuga kyʼomwisi, ataliabirikirawa, hali mwatsi muguma busana naye, lye nʼerĩĩtwa, omwami amatindamusumbira omũtso wuwe wʼesyamagetsi, atoke eribyaho; nĩkwa ĩngye sinditabirikirwa eriya eyiri omwami oko biro ebĩ amakũmĩ asatu.

¹²Neryo mobabwira Mordekayĩ ebĩnywa bya Esĩterĩ.

¹³Neryo Mordekayĩ mwalayirabo eribwira Esĩterĩ ati, Sũganĩraye omo mutima wawe nga wasyabala omo nyũmba yʼOmwami, kwilaba Abayũda bosĩ.

¹⁴Kusangwa wamahuna oko mugulu oyũ, neryo eribala nʼerilama lyasyahulukira Abayũda lĩkalũa ehandi, nĩkwa uwe nʼekĩtũnga kya tata wawe basyahera; kandi nindi wasĩ nga sũlĩtahĩka oko bwami busana nʼomugulu oyũ kwehĩ?

¹⁵Neryo Esĩterĩ mwabwirabo ati, basũbũlĩrayego Mordekayĩ bati,

¹⁶Ugende, ũhĩndanaye Abayũda bosĩ abali eSũsa, mutsire akalyo busana nage, simulye kutse erĩpũlya oko biro bisatu omo musibo nʼomo kiro; nage nʼabana-bato bage tukanditsira akalyo tutya; neryo ko nasyaya nyitya eyiri omwami, erite ngʼemigambo; neryo namahola, inahola.

¹⁷Neryo Mordekayĩ mwayigendera mwakola ebyosĩ ebyo Esĩterĩ amuhana.