Read nande Esĩterĩ 5 Bible Online

Esĩterĩ 5 - nande bible

Esĩterĩ 5

¹Neryo oko kiro kyʼakasatu, Esĩterĩ mwambala esyongimba siwe syʼobwami, neryo mwahangana omo kibuga kyʼomwisi kyʼenyũmba yʼOmwami, ekiri embere wʼenyũmba yʼOmwami. Neryo omwami abya ĩnĩanĩkere oko kĩtũmbĩ kiwe kyʼobwami omo nyũmba yʼobwami ahahererenĩe nʼolũkyo lwʼenyũmba yʼOmwami.

²Neryo, omugulu omwami alangira Esĩterĩ omugole inianimene omo kibuga, neryo Esĩterĩ mwabana erĩsĩmwa omo meso wuwe; neryo omwami mwasumbira Esĩterĩ yʼomũtso wʼesyamagetsi owabya omo byala biwe. Neryo Esĩterĩ mwasegera hakũhĩ mwatũla oko busongera bʼomũtso.

³Neryo omwami mwamũbũlya ati, Uwe Esĩterĩ mugole wʼOmwami, Ukasondakĩ kwehĩ? Ũkabũlayakĩ kwehĩ? Wasyahabwakyo, nomo kyangabya luhande lʼobwami.

⁴Neryo Esĩterĩ mwabũga ati, Kyamabya kĩkatsemesya omwami, omwami na Hamanĩ base mũnabwĩre okwʼirya ĩnene eryo nabĩrĩmũkokoterya.

⁵Neryo omwami mwabũga ati, Mwangũhaye Hamanĩ, bikoleke ebyo Esĩterĩ akasonda. Neryo omwami na Hamanĩ mobasa okwʼirya ĩnene Esĩterĩ akokotaya.

⁶Neryo omugulu babya bakalũmba ebĩnyũ okwʼirya eryo, omwami mwabũlya Esĩterĩ, ati, Ũkabũlayakĩ-kwehĩ? Kusangwa ukandihabwakyo. Kandi erĩbũlya lyawe ni ryahi kwehĩ? Kandi nomo kyangabya ekihande kyʼobwami byasyakoleka.

⁷Neryo Esĩterĩ mwasũbĩrya, ati, Erisaba lyage nʼerĩbũlya lyage riti:

⁸Namabya nabiribana erĩsĩmwa omo meso wʼOmwami, kandi kyamatsemesya omwami erimba erisaba lyage, nʼerikola erĩbũlya lyage, omwami na Hamanĩ base okwʼirya eryo, nasyakokotya busana nabo, nʼomo ngyakya nasyakola ngoko omwami abĩrĩbũga.

⁹Neryo Hamanĩ mwahuluka ekiro ekyo nʼeritsema nʼeritsanga lyʼomutima; nĩkwa omugulu alangira Mordekayĩ omo lũkyo lʼOmwami isialihangana kutse erititimana busana naye, Hamanĩ mũsũla nʼerihitana busana na Mordekayĩ.

¹⁰Nĩkwa Hamanĩ mwayibombeka, mwaya ewuwe; neryo mwatuma eribirikira abĩra buwe na Zeresĩ mũkalĩwe.

¹¹Neryo Hamanĩ mwakanĩryabo obungi byʼebindu biwe, nʼobungi bwʼabana buwe, nʼemigulu mingi eyo mwami amũhamaya, kandi ngoko mwami amũhĩra embere mo mukulu kwilaba abakulu nʼabagombe mwami.

¹²Kandi Hamanĩ mwabũga ati, Ega, omugole wʼOmwami ye Esĩterĩ sĩalĩtalĩga ogundi mundu nʼomuguma eriingira haguma nʼomwami okwʼirya ĩnene eryo akokotaya, nina ngye musa; nʼomo ngyakya nibya abirimbirikira haguma nʼomwami.

¹³Nĩkwa ebyosĩ ebĩ sibyenyigasirakĩ, omugulu nyikinalangira Mordekayĩ, Omũyũda ĩnĩanĩkere omo lũkyo lʼOmwami.

¹⁴Neryo Zeresĩ mũkalĩwe nʼabĩra buwe bosĩ mobamubwira bati, Batsimbe omuti muli wʼerihanika omundu, owʼemetere makũmĩ abiri nʼeyĩnĩ, nʼomo ngyakya Ubwire omwami uti Mordekayĩ ahanikawe kugo; neryo wingire nʼobutseme haguma nʼomwami okwʼirya ĩnene. Nʼomwatsi oyo mwatsemesya Hamanĩ; neryo mwatsĩmbĩsya omuti oyo wʼerihanika omundu.