Read nande Erĩlũayo 11 Bible Online

Erĩlũayo 11 - nande bible

Erĩlũayo 11

¹Neryo Omwami Mukulu mwabũga na Musa ati, Hakĩsĩya kĩhũnze kiguma nasyaletakyo uku Farao, nʼoko Banya Mĩsĩrĩ; enyũma wʼaho asyaleka imwahongoka; omugulu asyaleka imwagenda, asyababinga eribahiga-hĩganĩa.

²Lino ũbũgĩre omo matwĩ wʼabandu, obuli mulume asabe mũlĩkyabo, nʼobuli mũkalĩ asabe mũlĩkyabo ebindu byʼebĩtsĩpa, nʼebindu byʼesyamagetsi.

³Neryo Omwami Mukulu mwaha abandu erianzwa omo meso wʼAbanya Mĩsĩrĩ. Kandi omundu oyo ye Musa abya mukulu omo kihugo kyʼeMĩsĩrĩ, nʼomo meso wʼabagombe ba Farao, nʼomo meso wʼabandu.

⁴Neryo Musa mwabũga ati, Omwami Mukulu akabũga ati, Omo katĩ-kanene kʼekiro nasyalendera omo Mĩsĩrĩ.

⁵Nʼehimbere hyosĩ hyʼomo kihugo kyʼeMĩsĩrĩ hyasyahola, erĩtsũka oko kambere ka Farao oyo wĩkere oko kĩtũmbĩ kiwe kyʼobwami, erĩhĩka oko kanyere kʼomũkalĩ mukobe oyuli enyũma wʼoluso nʼehimbere hyosĩ hyʼesyonyama syʼeka nibya.

⁶Nʼekiriro kinene kyasyabya omo kihugo kyosĩ kyʼeMĩsĩrĩ, ekite kyatabya erĩmbere, kutse sikyendisyaswabya kandi.

⁷Nĩkwa oko bana ba Ĩsraelĩ sihendisyabya embwa nʼenguma eyasyasembera omundu eyĩkandĩsyahũlũkya olulimi lwayo, oko mundu kutse oko nyama; imwatoka eriminya ngoko Mwami Mukulu abĩrĩhĩra erisombola omo katĩkatĩ kʼAbanya Mĩsĩrĩ nʼAbaĩsraelĩ.

⁸Nʼabagombe bawe bosĩ aba basyanyandagalirako, kandi basyũnama embere wage, ĩbabũga bati, Mugende, uwe, nʼabandu bosĩ abakakukwama; nʼenyũma wʼaho nasyalũaho. Neryo mwalũa embere wa Farao nʼerihitana lĩnene.

⁹Neryo Omwami Mukulu mwabũga na Musa ati, Farao sĩendĩsyabowa; ebyʼeriswekera byage bitoke erĩkanĩbwa omo kihugo kyʼeMĩsĩrĩ.

¹⁰Neryo Musa na Harũnĩ mobakola ebyʼeriswekera byosĩ ebĩ embere sya Farao; neryo Omwami Mukulu mwakalya omutima wa Farao, mwataleka abana ba Ĩsraelĩ erĩlũa omo kihugo kiwe.