Read nande Esĩterĩ 8 Bible Online

Esĩterĩ 8 - nande bible

Esĩterĩ 8

¹Oko kiro ekyo omwami Ahasuero mwaha Esĩterĩ omugole wʼOmwami ebindu byosĩ bya Hamanĩ, enzĩgũ yʼAbayũda. Na Mordekayĩ mwahĩka embere syʼOmwami; kusangwa Esĩterĩ iniabirimubwira ngʼabyakĩ kiwe.

²Nʼomwami mwĩmya embũka yiwe, eyo alũsaya uku Hamanĩ mwahayo Mordekayĩ. Na Esĩterĩ mwayira Mordekayĩ mo mukulu wʼebindu byosĩ bya Hamanĩ.

³Kandi Esĩterĩ mwabũga embere syʼOmwami, mwawa ahisi oko bisando biwe, nʼerimulakira omo mĩsonĩa erĩlũsya omwaga wa Hamanĩ Omũagagĩ, nʼamenge wuwe ago ahimbika busana nʼAbayũda.

⁴Neryo omwami mwasumbira Esĩterĩ omũtso wʼesyamagetsi. Neryo Esĩterĩ mwahangana, mwimana embere syʼOmwami.

⁵Neryo mwabũga ati, Kyamatsemesya omwami kandi namabya nabiribana erĩsĩmwa omo meso wuwe, nʼomwatsi oyũ amatolera embere syʼOmwami, nage namowana omo meso wuwe, kisakawe eribindula esyobarua esyahimbikawa na Hamanĩ mugala wa Hamedata Omũagagĩ, esyo asaka erĩherya Abayũda omo bihugo byosĩ byʼOmwami,

⁶kusangwa nangatoka nyiti erisamalira ekibi ekĩkandĩsyahĩka oko bandu betu kwehĩ? Kutse nangatoka nyiti erisamalira erĩherĩbwa lyʼekihanda kyage kwehĩ?

⁷Neryo omwami Ahasuero mwabwira Esĩterĩ omugole wʼOmwami na Mordekayĩ Omũyũda, ati, Lebaya, nabiriha Esĩterĩ enyũmba ya Hamanĩ, naye babirimuhanika oko muti, kusangwa mwahĩra ebyala biwe oko Bayũda.

⁸Neryo musakire Abayũda ngoko mwanzĩre, omo lĩna lyʼOmwami, mũhĩre kwʼeyĩsembo yʼembũka yʼOmwami; kusangwa amasako awabirisakwa oko lĩna lyʼOmwami, nʼerĩhĩrwa kwʼeyĩsembo yʼembũka yʼOmwami, sihali mundu wangabindulago.

⁹Neryo abahandĩkĩ bʼomwami mobabirikirwa oko mugulu oyo, oko mukera wʼakasatu, oyo go mukera wa Sĩvanĩ, oko kiro kyʼamakũmĩ abiri nʼebisatu kyago; mobyasakwa ngʼebyosĩ Mordekayĩ ahana Abayũda nʼabakama, nʼabatabalĩ nʼabakulu bʼebihugo ebĩkatsũka eBũhĩndĩ nʼerĩhĩka eEtĩopĩa, ebihugo erĩgana nʼamakũmĩ abiri nʼebirinda, oko buli kihugo ngʼerisaka lyakyo, nʼoko buli kihanda ngʼomũbũge wakyo, nʼoko Bayũda ngʼamasako wabo, nʼomo mũbũge wabo.

¹⁰Neryo mwasaka omo lĩna lyʼOmwami Ahasuero, mwahĩra eyĩsembo kusyo omo mbũka yʼOmwami, kandi mwatuma esyobarua esyo oko bakwenda abakagenda oko syosabayĩrĩ, ibakagenda oko syonyama sikanguha esyabya sikakola omũbĩrĩ wʼOmwami, esĩbũtĩrwe oko syosabayĩrĩ syʼOmwami.

¹¹Ati omwami abĩrĩrĩgĩra Abayũda abali oko buli mũyĩ, bahĩndane haguma, nʼerilwira oko ngebe yabo, erĩherya nʼerĩĩta, nʼerĩtĩnda, emilondo yosĩ yʼabandu nʼekihugo abakandilwa nabo, haguma nʼabana babo, nʼabakalĩ, nʼerĩhũnga ebindu byabo mo binyegwa.

¹²Oko kiro kiguma omo bihugo byosĩ byʼOmwami Ahasuero, oko kiro kyʼerĩkũmĩ nʼebisatu kyʼomukera wʼerĩkũmĩ nʼeyĩbĩrĩ, oyo go mukera wa Adarĩ.

¹³Nʼekĩsosĩre amasako ayo, ekihano ekyo kihabawe obuli kihugo ngʼomugambo, mokyakangĩbwa oko bihanda byosĩ, Abayũda bayĩtegekanaye busana nʼekiro ekyo erĩyĩkĩsya busana nʼesyonzĩgũ syabo.

¹⁴Neryo abakwenda abo mobagenda oko syosabayĩrĩ esyangũhĩre esyabya sikakola omũbĩrĩ wʼOmwami, ibakagenda lũba nʼerĩhatĩkanĩbwa omo kihano kyʼOmwami; nʼekihano ekyo mokyakangĩbwa eSũsa omo kikali kyʼOmwami.

¹⁵Neryo Mordekayĩ mwalũa embere syʼOmwami iniambite esyongimba syʼobwami esyʼomũnĩkĩ nʼesyonyeru-nyeru, nʼembĩta nene yʼesyamagetsi, nʼekanzu yʼekĩtanĩ kyowene nʼomunyama. Nʼomũyĩ wʼeSũsa mobũta obogo nʼeritsanga.

¹⁶Abayũda mobabana ekyakakala nʼeritsanga nʼobutseme, nʼerĩsĩkya.

¹⁷Nʼomo buli kihugo, nʼomo buli mũyĩ, ehosĩ eyo ekihano kyʼOmwami nʼekihamulo kiwe byahĩka Abayũda mobabya omo kisiyi-siyi, nʼeritsanga nʼobutseme, nʼerirya ĩnene. Nʼabangi omo katĩkatĩ kʼebihanda byʼekihugo mobayiyira mo Bayũda; kusangwa eriubaha lyʼAbayũda molyawa kubo.