Read nande Erĩlũayo 13 Bible Online

Erĩlũayo 13 - nande bible

Erĩlũayo 13

¹Neryo Omwami Mukulu mwabũga na Musa ati,

²Unyihigulire otumbere tosĩ, obuli mwana wʼerĩmbere omo katĩkatĩ kʼabagala ba Ĩsraelĩ, oko bandu nʼoko syonyama nibya; ebyo ni byage.

³Neryo Musa mwabũga nʼabandu ati, Mwibuke ekiro ekyo mwalũamo eMĩsĩrĩ, erĩlũa omo nyũmba yʼobukobe; kusangwa omo byala byʼamaka Omwami Mukulu mwabalũsya hano; kandi obundu obuli mwʼekĩhamya sibwendisyalibwa.

⁴Mũnabwĩre mukahongoka oko mukera wa Abĩbũ.

⁵Neryo, omugulu Omwami Mukulu asyabakolya omo kihugo kyʼOmukanana, nʼOmũhĩtĩ, nʼOmũamorĩ nʼOmũhĩvĩ, nʼOmũyebũsĩ, ekyo alahĩraya abotata wawe eribaha, ekihugo ekikasenda mwʼamasabũ nʼobuki, mwasyateya omwatsi oyũ omo mukera oyũ.

⁶Ebiro birinda mwasyalya obundu obute mwʼekĩhamya, nʼoko kiro kyʼebirinda kyasyabya kiro kikulu busana nʼOmwami Mukulu.

⁷Obundu obute mwʼekĩhamya bwasyalibwa ebiro birinda byosĩ, neryo obundu obuli mwʼekĩhamya isibwakubanikako oko mitano yawe yosĩ.

⁸Nawe wasyabwira mugala wawe ekiro ekyo, uti, Ni busana nʼekyo Mwami Mukulu angolera omugulu nalũa eMĩsĩrĩ.

⁹Nakyo kyasyabya kiminyikalo ukʼuwe omo byala byawe, na busana nʼeryibuka omo katĩkatĩ kʼameso wawe, emigambo yʼOmwami Mukulu ibye omo buno bwawe; kusangwa omo byala byʼamaka Omwami Mukulu mwakũlũsya eMĩsĩrĩ.

¹⁰Busana nʼekyo wasyateya ekilayiro ekĩ oko mugulu wakyo obuli mwaka.

¹¹Neryo kyasyabya omugulu Omwami Mukulu asyakuleta omo kihugo kyʼOmunya Kanana, ngoko akũlahĩraya nʼabotata wawe, nʼerikuhakyo.

¹²Wasyahigulira Omwami Mukulu yʼebyosĩ ebĩkatsũka eributwa, nʼobuli tunyere twʼesyonyama esyo uli nasyo; esyʼobulume syasyabya syʼOmwami Mukulu.

¹³Nʼobuli kambere kʼepunda wasyatongolyako nʼekyana kyʼembũlĩ; neryo wamatĩndatongolyako, wasyanyola ebĩkya byako; nʼehimbere hyosĩ hyʼabandu omo katĩkatĩ kʼabagala bawe wasyatongolyahyo.

¹⁴Neryo omugulu mugala wawe asyakũbũlya oko mugulu owakandisyasa ati, Ekĩ nĩkĩ kwehĩ? Wasyamubwira uti, Omo byala byʼamaka Omwami Mukulu mwatũlũsya eMĩsĩrĩ, erĩlũa omo nyũmba yʼobukobe.

¹⁵Nʼenyũma wʼaho omugulu Farao akala, erituganira erigenda, Omwami Mukulu mwĩta otumbere tosĩ omo kihugo kyʼeMĩsĩrĩ, otumbere twʼabandu, nʼehimbere hyʼesyonyama. Kikaleka inaherera Omwami Mukulu ebyosĩ ebĩkatsũka eributwa, kyamabya kyʼobulume; nĩkwa otumbere tosĩ twʼabagala bage ngatongolayato.

¹⁶Neryo ekyo kyasyabya kiminyikalo oko byala byawe, nʼekyambalo omo katĩkatĩ kʼameso wawe; kusangwa Omwami Mukulu mwatũlũsya eMĩsĩrĩ omo byʼamaka.

¹⁷Nʼenyũma wʼaho omugulu Farao ahamula bandu erigenda, Nyamuhanga mwatasondolabo omo nzira yʼekihugo kyʼAbafĩlĩstĩnĩ, nʼomo hanabya hakũhĩ; kusangwa Nyamuhanga abũga ati, abandu bakasyayĩkũbya bomo omugulu basyalangira amalwa, ibasuba eMĩsĩrĩ;

¹⁸nĩkwa Nyamuhanga mwayatĩmbya abandu bʼomo nzira yʼembwarara hakũhĩ nʼEngetsi yʼEngula; nʼabana ba Ĩsraelĩ mobahongoka erĩlũa omo kihugo kyʼeMĩsĩrĩ ibanambite ebyʼamalwa.

¹⁹Kandi Musa mwatwala amakũha wa Yosefũ haguma naye; kusangwa abya iniabirisema abana ba Ĩsraelĩ ati, Nyamuhanga asyabalũngũlĩra kwenene; nenyũ mwasyaheka amakũha wage erĩlũa eno haguma nenyũ.

²⁰Neryo mobahongoka erĩlũa eSũkotĩ mobalalirira eEtamũ, oko mũsĩke wʼembwarara.

²¹Neryo Omwami Mukulu mwasondolabo omo musibo omo ndũyĩ yʼekĩtũ, erisondolabo omo nzira, nʼomo kiro omo ndũyĩ yʼomuliro, erĩkoleryabo; ibatoka erigenda omo musibo nʼomo kiro;

²²endũyĩ yʼekĩtũ omo musibo, nʼendũyĩ yʼomuliro omo kiro, ĩsĩsĩrĩlũa embere syʼabandu.