Read nande Erĩlũayo 12 Bible Online

Erĩlũayo 12 - nande bible

Erĩlũayo 12

¹Omwami Mukulu mwabwira Musa na Harũnĩ omo kihugo kyʼeMĩsĩrĩ ati,

²Omukera ono asyabya nzũko yʼemikera busana nenyũ; asyabya mukera wʼerĩtsũka lyʼomwaka busana nenyũ.

³Mũbũge nʼendeko yosĩ ya Ĩsraelĩ muti, Oko kiro kyʼerĩkũmĩ oko mukera ono, obuli mundu asyayitwalira ekyana kyʼembũlĩ, ngʼenyũmba yʼabotata wabo, ekyana kyʼembũlĩ oko buli nyũmba;

⁴neryo ekĩtũnga kyamabya kike busana nʼekyana kyʼembũlĩ, neryo iye na mũlĩkyabo oyuli hakũhĩ nʼenyũmba yiwe, basyĩmya enguma ngʼeriganza lyʼabandu; ngʼerirya lyʼobuli mundu mwasyanganzirwa ekyana kyʼembũlĩ.

⁵Ekyana kyenyũ kyʼembũlĩ kyasyabya butsira bulema, embangale eyʼomwaka muguma; mwasyĩmyayo omo mbũlĩ kutse omo syombenehene;

⁶Mwasyateyalyo erĩhĩka oko kiro kyʼerĩkũmĩ nʼebini oko mukera oyo musa; nʼerĩhĩndana lyosĩ ryʼendeko ya Ĩsraelĩ basyĩtayo omwʼĩgolo-golo.

⁷Basyĩmya oko musasi, nʼerĩhĩrago oko nzeguliro ĩbĩrĩ syʼolũyĩ, nʼoko kisayi kyʼendata, oko manyũmba ago mukalira yomo.

⁸Basyalya esĩswĩ esyo ekiro ekyo, esyokĩrye omo muliro, nʼobundu bute mo kĩhamya; basyalyayo haguma nʼesyonyenyĩ esĩkalĩhĩre.

⁹Isimwasirya mo mbisi, kutse esĩhũkĩre omo magetsi, nĩkwa esyokĩrye omo muliro; omutwe wayo haguma nga byayo na haguma nʼebyʼomo nda byayo.

¹⁰Kandi sĩmũsyesĩganaya kuyo erĩhĩka omo ngyakya; nĩkwa eyikasaka kuyo erĩhĩka omo ngyakya mwasyahĩsyayo omo muliro.

¹¹Ko mukandisyalyayo mutya; ĩmũnabohĩre esyombindi syenyũ, nʼesyongeta oko bisando byenyũ, nʼemyũtso omo byala byenyũ; mwasyalyayo lũba-lũba; niʼKiruka lyʼOmwami Mukulu.

¹²Kusangwa nasyalaba omo kihugo kyʼeMĩsĩrĩ omo kiro ekyo, nasyaswĩrya otumbere tosĩ omo kihugo kyʼeMĩsĩrĩ, abandu nʼesyonyama; nage nasyatswera esyonyamuhanga syosĩ syʼeMĩsĩrĩ; ĩngye indi Mwami Mukulu.

¹³Nʼomusasi asyabya kiminyikalo ũkwʼĩnywe oko manyũmba aho muli; neryo omugulu nasyalangira omusasi, nasyabakiruka, isihali ekĩhũnzo kyasyabahĩkako erĩbaherya, omugulu ngaswĩraya ekihugo kyʼeMĩsĩrĩ.

¹⁴Kandi ekiro ekĩ kyasyabya kikibukwa busana nenyũ, mwasyayirakyo mo kiro kikulu busana nʼOmwami Mukulu; omo syondengo syenyũ mwasyayirakyo mo kiro kikulu omo kilayiro kera na kera.

¹⁵Ebiro birinda mwasyalya obundu bute mo kĩhamya; nʼekiro kyʼerĩtsũka mwasyalũsya ekĩhamya kyʼomo manyũmba wenyũ; kusangwa omundu oyo wasyalya obundu buli mwʼekĩhamya oko kiro kyʼerĩtsũka erĩhĩka ekiro kyʼebirinda, omundu oyo asyagabulwa oko Ĩsraelĩ.

¹⁶Nʼoko kiro kyʼerĩtsũka basyabya erĩhĩndana lĩbũyĩrĩre busana nenyũ, nʼoko kiro kyʼebirinda erindi erĩhĩndana lĩbũyĩrĩre; sihali muhanda wʼomũbĩrĩ asyakolwa mubyo lye nʼerĩkokotya ebyalya obuli mundu atolere, ekyo kisa mwasyakola.

¹⁷Nenyũ mwasyateya ekiro kikulu kyʼobundu obute mo kĩhamya kusangwa omo kiro ekyo kisa-kisa monalũsya emilondo yenyũ erĩlũa omo kihugo kyʼeMĩsĩrĩ; busana nʼekyo mwasyateya ekiro ekĩ oko syondengo syenyũ syosĩ mo kilayiro kya kera na kera.

¹⁸Oko mukera wʼerĩtsũka, oko kiro kyʼerĩkũmĩ nʼebini kyʼomukera omwʼĩgolo-golo, mwasyalya obundu obute mo kĩhamya, erĩhĩka oko kiro kyʼamakũmĩ abiri nʼekiguma kyʼomukera omwʼigolo-golo.

¹⁹Oko biro birinda sihasyebanika ekĩhamya omo manyũmba wenyũ; kusangwa oyo wasyalya ekiri mwʼekĩhamya, omundu oyo asyagabulwa hali oko ndeko ya Ĩsraelĩ, amabya nga kutse mbutirwa yʼomo kihugo.

²⁰Simusyerya kindu nʼekiguma ekiri mwʼekĩhamya; omo manyũmba wenyũ gosĩ mwasyalya obundu butsira kĩhamya.

²¹Neryo Musa mwabirikira abakulu bosĩ ba Ĩsraelĩ, mwabwirabo ati, Mugende, mũyĩmĩraye ebyana byʼesyombũlĩ ngʼebĩtũnga byenyũ ko biri, mwĩtebyo busana nʼErikiruka.

²²Neryo mwasyĩmya emitahi yʼehĩsopo, mũhĩreyo omo musasi owali omwʼĩtũba, nʼerĩhĩrago oko kisayi nʼoko syonzeguliro ĩbĩrĩ; isihabya mundu omo katĩkatĩ kenyũ oyukahuluka omo lũkyo lwʼenyũmba yiwe erĩhĩka omo ngyakya-ngyakya.

²³Kusangwa Omwami Mukulu asyalaba erĩswĩrya Abanya Mĩsĩrĩ; nʼomugulu asyalangira omusasi oko kisayi nʼoko nzeguliro ĩbĩrĩ syʼolũyĩ, Omwami Mukulu asyakiruka Olũyĩ, siendĩsyalĩga oyũkaheraya eriingira omo manyũmba wenyũ erĩbaswĩrya.

²⁴Nenyũ mwasyateya omwatsi oyũ mo kilayiro busana nenyũ nʼabagala benyũ kera na kera.

²⁵Neryo kyasyabya omugulu mwasyahĩka oko kihugo ekyo Mwami Mukulu asyabaha, ngoko abiribalaga, mwasyateya omwatsi oyũ.

²⁶Neryo enyũma wʼaho omugulu abana benyũ basyababũlya bati, Omwatsi ogo mukakola akakanganayakĩ kwehĩ?

²⁷Neryo mwasyabũga muti, Ni buhere bwʼerikiruka lyʼOmwami Mukulu, oyo wakiruka amanyũmba wʼabana ba Ĩsraelĩ eMĩsĩrĩ, omugulu aswĩraya Abanya Mĩsĩrĩ, nĩkwa mwabalya amanyũmba wetu. Neryo abandu mobũnamĩrya emitwe yʼahisi mobaramya.

²⁸Nʼabana ba Ĩsraelĩ mobagenda mobakola batya; ngoko Mwami Mukulu ahana Musa na Harũnĩ, mobakola batya.

²⁹Nʼenyũma wʼaho omo katĩ-kanene kʼekiro Omwami Mukulu mwaswĩrya otumbere tosĩ omo kihugo kyʼeMĩsĩrĩ, erĩtsũka oko kambere ka Farao oyo wĩkere oko kĩtũmbĩ kiwe kyʼobwami erĩhĩka oko kambere kʼomunyegwa oyo wabya omo kyũna kyʼomũlĩkĩ; nʼotumbere tosĩ twʼesyonyama syʼeka.

³⁰Neryo Farao mwahangana omo kiro, iye, nʼabagombe buwe bosĩ, nʼAbanya Mĩsĩrĩ, bosĩ; kandi mohabya ekiriro kinene eMĩsĩrĩ; kusangwa mohatabya nyũmba eyite mo kĩnda.

³¹Neryo mwabirikira Musa na Harũnĩ omo kiro, mwabũga ati, Muhangane, mũlũe omo bandu bage, Ĩnywe nʼabana ba Ĩsraelĩ; mugende mukolere Omwami Mukulu, ngoko mwabĩrĩbũga.

³²Mutwale ebĩhyo byenyũ, nʼebihangulo byenyũ, ngoko mwabĩrĩbũga, mugende; munyitsumule nibya.

³³NʼAbanya Mĩsĩrĩ mobahiga-hĩganĩa abandu erĩlũsyabo omo kihugo mo lũba-lũba; kusangwa babũga bati, ĩtwe bosĩ tuli baholĩ.

³⁴Neryo abandu mobĩmya ebyanga byabo byʼamandu ebitabya mwʼekĩhamya, amatũba wʼeritsumbiramo, iniasengere omo ngimba syabo oko bitigo byabo.

³⁵Nʼabana ba Ĩsraelĩ mobakola ngʼekĩnywa kya Musa; mobasaba Abanya Mĩsĩrĩ bʼebindu byʼesyʼebĩtsĩpa, nʼebindu byʼesyamagetsi, nʼesyongimba;

³⁶nʼOmwami Mukulu mwaha abana ba Ĩsraelĩ erĩsĩmwa omo meso wʼAbanya Mĩsĩrĩ, kyaleka ibahabo ebyo babũlaya. Mobanyega Abanya Mĩsĩrĩ bʼebindu.

³⁷Neryo abana ba Ĩsraelĩ mobahongoka erĩlũa eRamĩsesĩ erĩhĩka eSũkotĩ, mobagenda omo bisando, abalume elfu magana ndatu (600,000), abana bateko,

³⁸Nʼendeko nene mobatũlũngana mubo erihetuka haguma nabo nibya; nʼebihangulo bingi kũndũ.

³⁹Neryo mobokya obundu mo kyanga obute mwʼekĩhamya obo balũsaya eMĩsĩrĩ; kusangwa bwabya butsira kĩhamya, kusangwa bahigawa erĩlũa eMĩsĩrĩ, mobatatoka eririnda, kandi mobatayĩkokoterya endanda.

⁴⁰Neryo emigulu abana ba Ĩsraelĩ bĩkala eMĩsĩrĩ moyabya myaka magana ani nʼamakũmĩ asatu (430).

⁴¹Nʼenyũma wʼaho oko ndũlĩ yʼemyaka magana ani nʼamakũmĩ asatu (430), oko kiro ekyo kisa-kisa, emilondo yosĩ yʼOmwami Mukulu moyalũa omo kihugo kyʼeMĩsĩrĩ.

⁴²Ni kiro kyʼerĩteyĩbwa kutsibu busana nʼOmwami Mukulu busana nʼerĩlũsyabo omo kihugo kyʼeMĩsĩrĩ; ekĩ ni kiro kyʼOmwami Mukulu, erĩteyĩbwa kutsibu nʼabana ba Ĩsraelĩ omo ndengo syabo.

⁴³Neryo Omwami Mukulu mwabũga na Musa na Harũnĩ ati, Ekĩ ni kilayiro kyʼErikiruka; omũlũa-hali isyalya kulyo;

⁴⁴nĩkwa omukobe wʼobuli mundu oyo wagulawa oko bĩtsĩpa, wamabĩmũbanĩa, neryo inialya kulyo.

⁴⁵Omubunga kutse omugombe mũhĩngĩ sibendisyalya kulyo.

⁴⁶Lyasyalirwa omo nyũmba nguma; sĩmwendĩsyahũlũkĩrya eyĩswĩ yʼeyĩhya wʼenyũmba; kandi sĩmwendĩsyabũna erĩkũha lyayo nʼeriguma.

⁴⁷Neryo endeko ya Ĩsraelĩ yasyalya Erikiruka erĩ.

⁴⁸Nʼomugulu owʼehandi asyakubungira, naye amasonda erĩteya Erikiruka busana nʼOmwami Mukulu, abalume buwe bosĩ babanĩbawe, neryo ase hakũhĩ erirya kulyo; naye inialingene nʼoyo wabutawa omo kihugo; nĩkwa sihali oyutabwene wasyalya kulyo.

⁴⁹Ekihano ni kiguma ekyasyabya oko yukabutawa eka wenyũ, nʼoko mũlũa-hali oyukababungira.

⁵⁰Abana ba Ĩsraelĩ bosĩ mobakola batya ngoko Mwami Mukulu ahana Musa na Harũnĩ, mobakola batya.

⁵¹Neryo oko kiro ekyo kisa-kisa, Omwami Mukulu mwalũsya abana ba Ĩsraelĩ omo kihugo kyʼeMĩsĩrĩ omo milondo yabo.