Read nande Esĩterĩ 9 Bible Online

Esĩterĩ 9 - nande bible

Esĩterĩ 9

¹Neryo oko mukera wʼerĩkũmĩ nʼeyĩbĩrĩ, oyo go mukera wa Adarĩ, oko kiro kyago kyʼerĩkũmĩ nʼebisatu, omugulu ekihano kyʼOmwami, nʼekihamulo kiwe byabya hakũhĩ nʼerĩberererĩbwa, oko kiro esyonzĩgũ syʼAbayũda syahĩra kwʼamaha eritabala kubo nĩkwa mokyabinduka mo kindi, Abayũda mobatabala ukwʼabo bakwabo ekĩnĩga.

²Abayũda mobayĩhĩndanĩa haguma omo mĩyĩ yabo, omo bihugo byosĩ byʼOmwami Ahasuero, erĩhĩra ebyala oko basonda erĩagalyabo; isihali mundu watoka erihangana embere syabo; kusangwa eriubahabo molyawa oko bandu bosĩ.

³Nʼabakulu bosĩ bʼebihugo, nʼabakama, nʼabatabalĩ, nʼabakola omũbĩrĩ wʼOmwami, mobawatĩkya Abayũda, kusangwa olubahwa lwa Mordekayĩ, lwabya ilwabiriwa kubo.

⁴Kusangwa Mordekayĩ abya mukulu omo nyũmba yʼOmwami, nʼengulu yiwe moyalaba omo bihugo byosĩ; kusangwa omundu oyo ye Mordekayĩ mwaswabya kandi mukulu kwʼaho.

⁵NʼAbayũda mobĩta esyonzĩgũ syabo erĩĩtabo omo mũyalĩ, nʼerikerabo nʼerĩheryabo, mobakola ebyo banzĩre ukwʼabo bakwabo obusu.

⁶NʼeSũsa enyũmba yʼobwami Abayũda mobĩta nʼerĩherya abandu magana atanu.

⁷Neryo mobĩta Parasanadata, na Dafonĩ, na Asĩpata,

⁸na Porata, na Adalĩa, na Arĩdata,

⁹na Paramasta, na Arĩsaĩ, na Arĩdaĩ, na Vaĩzata,

¹⁰abagala ĩkũmĩ ba Hamanĩ mugala wa Hamedata, enzĩgũ yʼAbayũda; nĩkwa mobatahĩra ebyala oko erĩhũnga ebindu.

¹¹Oko kiro ekyo emiganzo yʼabo abĩtawa eSũsa omũyĩ wʼobwami moyaletwa embere syʼOmwami.

¹²Nʼomwami mwabwira omugole Esĩterĩ, ati, Abayũda babĩrĩta nʼerĩherya bandu magana atanu eSũsa omũyĩ mukulu wʼobwami, kandi babĩrĩta abagala ĩkũmĩ ba Hamanĩ. Kandi bamatakolakĩ omo bindi bihugo byʼOmwami! Na lino Ukasabakĩ kwehĩ? Nawe wasyahabwakyo. Kutse erĩbũlya lyawe ni ryahi kandi kwehĩ? Nalyo likandikoleka.

¹³Neryo Esĩterĩ mwabũga ati, Kyamatsemesya omwami, Abayũda abali eSũsa bahamulawe erikola omo ngyakya ngʼekihamulo kya mũnabwĩre, nʼabagala ĩkũmĩ ba Hamanĩ bahanikawe oko miti.

¹⁴Nʼomwami mwahana ati kikolawe kitya; nʼekihamulo mokyakangĩbwa eSũsa; neryo mobahanika abagala ĩkũmĩ ba Hamanĩ.

¹⁵NʼAbayũda ababya eSũsa mobayĩhĩndanĩa haguma oko kiro kyʼerĩkũmĩ nʼebini kyʼomukera wa Adarĩ, mobĩta bandu amagana asatu eSũsa, nĩkwa mobatahũnga kindu.

¹⁶Nʼabandi Bayũda ababya omo bihugo byʼOmwami mobayĩhĩndanĩa haguma, erilwira engebe yabo, mobabana erĩyĩlũsya oko syonzĩgũ syabo, mobĩta elfu makũmĩ alinda nʼĩtanu (75,000) abakwabo obusu; nĩkwa mobatahũnga ebindu byabo.

¹⁷Ekĩ mokyakolwa oko kiro kyʼerĩkũmĩ nʼebisatu kyʼomukera wa Adarĩ; nʼoko kiro kyʼerĩkũmĩ nʼebini kyago mobaluhuka, mobayirakyo mo kiro kikulu kyʼerirya nʼobutseme.

¹⁸Nĩkwa Abayũda ababya eSũsa mobahĩndana haguma oko kiro kyʼerĩkũmĩ nʼebisatu kyago nʼoko kiro kyʼerĩkũmĩ nʼebini kyago; nʼoko kiro kyʼerĩkũmĩ nʼebitanu kyago mobaluhuka mobayirakyo mo kiro kikulu kyʼerirya nʼobutseme.

¹⁹Busana nʼekyo Abayũda bʼemĩyĩ, abĩkere omo mĩyĩ ite kwʼekikunda, bakayira ekiro kyʼerĩkũmĩ nʼebini kyʼomukera wa Adarĩ mo kiro kyʼobutseme, ekiro kikulu kyʼerirya nʼeritumirana ebihembo.

²⁰Neryo Mordekayĩ mwasaka emyatsi eyĩ, mwatuma esyobarua oko Bayũda bosĩ ababya omo bihugo byosĩ byʼOmwami Ahasuero, abʼehakũhĩ nʼabʼehali,

²¹erihanabo bategaye ekiro kyʼerĩkũmĩ nʼebini kyʼomukera wa Adarĩ, nʼekiro kyʼerĩkũmĩ nʼebitanu kyago, oko buli mwaka.

²²Kusangwa oko biro ebyo Abayũda mobahumula nʼerilama busana nʼesyonzĩgũ syabo, nʼomukera oyo abindulawa busana nabo erĩlũa oko bũlĩge nʼeribana obutseme, nʼerĩlũa oko kiriro nʼeriluhuka. Bayire ebiro ebyo mo biro bikulu byʼeritsema, nʼeritumirana ebihembo, nʼeriha ebihembo oko bera.

²³Litya Abayũda mobakola ngoko batsũka erikola, kandi ngoko Mordekayĩ asakirabo.

²⁴Kusangwa Hamanĩ mugala wa Hamedata Omũagagĩ, enzĩgũ yʼAbayũda bosĩ, abya ĩnĩabĩrĩtwĩra Abayũda bʼamenge wʼerĩheryabo, kandi iniabirigusa Pũrĩ, ka kawira, erĩendereryabo nʼerĩheryabo.

²⁵Nĩkwa omugulu omwatsi ahĩka embere syʼOmwami omwami mwahana omo syobarua, ati, Embĩta nyibi ya Hamanĩ eyo ahimbika busana nʼAbayũda, isube oko mutwe wuwe ĩyowene, kandi iye nʼabagala buwe bahanikawe oko miti.

²⁶Kyo kyaleka ibahula ebiro ebĩ mo Pũrĩmũ, ngʼerĩna lya Pũrĩ (akawira). Neryo busana nʼebĩnywa byosĩ byʼebarua eyĩ, na busana nʼebyo balangira busana nʼomwatsi oyũ, nʼemyatsi eyo yahĩka kubo.

²⁷Abayũda mobahanganĩa emitsye busana nabo, kandi busana nʼabana babo, na busana nʼabosĩ bayĩhĩra haguma nabo, bati siyibulirane, eriyira ebiro bibiri ebĩ mo biro bikulu ngʼerisaka lyabyo, kandi ngʼomugulu owahamulawa wabyo, obuli mwaka.

²⁸Kandi bati, ebiro ebĩ bibukawe nʼeriyirwa mo bikulu busana nʼesyondengo syosĩ nʼobuli kĩtũnga, nʼobuli kihugo, nʼobuli mũyĩ; bati, Ebiro ebĩ bya Pũrĩmũ sibibulirane omo katĩkatĩ kʼAbayũda, kandi eryibukabyo sirihwe omo katĩkatĩ kʼabana babo.

²⁹Neryo omugole Esĩterĩ, mwali wa Abĩhaĩlĩ, nʼOmũyũda Mordekayĩ, mobasaka nʼehamũlĩ yosĩ erĩsĩkya ebarua eyĩ yʼakabiri ya Pũrĩmũ.

³⁰Neryo Mordekayĩ mwatumira Abayũda bosĩ bʼesyobarua, oko bihugo erĩgana nʼamakũmĩ abiri nʼebirinda byʼobwami bwa Ahasuero, omo bĩnywa byʼobuholo nʼekwenene.

³¹Ati ebiro ebĩ bya Pũrĩmũ bihangane oko migulu yabyo ebyahamulawa, ngoko Mũyũda Mordekayĩ nʼomugole Esĩterĩ wʼOmwami bahanabo, kandi ngoko bahamula busana nabo na busana nʼabana babo, omo myatsi yʼeritsira kalyo nʼekiriro kyabo.

³²Neryo ekihano kya Esĩterĩ mokyasĩkya emitsye eyĩ ya Pũrĩmũ; mobyasakwa omo kitabu.