Read nande Erĩlũayo 15 Bible Online

Erĩlũayo 15 - nande bible

Erĩlũayo 15

¹Neryo Musa nʼabana ba Ĩsraelĩ mobimbira Omwami Mukulu yʼolwimbo olũ, bati, Ngandyimbira Omwami Mukulu, kusangwa abĩrĩkĩnda omo lukengerwa; Esabayĩrĩ nʼoyuli kuyo abirigusabo omo ngetsi.

²Omwami Mukulu ni maka wage nʼolwimbo lwage, Abiribya mulamo wage; Oyũ ni Nyamuhanga wage, nage ngandimupipa; Nyamuhanga wa tata wage, ngandĩmũhamya.

³Omwami Mukulu ni mundu wʼamalwa; Omwami Mukulu lyo lĩna liwe.

⁴Esyogalĩ sya Farao nʼomulondo wuwe abirigusabyo omo ngetsi; Nʼesyombangĩ esyayisogawa siwe babirisenda omo Ngetsi yʼEngula.

⁵Emitobero yakũnĩngĩrebo; Babiritogera omo mitobero ngʼerĩbwe.

⁶Ebyala byawe byʼamali, uwe Mwami Mukulu, Ni byʼolukengerwa nʼobũtokĩ. Ebyala byawe byʼamali, uwe Mwami Mukulu, Byabĩrĩbũnanga enzĩgũ mo bitswe-bitswe.

⁷Omo bukulu bwʼobusinge bwawe ũkakĩnda abakahangana nawe omo malwa; Ukahũlũkaya erihitana lyawe; nalyo lĩkahĩsayabo ngʼomusunga.

⁸Nʼomo muka wʼemihuli yawe amagetsi mwalundwa, Nʼebisunda mobyimana ngʼekilundo; Emitobero moyabohana omo kũlĩmũ kwʼengetsi.

⁹Enzĩgũ moyabũga iti, Ngandikwamirira, ngandĩmweya, ngandigaba ebinyegwa; Erisonda lyage lyasyũgũtĩbwa busana nabo; Ngandikula omũyalĩ wage, Ebyala byage byasyaheryabo.

¹⁰Mowabuhirira omwʼihunga lyawe, Nʼengetsi moyakũnĩngĩrabo; Mobatobera ngʼerĩsasĩ omo magetsi manene.

¹¹Uwe Mwami Mukulu, nindi yuli nga we, Omo katĩkatĩ kʼesyonyamuhanga kwehĩ? Nindi yuli nga we owʼolukengerwa nʼomũbũyĩrĩre kwehĩ? Owʼeriubahwa omwʼipipa, erikola ebyʼeriswekera?

¹²Mowasumba ebyala byawe byʼamali, Ekitaka mokyamerabo.

¹³Omo bubuya bwawe bʼolwanzo mowasondola abandu abo watongolaya; Mowasondolabo omo maka wawe oko habũyĩrĩre hʼerĩĩkala lyawe.

¹⁴Ebihanda byʼabandu mobyowa, neryo bakatitimana; Amagalĩ abirihamba esyondũlanĩ syʼeFĩlĩstĩnĩ.

¹⁵Neryo abakama bʼeEdomũ mobasweka; Abandu bʼamaka bʼeMoabũ, erititimana likahambabo; Nʼesyondũlanĩ syosĩ syʼeKanana mosyahwerekerera.

¹⁶Obuba nʼeriubaha byabirihambabo; Busana nʼobukulu bʼokuboko kwawe bali bũkũtũ ngʼerĩbwe; Erĩhĩka oko mugulu abandu bawe bamabisoka, uwe Mwami Mukulu, Erĩhĩka omugulu abandu abo wagula bamabisoka.

¹⁷Wasyĩngĩryabo, nʼerihandabo omo kitwa kyʼomwandu wawe, Aho, uwe Mwami Mukulu, ho wabiriyiyirira mo hʼerĩĩkala lyawe. Aho habũyĩrĩre, uwe Mwami Mukulu, aho ebyala byawe byabĩrĩhanganĩa.

¹⁸Omwami Mukulu asyatabala kera na kera.

¹⁹Kusangwa esyosabayĩrĩ sya Farao mosyingira omo ngetsi haguma nʼesyogalĩ siwe nʼabandu buwe ababya oko syosabayĩrĩ, nʼOmwami Mukulu mwasũbya magetsi wʼengetsi wʼendata kubo kandi; nĩkwa abana ba Ĩsraelĩ mobagendera oko kitaka kyũmĩre omo katĩkatĩ kʼengetsi.

²⁰Na Mĩrĩamũ omũmĩnyererĩ wʼobũkalĩ, mwali wabo Harũnĩ, mwĩmya erĩsengo omo byala biwe; nʼabakalĩ bosĩ mobamukwama nʼamasengo nʼamasata.

²¹Mĩrĩamũ mwasũbĩryabo ati, Mwimbire Omwami Mukulu, kusangwa abĩrĩkĩnda nʼolukengerwa; Esabayĩrĩ nʼoyuli kuyo abirigusabo omo ngetsi.

²²Neryo Musa mwasondola Abaĩsraelĩ embere erĩlũa omo Ngetsi yʼEngula, mobalũayo mobahĩka omo mbwarara yʼeSũrĩ; mobagenda olugendo lwʼebiro bisatu omo mbwarara isibetabana magetsi.

²³Nʼomugulu bahĩka eMara mobatatoka erĩpũlya magetsi wʼeMara, kusangwa abya akalĩhĩre; kyaleka erĩna lyago iryahulwa mo Mara.

²⁴Neryo abandu mobatonga Musa bati, Twasyapũlyakĩ kwehĩ?

²⁵Neryo Musa mwalakira Omwami Mukulu; nʼOmwami Mukulu mwamũkangya omuti, naye mwagusago omo magetsi, nʼamagetsi mwasiha. Nʼeyo mwahabo omugambo nʼekilayiro, kandi eyo mwalenga kubo.

²⁶Neryo mwabwirabo ati, Mwamahulikirira omulenge wʼOmwami Mukulu Nyamuhanga wenyũ nʼomũhwa, kandi mwamakola ekitunganene omo meso wuwe, nʼeritega amatwĩ oko bihano biwe, nʼeribika emigambo yiwe yosĩ, sindiendĩsyabahĩra kwʼesyondwala nʼenguma, esyo nahĩra oko Banya Mĩsĩrĩ; kusangwa indi Mwami Mukulu oyũkakũlamaya.

²⁷Neryo mobahĩka eElĩmũ, ahabya esĩsoko erĩkũmĩ nʼesĩbĩrĩ, nʼamabondo makũmĩ alinda; mobalaliriraho hakũhĩ nʼamagetsi.