Read nande Erĩlũayo 16 Bible Online

Erĩlũayo 16 - nande bible

Erĩlũayo 16

¹Neryo mobahongoka erĩlũa eElĩmũ, nʼendeko yosĩ yʼabana ba Ĩsraelĩ mobahĩka omwʼirungu lyʼeSĩnĩ, eriri omo katĩkatĩ kʼeElĩmũ nʼeSĩnaĩ, oko kiro kyʼerĩkũmĩ nʼebitanu oko mukera wʼakabiri enyũma wʼerĩlũa omo kihugo kyʼeMĩsĩrĩ.

²Nʼendeko yosĩ yʼabana ba Ĩsraelĩ mobatongera Musa na Harũnĩ bʼomwʼirungu.

³Neryo abana ba Ĩsraelĩ mobabũga bati, Kumbe twaholera omo byala byʼOmwami Mukulu omo kihugo kyʼeMĩsĩrĩ, omugulu twĩkala hakũhĩ nʼesyonyungu syʼesĩswĩ omugulu twalya obundu nʼerĩũgũta; kusangwa mwabirituleta omwʼirungu erĩ, erĩĩta endeko yosĩ eyĩ nʼenzala.

⁴Neryo Omwami Mukulu mwabwira Musa ati, Lebaya, ngandĩbũtũlĩra amandu erĩlũa elubula; nʼabandu basyayakuma-kuma obuli kiro erĩgabo lyʼekiro ekyo, inatoka erirengabo, nga basyalendera omo bihano byage kutse iyihi.

⁵Neryo oko kiro kyʼendatu, basyakokotya ebyo bakaleta, nabyo byasyabya byʼengendo ĩbĩrĩ kwilaba ebyo bakakumakuma obuli kiro.

⁶Neryo Musa na Harũnĩ mobabwira abana ba Ĩsraelĩ bati, Omwʼĩgolo-golo, mukandiminya ngoko Mwami Mukulu abĩrĩbalũsya omo kihugo kyʼeMĩsĩrĩ.

⁷Nʼomo ngyakya, mwasyalangira olukengerwa lwʼOmwami Mukulu kusangwa abĩrĩowa emiyitongo yenyũ busana nʼOmwami Mukulu; netu tuli bahi, muti ĩtwe mukatonga kwehĩ?

⁸Neryo Musa mwabũga ati, Omwami Mukulu akandibaha esĩswĩ syʼerirya omwʼĩgolo-golo, nʼomo ngyakya obundu bunene; kusangwa Omwami Mukulu akowa emiyitongo yenyũ, siyiri busana netu, nĩkwa iri busana nʼOmwami Mukulu.

⁹Na Musa mwabũga na Hahũnĩ ati, Ubwire endeko yosĩ yʼabana ba Ĩsraelĩ uti, Musegere hakũhĩ embere syʼOmwami Mukulu; kusangwa abĩrĩowa emiyitongo yenyũ.

¹⁰Neryo mokyabya, omugulu Harũnĩ abya akabũga nʼendeko yosĩ yʼabana ba Ĩsraelĩ mobasamalira oko luhande lwʼerirungu, neryo lebaya, olukengerwa lwʼOmwami Mukulu molwahuluka omo kĩtũ.

¹¹Neryo Omwami Mukulu mwabwira Musa ati,

¹²Nabĩrĩowa emiyitongo yʼabana ba Ĩsraelĩ; ubwirebo uti, Omwʼĩgolo-golo mukandirya esĩswĩ, nʼomo ngyakya mwasyũgũtĩbwa nʼamandu; mwasyaminya kwʼindi Mwami Mukulu Nyamuhanga wenyũ.

¹³Neryo mobyabya bitya omwʼĩgolo-golo, esyongwali mosyasa mosyalĩba-lĩbanĩa ekilaliriro; nʼomo ngyakya ekimi mokyalembya oko mbande syosĩ syʼekilaliriro.

¹⁴Neryo ekimi kyabere kyabĩlũaho, lebaya, oko kitaka kyʼerirungu habya kandu kake kayĩrĩngĩre, kake ngʼeritsuku oko kitaka.

¹⁵Nʼomugulu abana ba Ĩsraelĩ balangirako, mobabwirana bati, Ekĩ ni kihi kwehĩ? Kusangwa mobataminya nga ni kihi. Neryo Musa mwabwirabo ati, Ni bundu obo Mwami Mukulu abiribaha erirya.

¹⁶Ekĩ kye kĩnywa ekyo Mwami Mukulu abirihana. Muyikuma-kumirebo, obuli mundu ngʼemirire yiwe ko yiri; omerĩ nguma oko buli mundu, ngʼeriganza lyʼabandu benyũ, mwasyakuma-kuma, obuli mundu, busana nʼabali omo hema yiwe.

¹⁷Nʼabana ba Ĩsraelĩ mobakola batya, mobakuma-kumako, abandi bingi nʼabandi bike.

¹⁸Omugulu balengabo oko omerĩ, oyo wakuma-kuma bingi mwatasakya, nʼoyo wakuma-kuma bike mwatabulabo; mobakuma-kumako obuli mundu ngʼemirire yiwe.

¹⁹Na Musa mwabũga nabo ati, Sihabye mundu oyũkasakaya kubo erĩhĩka engyakya.

²⁰Nĩkwa mobatowa Musa; nĩkwa abandi mobasakyago erĩhĩka engyakya, nago mwasa mwʼotuhuka, kandi mwakumba nabi; na Musa mwahitana kubo ko kutsibu.

²¹Neryo mobakuma-kumago engyakya nʼengyakya obuli mundu ngʼemirire yiwe; nʼomugulu eryuba lyakala, mwanyenyeta.

²²Neryo oko kiro kyʼendatu mobakuma-kuma obundu obo bangalya engendo ĩbĩrĩ oko buli mundu, omerĩ ĩbĩrĩ oko buli mundu; nʼabatabalĩ bosĩ bʼendeko mobasa mobabwira Musa.

²³Naye mwabwirabo ati, Ekĩ kye kyo Mwami Mukulu abũga ati, Omo ngyakya ni ʼluhuka lyʼeSabato, mũhũke ebyo mũkandĩhũka; nʼebyosĩ ebikasaka muyibikire erĩhĩka omo ngyakya.

²⁴Mobabikabo erĩhĩka omo ngyakya ngoko Musa ahanabo; nabo mobutakumba nabi, kutse mobutabya mwʼotuhuka.

²⁵Neryo Musa mwabũga ati, Mulye ebyo mũnabwĩre; kusangwa mũnabwĩre ni Sabato oko Mwami Mukulu; mũnabwĩre simwendibanabyo omwʼirima.

²⁶Ebiro ndatu mwasyakuma-kumabo; nĩkwa ekiro kyʼebirinda ni Sabato, sibwendisyabyaho mukyo.

²⁷Neryo mohabya oko kiro kyʼebirinda, abandi bandu mobayakumakumabo, mobatabana kindu.

²⁸Neryo Omwami Mukulu mwabwira Musa ati, Mwasyakolyahi erigana erĩteya ebihano byage nʼemigambo yage kwehĩ?

²⁹Mũlebaye ko Mwami Mukulu abiribaha eSabato, busana nʼekyo akabaha oko kiro kyʼendatu obundu bwʼebiro bibiri; mwĩkale obuli mundu aho wuwe, Sihabye mundu oyũkalũa aho wuwe ekiro kyʼebirinda.

³⁰Neryo abandu mobaluhuka ekiro kyʼebirinda.

³¹Neryo ekihanda kya Ĩsraelĩ mokyahula erĩna lyabo mo Mana, nabo bwabya ngʼembuto yʼobuhemba nyeru-nyeru; nʼerisiha lyabo lyabya ngʼehitole ehĩtũlũngene nʼobuki.

³²Neryo Musa mwabũga ati, Ekĩ kye kĩnywa ekyo Mwami Mukulu ahana ati, olulengo lwʼomerĩ eyoswĩre mubo ibikirawe esyondengo syenyũ, balangire obundu obo nʼabalĩsaya omwʼirungu, omugulu nabalũsaya omo kihugo kyʼeMĩsĩrĩ.

³³Neryo Musa mwabwira Harũnĩ ati, Wĩmaye akalega, ũhĩre muko eomerĩ nguma yʼamana, ũhĩrego embere syʼOmwami Mukulu, bubikawe oko syondengo syenyũ syosĩ.

³⁴Ngoko Mwami Mukulu ahana Musa, Harũnĩ mwabikabo embere syʼErĩtũlago, erĩteyĩbwa.

³⁵Nʼabana ba Ĩsraelĩ mobalya amana emyaka makũmĩ ani, erĩhĩka aho bahĩkĩra omo kihugo ekyabya mwʼabandu; mobalya amana erĩhĩka ekiro bahĩka oko mitano yʼekihugo kyʼeKanana.

³⁶Nĩkwa eomerĩ ni kihande kyʼerĩkũmĩ kyʼeefa.